ಬೆದ್ರಂಪಳ್ಳದಲ್ಲಿ ಒಂದೇ ಮನೆಗೆ ಎರಡನೇ ಬಾರಿ ನುಗ್ಗಿದ ಕಳ್ಳರು: ಸಿಸಿ ಟಿವಿ ಹಾರ್ಡ್ ಡಿಸ್ಕ್ ಹೊತ್ತೊಯ್ದ ತಸ್ಕರ

        ಬದಿಯಡ್ಕ: ಪೆರ್ಲ ಬೆದ್ರಂಪಳ್ಳದಲ್ಲಿ ಅಧ್ಯಾಪಕರೊಬ್ಬರ ಮನೆಗೆ ತಿಂಗಳ ಅಂತರದಲ್ಲಿ ಎರಡನೇ ಬಾರಿ ಕಳವು ಯತ್ನ ನಡೆದಿದೆ.

      ಕಾಸರಗೋಡು ಶಾಲೆಯೊಂದರಲ್ಲಿ  ಅಧ್ಯಾಪಕರಾಗಿರುವ ರೆಹಮಾನ್ ಎಂಬುವವರ ಮನೆಯಲ್ಲಿ ದರೋಡೆ ಯತ್ನ ನಡೆದಿದೆ. ನಿನ್ನೆ ಮಧ್ಯರಾತ್ರಿ ಈ ಘಟನೆ ನಡೆದಿದೆ. ಮನೆಯೊಳಗಡೆ  ಬಟ್ಟೆಗಳನ್ನು ಎಳೆದು ಕೆಳಗೆ ಎಸೆದಿರುವುದು ಕಂಡುಬಂದಿದೆ. ಈ ಮನೆಯಲ್ಲಿ ಯಾವುದೇ ಚಿನ್ನಾಭರಣ, ಹಣ, ಬೆಲೆಬಾಳುವ ವಸ್ತುಗಳನ್ನು ಇರಿಸದಿದ್ದುದರಿಂದ  ಕಳ್ಳನಿಗೆ ಏನೂ ಲಭಿಸಿಲ್ಲ. ಅಧ್ಯಾಪಕ ಮತ್ತು ಅವರ ಕುಟುಂಬದ ಮೂಲಮನೆ ಇದಾಗಿದ್ದು,  ವಾರಕ್ಕೊಮ್ಮೆ ಮಾತ್ರ ಅವರಿಲ್ಲಿಗೆ ಆಗಮಿಸುತ್ತಾರೆ.  ಇದೇ ಮನೆಯಲ್ಲಿ ಈ ಹಿಂದೆ ದರೋಡೆ ಯತ್ನ ನಡೆದಿದ್ದರಿಂದ ಸಿಸಿ ಕ್ಯಾಮರಾ ಅಳವಡಿಸಲಾಗಿತ್ತು. ಅದರ ಹಾರ್ಡ್ ಡಿಸ್ಕ್ ಅನ್ನು ರಹಸ್ಯ ಸ್ಥಳದಲ್ಲಿ ಇರಿಸಲಾಗಿತ್ತು. ಈ ಹಾರ್ಡ್ ಡಿಸ್ಕ್ ನ್ನು ಇದೀಗ ಕಳ್ಳರು ಕದ್ದೊಯ್ದಿದ್ದಾರೆ. ಶಿಕ್ಷಕರ ದೂರಿನ ಮೇರೆಗೆ ಬದಿಯಡ್ಕ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ತನಿಖೆ ಆರಂಭಿಸಿದ್ದಾರೆ.