ಕೇರಳದಲ್ಲಿ ಕಪ್ಪು ಹಣ ವಹಿವಾಟು: ಅರ್ಬನ್ ಮತ್ತು ಸಹಕಾರಿ ಬ್ಯಾಂಕ್‍ಗಳ ಸಭೆ ಕರೆದ ಭಾರತೀಯ ರಿಸರ್ವ್ ಬ್ಯಾಂಕ್

                 

               ತಿರುವನಂತಪುರಂ: ಭಾರತೀಯ ರಿಸರ್ವ್ ಬ್ಯಾಂಕ್ ಕೇರಳದ ಅರ್ಬನ್ ಕೋ ಆಪರೇಟಿವ್ ಬ್ಯಾಂಕ್ ಪ್ರತಿನಿಧಿಗಳ ಸಭೆ ಕರೆದಿದೆ. ಶುಕ್ರವಾರ ಕೊಚ್ಚಿಯಲ್ಲಿ ನಡೆಯಲಿರುವ ಸಭೆಯಲ್ಲಿ ಆರ್‍ಬಿಐ ಅರ್ಬನ್ ಬ್ಯಾಂಕ್‍ಗಳ ವಹಿವಾಟು ಮತ್ತು ಇಡಿ ವರದಿಯ ಪ್ರಕಾರ ಕಪ್ಪುಹಣ ವಹಿವಾಟು ಹೊಂದಿರುವ ಶಂಕಿತ ಸಹಕಾರಿ ಬ್ಯಾಂಕ್‍ಗಳೊಂದಿಗೆ ಅರ್ಬನ್ ಬ್ಯಾಂಕ್‍ಗಳು ಸಂಪರ್ಕ ಹೊಂದಿದೆಯೇ ಎಂಬುದನ್ನು ಪರಿಶೀಲಿಸಲಿದೆ. ಪ್ರತಿನಿಧಿಗಳಿಂದ ಹೆಚ್ಚಿನ ಮಾಹಿತಿ ಸಂಗ್ರಹಿಸಲು ಸಭೆ ನಡೆಸಲಾಗುವುದು. 

                 ಕರುವನ್ನೂರು ಸಹಕಾರಿ ಬ್ಯಾಂಕ್ ವಂಚನೆ ಪ್ರಕರಣದ ಹಿನ್ನೆಲೆಯಲ್ಲಿ ಕರುವನ್ನೂರು ಬ್ಯಾಂಕ್‍ಗೆ ಎರಡು ಅರ್ಬನ್ ಬ್ಯಾಂಕ್‍ಗಳು ಸಂಬಂಧಿಸಿವೆ ಎಂದು ಪತ್ತೆಯಾದ ಹಿನ್ನೆಲೆಯಲ್ಲಿ ಆರ್‍ಬಿಐ ನೇತೃತ್ವದಲ್ಲಿ ಸಭೆ ನಡೆಸಲಾಗುತ್ತಿದೆ. ಸಭೆಯಲ್ಲಿ ಆರ್‍ಬಿಐ ಕೇಂದ್ರ ಕಚೇರಿಯಿಂದ ನೇಮಕಗೊಂಡ ಮುಖ್ಯ ಪ್ರಧಾನ ವ್ಯವಸ್ಥಾಪಕರು ಭಾಗವಹಿಸಲಿದ್ದಾರೆ. ಅಲ್ಲದೆ, ರಾಜ್ಯದ ಪ್ರಮುಖ ಅರ್ಬನ್ ಬ್ಯಾಂಕ್‍ಗಳ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿಗಳು, ಅರ್ಬನ್ ಬ್ಯಾಂಕ್ ಫೆಡರೇಶನ್‍ನ ಅಧ್ಯಕ್ಷರು ಮತ್ತು ಪದಾಧಿಕಾರಿಗಳು ಸಭೆಯಲ್ಲಿ ಭಾಗವಹಿಸಲಿದ್ದಾರೆ.