ಕೋಝಿಕ್ಕೋಡ್‌: ಶಾಲೆಗಳಿಗೆ ಎರಡು ದಿನ ರಜೆ ಘೋಷಣೆ, 'ಪರಿಸ್ಥಿತಿ 2018 ರಷ್ಟು ಭಯಾನಕವಾಗಿಲ್ಲ

                   ತಿರುವನಂತಪುರಂ: ಕೇರಳದಲ್ಲಿ ಇದುವರೆಗೆ 5 ನಿಪಾ ವೈರಸ್ ಪ್ರಕರಣಗಳು ವರದಿಯಾಗಿದೆ. ವೈರಸ್‌ನಿಂದ ಇದುವರೆಗೆ ಇಬ್ಬರು ಸಾವನ್ನಪ್ಪಿದ್ದಾರೆ. ತಮ್ಮ ಮನೆಗಳಲ್ಲಿಯೇ ಇರುವಂತೆ ಸರ್ಕಾರ ನಿರಂತರವಾಗಿ ಜನರಿಗೆ ಸೂಚನೆ ನೀಡುತ್ತಿದೆ.

                                ಕೆಕೆ ಶೈಲಜಾ ಹೇಳಿದ್ದೇನು?
            2018 ರಲ್ಲಿ ನಿಪಾ ಸೋಂಕನ್ನು ಪರಿಣಾಮಕಾರಿಯಾಗಿ ನಿಯಂತ್ರಿಸಿದ್ದಕ್ಕಾಗಿ ಹೆಚ್ಚು ಪ್ರಶಂಸೆಗೆ ಪಾತ್ರರಾದ ಕೆಕೆ ಶೈಲಜಾ, ಸೋಂಕಿನ ವಿರುದ್ಧ ಪರಿಣಾಮಕಾರಿಯಾಗಿ ಹೋರಾಡಲು ಮತ್ತು ದಕ್ಷಿಣ ರಾಜ್ಯದಲ್ಲಿ ಹರಡುವುದನ್ನು ತಡೆಯಲು ಪ್ರೋಟೋಕಾಲ್ ಮತ್ತು ಪ್ರಮಾಣಿತ ಆಪರೇಟಿಂಗ್ ವಿಧಾನವನ್ನು ಜಾರಿಗೆ ತರಲಾಗಿದೆ ಎಂದು ಹೇಳಿದರು.

                   ಹಿಂದಿನ ಎಲ್‌ಡಿಎಫ್ ಸರ್ಕಾರದಲ್ಲಿ ರಾಜ್ಯದಲ್ಲಿ ಮೊದಲ ನಿಪಾ ಪ್ರಕರಣದ ವಿರುದ್ಧ ಹೋರಾಡಿದ ಶೈಲಜಾ ಅವರು ಆರೋಗ್ಯ ಸಚಿವರಾಗಿದ್ದರು.

                                            ಪರಿಸ್ಥಿತಿ 2018ರಷ್ಟು ಭೀಕರವಾಗಿಲ್ಲ

              '2018 ರಲ್ಲಿ, ಇದು ನಮಗೆ ಹೊಸ ವೈರಸ್ ಆಗಿತ್ತು. ಆ ಸಮಯದಲ್ಲಿ ಅಂತಹ ಸೋಂಕುಗಳ ವಿರುದ್ಧ ಹೋರಾಡುವಲ್ಲಿ ನಮಗೆ ಯಾವುದೇ ಅನುಭವವಿರಲಿಲ್ಲ. ಈಗ, ಅದನ್ನು ಪರಿಣಾಮಕಾರಿಯಾಗಿ ನಿಲ್ಲಿಸಲು ನಾವು ಎಲ್ಲವನ್ನೂ ಹೊಂದಿದ್ದೇವೆ' ಎಂದು ಶೈಲಜಾ ಸುದ್ದಿಗಾರರಿಗೆ ತಿಳಿಸಿದರು. ರಾಜ್ಯದಲ್ಲಿ ನಿಪಾ ಪರೀಕ್ಷಾ ಸೌಲಭ್ಯಗಳನ್ನು ಸ್ಥಾಪಿಸಲಾಗಿದೆ, ಆದರೆ ಸೋಂಕನ್ನು ಪುಣೆಯ ನ್ಯಾಷನಲ್ ಇನ್‌ಸ್ಟಿಟ್ಯೂಟ್ ಆಫ್ ವೈರಾಲಜಿ (ಎನ್‌ಐವಿ) ಯಿಂದ ಮಾತ್ರ ದೃಢೀಕರಿಸಬಹುದು ಎಂದು ಶೈಲಜಾ ಹೇಳಿದರು. 'ನಮ್ಮಲ್ಲಿ ಸೌಲಭ್ಯವಿದೆ. 2018 ರಲ್ಲಿ ಕೋಝಿಕ್ಕೋಡ್‌ನಲ್ಲಿ ಮೊದಲ ಸಮಯದಲ್ಲಿ ನಾವು ಇದನ್ನು ಪ್ರಯತ್ನಿಸಿದ್ದೇವೆ. ಆದರೆ ಪುಣೆಯ ಎನ್‌ಐವಿಯಿಂದ ಮಾತ್ರ ಸೋಂಕನ್ನು ದೃಢೀಕರಿಸಬಹುದು' ಎಂದರು.

