ಡಾ.ವಂದನಾ ದಾಸ್ ಕೊಲೆ ಪ್ರಕರಣ: ತನಿಖಾ ತಂಡದಿಂದ 1050 ಪುಟಗಳ ಚಾರ್ಜ್ ಶೀಟ್ ಸಲ್ಲಿಕೆ

                       ತಿರುವನಂತಪುರಂ: ಡಾ.ವಂದನಾ ದಾಸ್ ಹತ್ಯೆ ಪ್ರಕರಣದ ಆರೋಪಿ ಸಂದೀಪ್ ವಿರುದ್ಧ ತನಿಖಾ ತಂಡ 1050 ಪುಟಗಳ ಚಾರ್ಜ್ ಶೀಟ್ ಅನ್ನು ನ್ಯಾಯಾಲಯಕ್ಕೆ ಸಲ್ಲಿಸಿದೆ.

                      ವಂದನಾಳನ್ನು ಕೊಲೆ ಮಾಡುವ ಉದ್ದೇಶದಿಂದ ಆರೋಪಿ ಚಾಕುವಿನಿಂದ ಇರಿದಿರುವುದು ಚಾರ್ಜ್ ಶೀಟ್ ನಲ್ಲಿ ಸ್ಪಷ್ಟವಾಗಿದೆ. ಕೊಲ್ಲಂ ಕ್ರೈಂ ಬ್ರಾಂಚ್ ಡಿವೈಎಸ್ಪಿ ಎಂ.ಎಂ.ಜೋಸ್ ಚಾರ್ಜ್ ಶೀಟ್ ಸಲ್ಲಿಸಿದ್ದಾರೆ. ಎಂ.ಎಂ.ಜೋಸ್ ನೇತೃತ್ವದ 11 ಸದಸ್ಯರ ವಿಶೇಷ ತಂಡ ಪ್ರಕರಣದ ತನಿಖೆ ನಡೆಸಿತ್ತು.

            ನಿತ್ಯ ಮದ್ಯವ್ಯಸನಿಯಾಗಿರುವ ಆರೋಪಿ ಉದ್ದೇಶಪೂರ್ವಕವಾಗಿಯೇ ದಾಳಿ ನಡೆಸುತ್ತಿದ್ದು, ಆರೋಪಿ ಸಂದೀಪ್ ಗೆ ತಾನು ಮಾಡುತ್ತಿರುವ ಅಪರಾಧದ ಸಂಪೂರ್ಣ ಅರಿವಿತ್ತು ಎಂಬುದು ಚಾರ್ಜ್ ಶೀಟ್ ನಲ್ಲಿ ಪ್ರಮುಖವಾಗಿ ಪತ್ತೆಯಾಗಿದೆ. 1,050 ಪುಟಗಳ ಚಾರ್ಜ್ ಶೀಟ್ 136 ಸಾಕ್ಷಿ ಹೇಳಿಕೆಗಳನ್ನು ಒಳಗೊಂಡಿದೆ. ಸಂದೀಪ್ ದಾಳಿಯಲ್ಲಿ ಗಾಯಗೊಂಡಿದ್ದ ವೈದ್ಯರು, ನರ್ಸ್‍ಗಳು, ಪೋಲೀಸ್ ಅಧಿಕಾರಿಗಳು ಮತ್ತು ಘಟನೆಯ ದಿನ ಅಲ್ಲಿದ್ದ ಇತರರನ್ನು ಸಾಕ್ಷಿಗಳಾಗಿ ದಾಖಲಿಸಲಾಗಿದೆ.

            ಮೇ 10ರಂದು ಕೊಟ್ಟಾರಕ್ಕರ ತಾಲೂಕು ಆಸ್ಪತ್ರೆಯಲ್ಲಿ ಡಾ.ವಂದನಾ ದಾಸ್ ಅವರನ್ನು ಸಂದೀಪ್ ಚಾಕುವಿನಿಂದ ಇರಿದು ಹತ್ಯೆ ಮಾಡಿದ್ದ. ಪ್ರಕರಣವೊಂದರ ಆರೋಪಿಯಾದ ಸಂದೀಪ್ ನನ್ನು ವೈದ್ಯಕೀಯ ಪರೀಕ್ಷೆಗಾಗಿ ಆಸ್ಪತ್ರೆಗೆ ಕರೆದೊಯ್ಯಲಾಗಿದ್ದು, ಪರೀಕ್ಷೆ ವೇಳೆ ವಂದನಾ ದಾಸ್ ಮೇಲೆ ಹಲ್ಲೆ ನಡೆಸಲಾಗಿತ್ತು. ಘಟನೆ ನಡೆದು 84 ದಿನಗಳ ಬಳಿಕ ಪೋಲೀಸರು ತನಿಖೆ ಪೂರ್ಣಗೊಳಿಸಿ ದೋಷಾರೋಪ ಪಟ್ಟಿ ಸಲ್ಲಿಸಿದ್ದಾರೆ. ಚಾರ್ಜ್ ಶೀಟ್ ಅನ್ನು ಪರಿಶೀಲಿಸಿದ ನಂತರ, ನ್ಯಾಯಾಲಯವು ವಿಚಾರಣೆಯ ಪ್ರಕ್ರಿಯೆಗಳನ್ನು ಪ್ರಾರಂಭಿಸುವ ಕ್ರಮಗಳನ್ನು ನಿರ್ಧರಿಸುತ್ತದೆ.

            ಹಠಾತ್ ಪ್ರಚೋದನೆಯಿಂದ ದಾಳಿ ನಡೆಸಲಾಗಿದೆ ಎಂದು ಸಂದೀಪ್ ಜಾಮೀನು ಅರ್ಜಿಯಲ್ಲಿ ತಿಳಿಸಲಾಗಿದೆ. ಆದರೆ ತನಿಖಾ ತಂಡವು ನ್ಯಾಯಾಲಯಕ್ಕೆ ಸಲ್ಲಿಸಿರುವ ಆರೋಪಪಟ್ಟಿಯಲ್ಲಿನ ಅಂಶಗಳು ಅದನ್ನು ಅಲ್ಲಗಳೆಯುತ್ತವೆ.