ಆರ್ಥಿಕ ತಜ್ಞ ರಾಜ್‌ ಚೆಟ್ಟಿಗೆ ಹಾರ್ವರ್ಡ್‌ ವಿವಿ ಪ್ರಶಸ್ತಿ

              ಹ್ಯೂಸ್ಟನ್‌ (PTI): ಭಾರತ ಮೂಲದ ಆರ್ಥಿಕ ತಜ್ಞ ರಾಜ್‌ ಚೆಟ್ಟಿ ಅವರು, ಹಾರ್ವರ್ಡ್‌ ವಿಶ್ವವಿದ್ಯಾಲಯವು ಕೊಡಮಾಡುವ ಪ್ರತಿಷ್ಠಿತ ಜಾರ್ಜ್‌ ಲೆಡ್ಲಿ ಪ್ರಶಸ್ತಿಗೆ ಭಾಜನರಾಗಿದ್ದಾರೆ.

               ಚೆಟ್ಟಿ ಅವರೊಟ್ಟಿಗೆ ಹಾರ್ವರ್ಡ್‌ ವೈದ್ಯಕೀಯ ಶಾಲೆಯ ಸಿಸ್ಟಂ ಬಯಾಲಜಿ ವಿಭಾಗದ ಪ್ರಾಧ್ಯಾಪಕ ಮೈಕೆಲ್ ಸ್ಪ್ರಿಂಗರ್ ಕೂಡ ಈ ಪ್ರಶಸ್ತಿಗೆ ಪಾತ್ರರಾಗಿದ್ದಾರೆ.

                 ಮೈಕಲ್‌ ಅವರು ತ್ವರಿತಗತಿಯಲ್ಲಿ ಉತ್ತಮವಾದ ಕೋವಿಡ್‌ ಪರೀಕ್ಷಾ ವಿಧಾನವನ್ನು ರೂಪಿಸಿದ ಹೆಗ್ಗಳಿಕೆ ಹೊಂದಿದ್ದಾರೆ.

                ಸದ್ಯ ರಾಜ್‌ ಚೆಟ್ಟಿ ಅವರು ಹಾರ್ವರ್ಡ್‌ ವಿ.ವಿಯಲ್ಲಿ ಪ್ರಾಧ್ಯಾಪಕರಾಗಿದ್ದಾರೆ. ಅಲ್ಲದೇ, ಆರ್ಥಿಕ ಅಸಮಾನತೆಗೆ ಸಂಬಂಧಿಸಿದಂತೆ ಸಮಾಜ ವಿಜ್ಞಾನ ಹಾಗೂ ಅವಕಾಶದ ಒಳನೋಟಗಳನ್ನು ಕುರಿತು ಅಧ್ಯಯನ ನಡೆಸುವ ಸಂಸ್ಥೆಯ ನಿರ್ದೇಶಕರೂ ಆಗಿದ್ದಾರೆ. ವಿ.ವಿಯಲ್ಲಿ ಆರ್ಥಿಕ ತಜ್ಞರು ಈ ಸಂಸ್ಥೆಯನ್ನು ಸ್ಥಾಪಿಸಿದ್ದಾರೆ.

                 'ಆರ್ಥಿಕ ಚಲನಶೀಲತೆಗೆ ಸಂಬಂಧಿಸಿದಂತೆ ಚೆಟ್ಟಿ ಅವರು ತಲಸ್ಪರ್ಶಿ ಅಧ್ಯಯನ ನಡೆಸಿದ್ದಾರೆ. ಅವರು ಮಂಡಿಸಿರುವ ಆರ್ಥಿಕ ದತ್ತಾಂಶಗಳು ಅಮೆರಿಕದ ನೀತಿ ನಿರೂಪಕರಿಗೆ ಹೆಚ್ಚು ಸಹಕಾರಿಯಾಗಿವೆ' ಎಂದು ವಿ.ವಿಯ ಮುಖ್ಯ ಶೈಕ್ಷಣಿಕ ಅಧಿಕಾರಿ ಅಲನ್ ಎಂ. ಗಾರ್ಬರ್ ತಿಳಿಸಿದ್ದಾರೆ.