ಎಲತ್ತೂರು ರೈಲಿಗೆ ಬೆಂಕಿ ಹಚ್ಚಿದ ಪ್ರಕರಣ; ಜನವರಿಯಲ್ಲಿ ವಿಚಾರಣೆ ಆರಂಭ

                ಎರ್ನಾಕುಳಂ: ಎಲತ್ತೂರ್ ರೈಲಿಗೆ ಬೆಂಕಿ ಹಚ್ಚಿದ ಪ್ರಕರಣದ ವಿಚಾರಣೆ ಜನವರಿಯಲ್ಲಿ ಆರಂಭವಾಗಲಿದೆ. ದೆಹಲಿಯ ಶಾಹೀನ್ ಬಾಗ್ ಮೂಲದ ಶಾರುಖ್ ಸೈಫಿ ಎಂಬಾತನೇ ಆರೋಪಿ.

              ಶಾರುಖ್ ಕೃತ್ಯ ಭಯೋತ್ಪಾದಕ ಕೃತ್ಯ ಎಂದು ಎನ್ ಐಎ ಚಾರ್ಜ್ ಶೀಟ್ ನಲ್ಲಿ ಹೇಳಲಾಗಿದೆ. ಸೆಪ್ಟೆಂಬರ್ ಅಂತ್ಯದಲ್ಲಿ ಕೊಚ್ಚಿ ಎನ್ಐಎ ನ್ಯಾಯಾಲಯಕ್ಕೆ ಚಾರ್ಜ್ ಶೀಟ್ ಸಲ್ಲಿಸಲಾಗಿತ್ತು.

            ಜನರಲ್ಲಿ ಭಯ ಹುಟ್ಟಿಸುವುದು ಇದರ ಉದ್ದೇಶವಾಗಿತ್ತು. ಶಾರುಖ್ ನಿಯಮಿತವಾಗಿ ಆನ್‍ಲೈನ್‍ನಲ್ಲಿ ಪಾಕಿಸ್ತಾನ ಮೂಲದ ವಿವಾದಾತ್ಮಕ ಧಾರ್ಮಿಕ ಬೋಧಕರ ಭಾಷಣಗಳನ್ನು ಆಲಿಸಿ ಅನುಸರಿಸುತ್ತಿದ್ದ. ಆತನದ್ದು ಭಯೋತ್ಪಾದನಾ ಕೃತ್ಯ ಎಂದೂ ಆರೋಪಪಟ್ಟಿಯಲ್ಲಿ ಹೇಳಲಾಗಿದೆ. ಆದರೆ ವಿಸ್ತೃತ ತನಿಖೆಯಲ್ಲಿ ಶಾರುಖ್ ಮಾತ್ರ ಆರೋಪಿ ಎಂಬುದನ್ನು ಎನ್‍ಐಎ ಪತ್ತೆ ಮಾಡಿದೆ. ದೆಹಲಿಯಲ್ಲೂ ತನಿಖೆ ನಡೆದಿದೆ.

             ಪ್ರಕರಣಕ್ಕೆ ಸಂಬಂಧಿಸಿದ ಘಟನೆ ಏಪ್ರಿಲ್ 2 ರಂದು ರಾತ್ರಿ ನಡೆದಿತ್ತು. ಅಲಪ್ಪುಳ-ಕಣ್ಣೂರು ಎಕ್ಸಿಕ್ಯೂಟಿವ್ ಎಕ್ಸ್‍ಪ್ರೆಸ್‍ನ ಡಿ1 ಕೋಚ್‍ನಲ್ಲಿ ಬೆಂಕಿ ಹತ್ತಿಕೊಂಡಿತ್ತು. ತಪ್ಪಿಸಿಕೊಳ್ಳಲು ರೈಲಿನಿಂದ ಜಿಗಿದ ಮೂವರು ಸಾವನ್ನಪ್ಪಿದ್ದರು.  ರೈಲ್ವೇ ಪೋಲೀಸರು ತನಿಖೆ ನಡೆಸುತ್ತಿದ್ದ ಪ್ರಕರಣವನ್ನು ಎನ್‍ಐಎ ನಂತರ ವಹಿಸಿಕೊಂಡಿತು.  ರೈಲು ಎಲತ್ತೂರು ದಾಟಿದಾಗ ರೈಲಿನಲ್ಲಿದ್ದ ಪ್ರಮುಖ ಪ್ರತ್ಯಕ್ಷದರ್ಶಿಗಳು ಆರೋಪಿಯನ್ನು ಗುರುತಿಸಿದ್ದರು. ಪ್ರಕರಣದಲ್ಲಿ ವೈಜ್ಞಾನಿಕ ಪುರಾವೆಗಳು ಸಹ ಮುಖ್ಯವಾಗಿತ್ತು.