ಕಾಸರಗೋಡು: ಕೇರಳದ ಉತ್ತರ ಭಾಗದ ಲೋಕಸಭಾ ಕ್ಷೇತ್ರದಲ್ಲಿ ತ್ರಿಕೋನ ಸ್ಪರ್ಧೆಗೆ ವೇದಿಕೆ ಸಿದ್ಧವಾಗಿದೆ. ಕರ್ನಾಟಕದೊಂದಿಗೆ ಗಡಿ ಹಂಚಿಕೊಂಡಿರುವ ಕ್ಷೇತ್ರದಲ್ಲಿ ಎನ್ ಡಿಎ ಅಭ್ಯರ್ಥಿಯಾಗಿ ಮೊದಲ ಬಾರಿಗೆ ಮಹಿಳಾ ಅಭ್ಯರ್ಥಿಯಾಗಿ ಎಂ.ಎಲ್. ಅಶ್ವಿನಿ ಕಣದಲ್ಲಿದ್ದಾರೆ. ಮಹಿಳಾ ಮತದಾರರ ಸ್ಥಾನವೇ ನಿರ್ಣಾಯಕವಾಗಿರುವ ಕ್ಷೇತ್ರ ಇದಾಗಿದೆ.
ಹಲವು ಸಕಾರಾತ್ಮಕ ಕಾರಣಗಳಿಗಾಗಿ ಎನ್‍ಡಿಎ ಐತಿಹಾಸಿಕ ಗೆಲುವಿನ ನಿರೀಕ್ಷೆಯಲ್ಲಿದೆ. ಯುಡಿಎಫ್‍ನಲ್ಲಿ ಕಾಂಗ್ರೆಸ್‍ನ ಹಾಲಿ ಸಂಸದ ರಾಜಮೋಹನ್ ಉಣ್ಣಿತ್ತಾನ್ ಮತ್ತು ಎಲ್‍ಡಿಎಫ್‍ನಲ್ಲಿ ಸಿಪಿಎಂ ಜಿಲ್ಲಾ ಕಾರ್ಯದರ್ಶಿ ಬಾಲಕೃಷ್ಣನ್ ಕಣದಲ್ಲಿದ್ದಾರೆ.
2019ರ ಲೋಕಸಭೆ ಚುನಾವಣೆಯಲ್ಲಿ ರಾಜಮೋಹನ್ ಉಣ್ಣಿತ್ತಾನ್ ಅವರು ಸಿಪಿಐಎಂನ ಕೆ.ಪಿ.ಸತೀಶ್ ಚಂದ್ರನ್ ಅವರನ್ನು 40438 ಮತಗಳಿಂದ ಪರಾಭವಗೊಳಿಸಿದ್ದರು. ಅಂದು ಎನ್ ಡಿಎ ಅಭ್ಯರ್ಥಿ ರವೀಶ ತಂತ್ರಿ ಕುಂಟಾರ್ ಒಂದೂ ಮುಕ್ಕಾಲು ಲಕ್ಷಕ್ಕೂ ಅಧಿಕ ಮತ ಗಳಿಸಿದ್ದರು. ಕಳೆದ 35 ವರ್ಷಗಳಲ್ಲಿ 2019ರಲ್ಲಿ ಮೊದಲ ಬಾರಿಗೆ ಎಡಪಕ್ಷ ಸೋಲುಂಡಿತ್ತು. ಈ ಕ್ಷೇತ್ರವು ಮಂಜೇಶ್ವರ, ಕಾಸರಗೋಡು, ಉದುಮ, ಕಾಞಂಗಾಡ್ ಮತ್ತು ತ್ರಿಕರಿಪುರ ವಿಧಾನಸಭಾ ಕ್ಷೇತ್ರಗಳನ್ನು ಮತ್ತು ಕಣ್ಣೂರು ಜಿಲ್ಲೆಯ ಭಾಗವಾಗಿರುವ ಕಲ್ಲ್ಯಸ್ಸೇರಿ ಮತ್ತು ಪಯ್ಯನ್ನೂರು ವಿಧಾನಸಭಾ ಕ್ಷೇತ್ರಗಳನ್ನು ಒಳಗೊಂಡಿದೆ.
