ರಾಜ್ಯಪಾಲರಿಗೆ ಭದ್ರತೆ ಒದಗಿಸಲು ಭಾರೀ ಸಿದ್ಧತೆ: ಝಡ್ ಪ್ಲಸ್

               ತಿರುವನಂತಪುರ: ರಾಜ್ಯಪಾಲ ಆರಿಫ್ ಮುಹಮ್ಮದ್ ಖಾನ್ ಅವರಿಗೆ ಝಡ್ ಪ್ಲಸ್ ಭದ್ರತೆ ಒದಗಿಸುವ ಕೇಂದ್ರ ಗೃಹ ಸಚಿವಾಲಯದ ಅಧಿಕೃತ ಆದೇಶ ಇಂದು ಸಂಜೆ ಹೊರಬಿದ್ದಿದೆ. 

              ರಾಜ್ಯಪಾಲರ ವಿರುದ್ಧ ನಿರಂತರ ಹಿಂಸಾಚಾರ ನಡೆಯುತ್ತಿರುವ ಹಿನ್ನೆಲೆಯಲ್ಲಿ ರಾಜಭವನ ಹಾಗೂ ರಾಜ್ಯಪಾಲರ ಭದ್ರತೆಯನ್ನು ಹೆಚ್ಚಿಸಲು ಕೇಂದ್ರ ಗೃಹ ಸಚಿವಾಲಯ ನಿರ್ಧರಿಸಿದೆ. ರಾಜ್ಯದಲ್ಲಿ ಪ್ರಸ್ತುತ ಮುಖ್ಯಮಂತ್ರಿ ಪಿಣರಾಯಿ ವಿಜಯನ್ ಮಾತ್ರ ಝಡ್ ಪ್ಲಸ್ ಭದ್ರತೆ ಹೊಂದಿದ್ದಾರೆ. ಇದನ್ನು ರಾಜ್ಯಪಾಲರಿಗೂ ಅನ್ವಯಿಸಲಾಗಿದೆ. ಹೊಸ ಪ್ರಸ್ತಾವನೆಯ ಪ್ರಕಾರ, ರಾಜ್ಯಪಾಲರ ಭದ್ರತೆಯನ್ನು ಕೇಂದ್ರ ಭದ್ರತಾ ಸಂಸ್ಥೆ ಸಿಆರ್‍ಪಿಎಫ್‍ಗೆ ಹಸ್ತಾಂತರಿಸಲಾಗುವುದು. ದೆಹಲಿಯಲ್ಲಿರುವ ಸಿಆರ್‍ಪಿಎಫ್ ಪ್ರಧಾನ ಕಚೇರಿಯಲ್ಲಿ ಈ ಕುರಿತು ಸೂಚನೆ ಬಂದಿದೆ.

         ಎಸ್.ಪಿ.ಜಿ. ಭದ್ರತೆಯ ನಂತರ ಝಡ್ ಪ್ಲಸ್ ಅತ್ಯುನ್ನತ ಭದ್ರತಾ ರಕ್ಷಣೆಯಾಗಿದೆ. ಸಿಆರ್‍ಪಿಎಫ್ ಸಿಬ್ಬಂದಿಯೊಂದಿಗೆ 55 ಭದ್ರತಾ ಸಿಬ್ಬಂದಿಯನ್ನು ಸೇರಿಸಲಾಗುವುದು. ಕೇಂದ್ರ ಪಡೆಗಳು ರಾಜ್ಯಪಾಲರಿಗೆ 24 ಗಂಟೆಗಳ ಭದ್ರತೆ ಒದಗಿಸಲಿವೆ. ಗುಪ್ತಚರ ವರದಿಗಳ ಆಧಾರದ ಮೇಲೆ ಅಗತ್ಯವಿದ್ದರೆ ಭದ್ರತಾ ತಂಡವು ಎನ್ಎಸ್ಜಿ (ನ್ಯಾಷನಲ್ ಸೆಕ್ಯುರಿಟಿ ಗಾರ್ಡ್) ಕಮಾಂಡೋಗಳನ್ನು ಸಹ ಒಳಗೊಂಡಿರುತ್ತದೆ. ಇದರಲ್ಲಿ ಬುಲೆಟ್ ಫ್ರೂಫ್ ವಾಹನ ಮತ್ತು ಮೂರು ಪಾಳಿಗಳಲ್ಲಿ ಬೆಂಗಾವಲು ಇರಲಿದೆ. ಪ್ರಸ್ತುತ ದೇಶದಲ್ಲಿ 45 ಜನರು z ಪ್ಲಸ್ ಭದ್ರತಾ ವ್ಯವಸ್ಥೆಯನ್ನು ಹೊಂದಿದ್ದಾರೆ. ಪ್ರಸ್ತುತ ರಾಜ್ಯಪಾಲರ ಪೈಕಿ ಪಶ್ಚಿಮ ಬಂಗಾಳದ ರಾಜ್ಯಪಾಲ ಸಿವಿ ಆನಂದಬೋಸ್ ಮಾತ್ರ ಝಡ್ ಪ್ಲಸ್ ಭದ್ರತೆ ಹೊಂದಿದ್ದಾರೆ.

           ಸಿಆರ್‍ಪಿಎಫ್ ಭದ್ರತೆಯನ್ನು ವಹಿಸಿಕೊಂಡ ನಂತರ, ದೆಹಲಿಯ ಕೇರಳ ಹೌಸ್‍ನ ಭದ್ರತಾ ವ್ಯವಸ್ಥೆ ಸೇರಿದಂತೆ ಅಸ್ತಿತ್ವದಲ್ಲಿರುವ ಎಲ್ಲಾ ಭದ್ರತಾ ಪ್ರೊಟೋಕಾಲ್‍ಗಳಲ್ಲಿ ಬದಲಾವಣೆಗಳಾಗಲಿವೆ. ಪ್ರಸ್ತುತ ರಾಜ್ಯಪಾಲರ ಭದ್ರತೆಯ ಹೊಣೆಯನ್ನು ಕೇರಳ ಪೋಲೀಸರು ವಹಿಸಿಕೊಂಡಿದ್ದಾರೆ. ಸದ್ಯದ ಪರಿಸ್ಥಿತಿ ಗೃಹ ಇಲಾಖೆಯ ವೈಫಲ್ಯವನ್ನು ತೋರಿಸುತ್ತಿದೆ.