ಕೇರಳದಲ್ಲಿ ಯೋಜಿತ ಭಯೋತ್ಪಾದಕ ದಾಳಿ; ಇಸ್ಲಾಮಿಕ್ ಸ್ಟೇಟ್ ನ ಭಯೋತ್ಪಾದಕ ಕೇರಳೀಯ ನಬೀಲ್ ಎನ್.ಐ.ಎ. ಕಸ್ಟಡಿಗೆ

               ತಿರುವನಂತಪುರಂ: ಕೇರಳದಲ್ಲಿ ಉಗ್ರರ ದಾಳಿಗೆ ಸಂಚು ರೂಪಿಸಿದ್ದ ಐಎಸ್ ಉಗ್ರ ನಬೀಲ್ ಎನ್‍ಐಎ ವಶದಲ್ಲಿದ್ದಾನೆ. ನಬೀಲ್ ನನ್ನು ಇದೇ 16ರವರೆಗೆ ಕಸ್ಟಡಿಗೆ ನೀಡಲಾಗಿದೆ.

                 ಭಯೋತ್ಪಾದನಾ ದಾಳಿಯ ಯೋಜನೆಯಲ್ಲಿ ನಬೀಲ್ ಪ್ರಮುಖ ಭಾಗಿ ಎಂದು ಎನ್‍ಐಎ ನ್ಯಾಯಾಲಯಕ್ಕೆ ಮಾಹಿತಿ ನೀಡಿತ್ತು.

               ಪ್ರಕರಣದ ಎರಡನೇ ಆರೋಪಿ ನಬೀಲ್‍ನನ್ನು ಎನ್‍ಐಎ ಕಳೆದ ಬುಧವಾರ ಚೆನ್ನೈನಿಂದ ಬಂಧಿಸಿತ್ತು. ನಬೀಲ್ ಅಹ್ಮದ್ ಅಲಿಯಾಸ್ ನಬೀಲ್ ಕರ್ನಾಟಕ ಮತ್ತು ತಮಿಳುನಾಡಿನಲ್ಲಿ ತಲೆಮರೆಸಿಕೊಂಡಿದ್ದ. ನಬೀಲ್ ಪಾಲಕ್ಕಾಡ್ ಮತ್ತು ತ್ರಿಶೂರ್‍ನಲ್ಲಿ ಪಿತೂರಿಗಳಲ್ಲಿ ಭಾಗಿಯಾಗಿದ್ದ. ಕೇರಳದ ಐಎಸ್ ಮಾಡ್ಯೂಲ್‍ನ ಪ್ರಮುಖ ವ್ಯಕ್ತಿಗಳಲ್ಲಿ ನಬೀಲ್ ಒಬ್ಬ ಎಂದು ಎನ್‍ಐಎ ಪತ್ತೆ ಮಾಡಿದೆ. ನಕಲಿ ದಾಖಲೆಗಳೊಂದಿಗೆ ನೇಪಾಳಕ್ಕೆ ಪ್ರವೇಶಿಸಲು ಯತ್ನಿಸಿದ್ದ ನಬೀಲ್ ಕಳೆದ ವಾರ ಚೆನ್ನೈ ವಿಮಾನ ನಿಲ್ದಾಣದಲ್ಲಿ ಸಿಕ್ಕಿಬಿದ್ದಿದ್ದು, ಈತ ವಿದೇಶಕ್ಕೆ ದಾಟಬಹುದೆಂಬ ಶಂಕೆಯಿಂದ ವಿಮಾನ ನಿಲ್ದಾಣಗಳಲ್ಲಿ ಕಣ್ಗಾವಲು ಬಿಗಿಗೊಳಿಸಲಾಗಿತ್ತು. ನಂತರ ಆರೋಪಿಯನ್ನು ಕೊಚ್ಚಿಯ ವಿಶೇಷ ಎನ್‍ಐಎ ನ್ಯಾಯಾಲಯಕ್ಕೆ ಹಾಜರುಪಡಿಸಲಾಯಿತು.

               ವಿವರವಾದ ವಿಚಾರಣೆಗಾಗಿ ಎನ್‍ಐಎ ಏಳು ದಿನಗಳ ಕಸ್ಟಡಿಗೆ ಕೇಳಿತ್ತು. ನಂತರ ನಬೀಲ್ ನನ್ನು ಇದೇ 16ರವರೆಗೆ ವಶಕ್ಕೆ ಪಡೆಯಲಾಗಿದೆ. ನಿಧಿ ಸಂಗ್ರಹಣೆ ಮತ್ತು ದಾಳಿಯ ಯೋಜನೆಗಳನ್ನು ರೂಪಿಸುವ ಜವಾಬ್ದಾರಿಯನ್ನು ಹೊತ್ತಿದ್ದವರಲ್ಲಿ ನಬೀಲ್ ಕೂಡ ಒಬ್ಬರು. ಇದಕ್ಕೂ ಮುನ್ನ ಮಲಯಾಳಿ ಐಎಸ್ ಭಯೋತ್ಪಾದಕರಾದ ಆಶಿಫ್ ಮತ್ತು ಶಿಯಾಸ್ ಸಿದ್ದಿಕ್ ಅವರನ್ನು ಬಂಧಿಸಲಾಗಿತ್ತು. ತಮಿಳುನಾಡಿನ ಸತ್ಯಮಂಗಲಂ ಅರಣ್ಯ ಪ್ರದೇಶದ ಬಳಿ ಆಶಿಫ್ ನನ್ನು ಬಂಧಿಸಲಾಗಿದೆ. ಬಳಿಕ ಶಿಯಾಸ್‍ನನ್ನು ಕೂಡ ಬಂಧಿಸಲಾಗಿತ್ತು. ಅವರಿಂದ ಮಾಹಿತಿ ಆಧರಿಸಿ ತನಿಖೆ ನಡೆಸಿದಾಗ ನಬೀಲ್ ಕೂಡ ಸಿಕ್ಕಿಬಿದ್ದಿದ್ದಾನೆ. ಷಡ್ಯಂತ್ರಗಳು ನಡೆದ ಕೇಂದ್ರಗಳಿಗೆ ಆರೋಪಿಗಳನ್ನು ಕರೆತಂದು ಸಾಕ್ಷ್ಯ ಸಂಗ್ರಹಿಸಲಾಗುವುದು.