ನವದೆಹಲಿ: ಸೈಬರ್ ಭದ್ರತೆಯನ್ನು ಖಚಿತಪಡಿಸಿಕೊಳ್ಳಲು ರಕ್ಷಣಾ ಸಚಿವಾಲಯವು ಸ್ಥಳೀಯ ಆಪರೇಟಿಂಗ್ ಸಿಸ್ಟಮ್ ಅನ್ನು ಅಭಿವೃದ್ಧಿಪಡಿಸಿದೆ.
ರಕ್ಷಣಾ ಸಚಿವಾಲಯವು ಮೈಕ್ರೋಸಾಫ್ಟ್ ನ ವಿಂಡೋಸ್ ಆಪರೇಟಿಂಗ್ ಸಿಸ್ಟಮ್‍ಗೆ ಬದಲಿಯಾಗಿ 'ಮಾಯಾ' ಅನ್ನು ಬಳಸುತ್ತದೆ. ಚೀನಾದ ಸೈಬರ್ ಮತ್ತು ಮಾಲ್‍ವೇರ್ ದಾಳಿಗಳ ಹೆಚ್ಚಳದ ಮಧ್ಯೆ ಈ ಕ್ರಮಕ್ಕೆ ಮುಂದಾಗಲಾಗಿದೆ. ಮಾಯಾ ಓಎಸ್ ದೇಶಾದ್ಯಂತ ರಕ್ಷಣಾ ಸಚಿವಾಲಯದ ಕಂಪ್ಯೂಟರ್‍ಗಳ ಭದ್ರತೆಯನ್ನು ಹೆಚ್ಚಿಸಲಿದೆ.
2021 ರಲ್ಲಿ, ಚೀನಾದಿಂದ ಸೈಬರ್ ದಾಳಿಯ ಹೆಚ್ಚಳದೊಂದಿಗೆ, ರಕ್ಷಣಾ ಸಚಿವಾಲಯದ ಕಂಪ್ಯೂಟರ್‍ಗಳ ಸುರಕ್ಷತೆಯನ್ನು ಹೆಚ್ಚಿಸಲು ವಿಂಡೋಸ್ ಗಿಂತ ಹೆಚ್ಚು ಸುರಕ್ಷಿತ ಆಪರೇಟಿಂಗ್ ಸಿಸ್ಟಮ್ ಅನ್ನು ಅಭಿವೃದ್ಧಿಪಡಿಸಲು ರಕ್ಷಣಾ ಸಚಿವಾಲಯ ನಿರ್ಧರಿಸಿತು. ಉಬುಂಟು ಆಧಾರಿತ, ಮಾಯಾ ಓಎಸ್ ಹೆಚ್ಚಿನ ಸೈಬರ್ ಭದ್ರತೆಯನ್ನು ಒದಗಿಸುತ್ತದೆ. ರಾಷ್ಟ್ರೀಯ ಮಾಹಿತಿ ಕೇಂದ್ರ, ರಕ್ಷಣಾ ಸಂಶೋಧನೆ ಮತ್ತು ಅಭಿವೃದ್ಧಿ ಸಂಸ್ಥೆ, ಸುಧಾರಿತ ಕಂಪ್ಯೂಟಿಂಗ್ ಅಭಿವೃದ್ಧಿ ಕೇಂದ್ರ ಮುಂತಾದ ವಿವಿಧ ವಿಭಾಗಗಳ ಸಹಾಯದಿಂದ ಮಾಯಾ ಔS ಅನ್ನು ಅಭಿವೃದ್ಧಿಪಡಿಸಲಾಗಿದೆ. ಆರು ತಿಂಗಳಲ್ಲಿ ಭಾರತ ಈ ಆಪರೇಟಿಂಗ್ ಸಿಸ್ಟಮ್ ಸಿದ್ಧಪಡಿಸಿದೆ ಎಂದು ರಾಷ್ಟ್ರೀಯ ಮಾಧ್ಯಮಗಳು ವರದಿ ಮಾಡಿವೆ.
ಇದು ವಿಂಡೋಸ್ ಅನ್ನು ಹೋಲುವ ಕಾರಣ, ಮಾಯಾವನ್ನು ಗ್ರಾಹಕರು ಬೇಗನೆ ಬಳಸಬಹುದು. ಚಕ್ರವ್ಯೂಹ ಆಂಟಿವೈರಸ್ ಸಾಫ್ಟ್‍ವೇರ್ ಮೂಲಕ ಸೈಬರ್ ದಾಳಿಯನ್ನು ನಿಯಂತ್ರಿಸಬಹುದು. ಮಾಯಾ ಒಎಸ್ ನ ಕಾರ್ಯಾಚರಣೆಯನ್ನು ಪ್ರಸ್ತುತ ಸೇನೆ ಮತ್ತು ವಾಯುಪಡೆಯು ಮೌಲ್ಯಮಾಪನ ಮಾಡುತ್ತಿದೆ. ಹೊಸ ಆಪರೇಟಿಂಗ್ ಸಿಸ್ಟಮ್ ಅನ್ನು ಈ ವರ್ಷದ ನಂತರ ಇತರ ಕಂಪ್ಯೂಟರ್‍ಗಳಲ್ಲಿ ಸ್ಥಾಪಿಸಲಾಗುವುದು.
DOCTYPE html>