                                  ಕೋಝಿಕ್ಕೋಡ್ ನಲ್ಲಿ ಎರಡು ದಿನ ರಜೆ
                         ಉತ್ತರ ಕೇರಳದ ಕೋಝಿಕ್ಕೋಡ್‌ನಲ್ಲಿ ನಿಪಾ ಹಾವಳಿಯ ಹಿನ್ನೆಲೆಯಲ್ಲಿ ಗುರುವಾರ ಮತ್ತು ಶುಕ್ರವಾರದಂದು ಎಲ್ಲಾ ಶಿಕ್ಷಣ ಸಂಸ್ಥೆಗಳಿಗೆ ರಜೆ ಘೋಷಿಸಲಾಗಿದೆ. ಕೋಝಿಕ್ಕೋಡ್ ಜಿಲ್ಲಾಧಿಕಾರಿ ಎ ಗೀತಾ, ಈ ಕುರಿತು ಮಾತನಾಡಿ, ಶಿಕ್ಷಣ ಸಂಸ್ಥೆಗಳು ಎರಡು ದಿನಗಳ ಮಟ್ಟಿಗೆ ವಿದ್ಯಾರ್ಥಿಗಳಿಗೆ ಆನ್‌ಲೈನ್ ತರಗತಿಗಳನ್ನು ಏರ್ಪಡಿಸಬಹುದು ಎಂದು ಫೇಸ್‌ಬುಕ್ ಪೋಸ್ಟ್‌ನಲ್ಲಿ ತಿಳಿಸಿದ್ದಾರೆ. ಆದರೆ, ವಿಶ್ವವಿದ್ಯಾಲಯದ ಪರೀಕ್ಷಾ ವೇಳಾಪಟ್ಟಿಯಲ್ಲಿ ಯಾವುದೇ ಬದಲಾವಣೆ ಇರುವುದಿಲ್ಲ.

                                         ರಾಜ್ಯ ಸರ್ಕಾರ ಯಾವ ಆದೇಶ ನೀಡಿದೆ?

              ಕೇರಳದಲ್ಲಿ ನಿಪಾ ವೈರಸ್ ಪ್ರಕರಣಗಳು ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ, ರಾಜ್ಯ ಸರ್ಕಾರವು ಅಲರ್ಟ್ ಆಗಿದೆ. ಸೋಂಕಿತರ ಸಂಪರ್ಕಕ್ಕೆ ಬಂದವರಿಗೆ ಅವರ ಮನೆಗಳಲ್ಲಿಯೇ ಇರುವಂತೆ ರಾಜ್ಯ ಸರ್ಕಾರ ಸೂಚಿಸಿದೆ. ಇದರೊಂದಿಗೆ ರಾಜ್ಯ ಸರ್ಕಾರವು 58 ವಾರ್ಡ್‌ಗಳನ್ನು ಕಂಟೇನ್ಮೆಂಟ್ ವಲಯ ಎಂದು ಘೋಷಿಸಿದೆ. ಇದೇ ವೇಳೆ ನಿಪಾ ವೈರಸ್ ಸೋಂಕು ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ದಕ್ಷಿಣ ಕನ್ನಡದಲ್ಲೂ ಎಚ್ಚರಿಕೆ ನೀಡಲಾಗಿದೆ.

                                                 ನಿಪಾ ವೈರಸ್ ಹರಡಲು ಕಾರಣವೇನು?
                        ಸೋಂಕಿತ ಹಂದಿಗಳು ಸಂಪರ್ಕಕ್ಕೆ ಬಂದ ನಂತರ ಜನರು ನಿಪಾ ವೈರಸ್‌ನ ಮೊದಲ ಪ್ರಕರಣ ಬೆಳಕಿಗೆ ಬಂದಿದೆ ನಂತರ, ಇದರ ಮೂಲ ಬಾವಲಿಗಳಿಂದ ಹಂದಿಗಳಿಗೆ ವೈರಸ್ ಹರಡಿದೆ ಎಂದು ತಜ್ಞರು ತೀರ್ಮಾನಿಸಿದರು. ಒಬ್ಬ ವ್ಯಕ್ತಿ ಅಥವಾ ಪ್ರಾಣಿಯು ಸೋಂಕಿತ ಬಾವಲಿ ಅಥವಾ ಹಂದಿಯ ರಕ್ತ, ಮಲ, ಮೂತ್ರ ಅಥವಾ ಲಾಲಾರಸದಂತಹ ದ್ರವಗಳೊಂದಿಗೆ ಸಂಪರ್ಕಕ್ಕೆ ಬಂದರೆ, ಅವರಿಗೂ ಸೋಂಕು ತರುತ್ತದೆ. ಇದಲ್ಲದೆ, ಈ ವೈರಸ್ ಸೋಂಕಿತ ಪ್ರಾಣಿಗಳ ದ್ರವಗಳೊಂದಿಗೆ ಕಲುಷಿತವಾಗಿರುವ ಆಹಾರ ಪದಾರ್ಥಗಳೊಂದಿಗೆ ಸಂಪರ್ಕಕ್ಕೆ ಬರುವ ಮೂಲಕವೂ ಹರಡುತ್ತದೆ.