ಉತ್ತರಾಖಂಡದಲ್ಲಿ ಭೂಕುಸಿತ: 12 ಮನೆಗಳಿಗೆ ಹಾನಿ

               ಡೆಹ್ರಾಡೂನ್‌ (PTI): 'ಡೆಹ್ರಾಡೂನ್‌ ಜಿಲ್ಲೆಯ ಮದರ್ಸು ಮಜ್ರಾ ಜಖಾನ್‌ ಎಂಬ ಗ್ರಾಮದಲ್ಲಿ ಭೂ ಕುಸಿತ ಉಂಟಾಗಿದ್ದು, 12 ಮನೆಗಳಿಗೆ ಹಾನಿಯಾಗಿದೆ' ಎಂದು ಉತ್ತರಾಖಂಡದ ರಾಜ್ಯ ತುರ್ತು ಕಾರ್ಯಾಚರಣೆ ಕೇಂದ್ರ ಶುಕ್ರವಾರ ತಿಳಿಸಿದೆ.

              'ವಿಕಾಸನಗರ ಪ್ರದೇಶದ ಈ ಗ್ರಾಮದಲ್ಲಿ ಬುಧವಾರವೂ ಭೂಕುಸಿತ ಸಂಭವಿಸಿತ್ತು.

ಆಗ ವಿದ್ಯುತ್‌ ಪೂರೈಕೆಯಲ್ಲಿ ವ್ಯತ್ಯಯ ಉಂಟಾಗಿತ್ತು. ಪ್ರಸ್ತುತ 10 ಮನೆಗಳಿಗೆ ಸಂಪೂರ್ಣ ಹಾನಿಯಾಗಿದ್ದು, ಇನ್ನೆರಡು ಮನೆಗಳು ಭಾಗಶಃ ಹಾನಿಯಾಗಿವೆ. 16 ಕುಟುಂಬಗಳ 80 ಮಂದಿ ನಿರಾಶ್ರಿತರಾಗಿದ್ದಾರೆ' ಎಂದು ಅದು ಹೇಳಿದೆ.

              'ಭಾಗಶಃ ಹಾನಿಯಾದ ಮನೆಗಳು ವಾಸಿಸಲು ಯೋಗ್ಯವಾಗಿಲ್ಲ. ಅಲ್ಲಿನ ಜನರನ್ನು ಪಾಸ್ತಾದ ಕಿರಿಯ ಪ್ರೌಢಶಾಲೆಯಲ್ಲಿ ನಿರ್ಮಿಸಲಾಗಿರುವ ತಾತ್ಕಾಲಿಕ ನಿರಾಶ್ರಿತ ಶಿಬಿರಕ್ಕೆ ಕಳುಹಿಸಲಾಗಿದೆ' ಎಂದು ವಿಕಾಸನಗರದ ಉಪವಿಭಾಗೀಯ ಮ್ಯಾಜಿಸ್ಟ್ರೇಟ್‌ ವಿನೋದ್‌ ಕುಮಾರ್‌ ಅವರು ಮಾಹಿತಿ ನೀಡಿದರು.