ಆರ್ಥಿಕ ಒತ್ತಡದಲ್ಲಿ ಸ್ಥಳೀಯಾಡಳಿತಗಳು: ನವಕೇರಳ ಸಮಾವೇಶಕ್ಕೆ ಸ್ಥಳೀಯ ಸಂಸ್ಥೆಗಳಿಂದ ಹಣ ಹಂಚಿಕೆಯ ಸರ್ಕಾರದ ಆದೇಶಕ್ಕೆ ಹೈಕೋರ್ಟ್ ತಡೆ

             ಕೊಚ್ಚಿ: ನವ ಕೇರಳ ಸದಸ್‍ನ ವೆಚ್ಚಕ್ಕಾಗಿ ಸ್ಥಳೀಯಾಡಳಿತ ಸಂಸ್ಥೆಗಳಿಂದ ಹಣ ಕೇಳುವ ಪ್ರಕ್ರಿಯೆಯಲ್ಲಿ ಸರ್ಕಾರ ಹಿನ್ನಡೆ ಅನುಭವಿಸಿದೆ.

           ಪಾವತಿಸುವಂತೆ ಸೂಚಿಸಿದ್ದ ಸರ್ಕಾರದ ಆದೇಶಕ್ಕೆ ಹೈಕೋರ್ಟ್ ಏಕ ಪೀಠ ತಡೆ ನೀಡಿದೆ. ಪೌರಾಡಳಿತ ಕಾಯ್ದೆಯಡಿ ಹಣ ಹಂಚಿಕೆಗೆ ಸೂಚನೆ ನೀಡುವ ಅಧಿಕಾರ ಸರ್ಕಾರಕ್ಕೆ ಇಲ್ಲ ಎಂದು ನ್ಯಾಯಾಲಯ ಸೂಚಿಸಿದೆ.

           ನವಕೇರಳ ಸಮಾವೇಶಕ್ಕೆ ಹಣ ಮಂಜೂರು ಮಾಡಿ ಚೆಕ್ ಗೆ ಸಹಿ ಮಾಡಿರುವ ನಗರಸಭೆ ಕಾರ್ಯದರ್ಶಿಯ ಕ್ರಮ ಪ್ರಶ್ನಿಸಿ ಪರವೂರು ನಗರಸಭೆ ಸಲ್ಲಿಸಿದ್ದ ಅರ್ಜಿಯನ್ನು ಆಧರಿಸಿ ಹೈಕೋರ್ಟ್‍ನ ಈ ಕ್ರಮವಾಗಿದೆ. ಕೌನ್ಸಿಲ್ ನಿರ್ಧಾರಗಳಿಲ್ಲದೆ ಹಣವನ್ನು ಖರ್ಚು ಮಾಡಲು ಕಾರ್ಯದರ್ಶಿಗಳಿಗೆ ನೀಡಲಾದ ಅಧಿಕಾರಕ್ಕೆ ಈ ಆದೇಶ ತಡೆ ನೀಡಿದೆ. ನಗರಸಭೆಯು ಕಾಯಿದೆಯಡಿ ನಿರ್ಣಯ ಕೈಗೊಂಡರೆ ಮಾತ್ರ ನವಕೇರಳ ಸಮಾವೇಶಕ್ಕೆ ವಂತಿಗೆಯನ್ನು ನಗರಸಭೆ ನಿಧಿಯಿಂದ ಖರ್ಚು ಮಾಡಬಹುದು ಎಂದು ನ್ಯಾಯಾಲಯ ಅಭಿಪ್ರಾಯಪಟ್ಟಿದೆ.

          ನ.10ರಂದು ನವ ಕೇರಳ ಸಮಾವೇಶ ಕಾರ್ಯಕ್ರಮಕ್ಕೆ ಸ್ಥಳೀಯ ಸಂಸ್ಥೆಗಳಿಗೆ ಹಣ ಮಂಜೂರು ಮಾಡಲು ರಾಜ್ಯ ಸರ್ಕಾರ ಅನುಮತಿ ನೀಡಿತ್ತು. ಸ್ವಂತ ನಿಧಿಯಿಂದ ನಿರ್ದಿಷ್ಟ ಮೊತ್ತವನ್ನು ಖರ್ಚು ಮಾಡಲು ಅನುಮತಿ ನೀಡಲಾಗಿತ್ತು. ಐವತ್ತು ಸಾವಿರದಿಂದ ಮೂರು ಲಕ್ಷ ರೂಪಾಯಿವರೆಗೆ ಖರ್ಚು ಮಾಡಬಹುದು ಎಂದು ಸೂಚಿಸಲಾಗಿತ್ತು. ಸಂಘಟನಾ ಸಮಿತಿಯು ಅಗತ್ಯವಿದ್ದಾಗ ಪಾವತಿ ಮಾಡಬಹುದು. ಆಡಳಿತ ಮಂಡಳಿ ಅಥವಾ ಕಾರ್ಯದರ್ಶಿಗೆ ಹಣ ಮಂಜೂರು ಮಾಡಬಹುದು ಎಂದು ಸರ್ಕಾರ ತಿಳಿಸಿತ್ತು.

              ಸ್ಥಳೀಯಾಡಳಿತ ಸಂಸ್ಥೆಗಳು ತೀವ್ರ ಆರ್ಥಿಕ ಮುಗ್ಗಟ್ಟು ಎದುರಿಸುತ್ತಿರುವಾಗ ನಡೆದ ಸರ್ಕಾರದ ಈ ಕ್ರಮ ಭಾರೀ ಟೀಕೆಗೆ ಕಾರಣವಾಗಿತ್ತು.