ಉಗ್ರವಾದ ಕುರಿತು ನಿರ್ಧರಿಸುವಾಗ 'ರಾಜಕೀಯ ಅನುಕೂಲ' ಮಧ್ಯ ತರಬೇಡಿ: ಜೈಶಂಕರ್‌

                ವಿಶ್ವಸಂಸ್ಥೆ: ಭಯೋತ್ಪಾದನೆ, ಉಗ್ರವಾದ ಮತ್ತು ಹಿಂಸೆಗೆ ನೀಡುವ ಪ್ರತಿಕ್ರಿಯೆ ಕುರಿತು ನಿರ್ಧರಿಸುವ ವೇಳೆ 'ರಾಜಕೀಯ ಅನುಕೂಲ'ವನ್ನು ಮಧ್ಯ ತರಬೇಡಿ ಎಂದು ವಿದೇಶಾಂಗ ವ್ಯವಹಾರಗಳ ಸಚಿವ ಎಸ್‌. ಜೈಶಂಕರ್‌ ಅವರು ವಿಶ್ವಸಂಸ್ಥೆಯ ಸದಸ್ಯ ರಾಷ್ಟ್ರಗಳಿಗೆ ಮಂಗಳವಾರ ಹೇಳಿದರು.

            ಖಾಲಿಸ್ತಾನಿ ಪ್ರತ್ಯೇಕತಾವಾದಿ ಹೋರಾಟಗಾರನ ಹತ್ಯೆಯ ಕಾರಣದಿಂದ ಉಂಟಾಗಿರುವ ಬಿಕ್ಕಟ್ಟಿನ ಹಿನ್ನಲೆಯಲ್ಲಿ ಕೆನಡಾವನ್ನು ಗುರಿಮಾಡಿ ಅವರು ಹೀಗೆ ಹೇಳಿದರು.

                 ವಿಶ್ವಸಂಸ್ಥೆಯ ಸಾಮಾನ್ಯಸಭೆಯ 78ನೇ ಅಧಿವೇಶನದಲ್ಲಿ ಅವರು ಮಾತನಾಡಿದರು. ಕೆಲ ದೇಶಗಳು ಕಾರ್ಯಸೂಚಿಯನ್ನು ನಿಗದಿಪಡಿಸಿವೆ ಮತ್ತು ಇತರ ದೇಶಗಳ ಅದನ್ನು ಅನುಸರಿಸಬೇಕು ಎಂದು ನಿರೀಕ್ಷಿಸುತ್ತವೆ ಎಂದ ಅವರು, ಪ್ರಾದೇಶಿಕ ಸಮಗ್ರತೆಗೆ ಮತ್ತು ಆಂತರಿಕ ವಿಚಾರದಲ್ಲಿ ಮೂಗುತೂರಿಸದೇ ಇರುವುದನ್ನು ಗೌರವಿಸುವುದು 'ಆಯ್ಕೆಯ ವಿಚಾರ' ಆಗಬಾರದು ಎಂದರು.