ಎನ್‍ಡಿಎ ಅಭ್ಯರ್ಥಿ ಎಂ.ಎಲ್. ಅಶ್ವಿನಿ ಮಹಿಳಾಮೋರ್ಚಾ ನಾಯಕಿ ಮತ್ತು ಮಂಜೇಶ್ವರ ಬ್ಲಾಕ್‍ನ ಕಡಂಬಾರ್ ವಿಭಾಗದ ಪ್ರತಿನಿಧಿ. ಬ್ಲಾಕ್ ಪಂಚಾಯಿತಿ ಹಣಕಾಸು ಸ್ಥಾಯಿ ಸಮಿತಿ ಸದಸ್ಯೆ.
ಕೊಲ್ಲಂ ಜಿಲ್ಲೆಯ ಕಿಲಿಕೊಲ್ಲೂರಿನವರಾದ ಹಾಲಿ ಸಂಸದ ರಾಜಮೋಹನ್ ಉಣ್ಣಿತ್ತಾನ್ ಅವರು ಎಐಸಿಸಿ ಸದಸ್ಯರಾಗಿದ್ದಾರೆ. ಅವರು ಪಕ್ಷದ ವಕ್ತಾರರಾಗಿದ್ದರು. ಇಲ್ಲಿ ಸ್ಪರ್ಧಿಸುತ್ತಿರುವುದು ಇದು ಎರಡನೇ ಬಾರಿ.
ಸಿಪಿಎಂ ಅಭ್ಯರ್ಥಿ ಎಂ.ವಿ. ಬಾಲಕೃಷ್ಣನ್ ಅವರು ಪಕ್ಷದ ಮಾಜಿ ಕಾಸರಗೋಡು ಜಿಲ್ಲಾ ಕಾರ್ಯದರ್ಶಿ ಮತ್ತು ರಾಜ್ಯ ಸಮಿತಿ ಸದಸ್ಯರಾಗಿದ್ದಾರೆ. ಇವರು ಮೂಜಕೊಂನವರಾಗಿದ್ದು, ನಿವೃತ್ತ ಶಿಕ್ಷಕ. ಲೋಕಸಭೆಗೆ ಸ್ಪರ್ಧಿಸುತ್ತಿರುವುದು ಇದೇ ಮೊದಲು.
ಕ್ಷೇತ್ರದಲ್ಲಿ ಆರೋಗ್ಯ ಮತ್ತು ಶಿಕ್ಷಣ ಕ್ಷೇತ್ರದ ಹಿನ್ನಡೆ ಈಗಾಗಲೇ ಚರ್ಚೆಗೆ ಗ್ರಾಸವಾಗಿದೆ. ಈ ಹಿಂದೆ ಪ್ರತಿನಿಧಿಸಿದ್ದ ಎಡ ಮತ್ತು ಬಲ ಸಂಸದರು ಕ್ಷೇತ್ರವನ್ನು ಸರಿಯಾಗಿ ನಡೆಸಿಕೊಂಡಿಲ್ಲ. ಚಿಕಿತ್ಸೆ ಮತ್ತು ಶಿಕ್ಷಣಕ್ಕಾಗಿ ಇಂದಿಗೂ ಜನರು ಮಂಗಳೂರಿನನ್ನೇ ಅವಲಂಬಿಸಿದ್ದಾರೆ. ಗೆದ್ದರೆ ಕಾಸರಗೋಡಿನಲ್ಲಿ ಎಲ್ಲ ವೈದ್ಯಕೀಯ ಸೌಲಭ್ಯಗಳನ್ನು ಒದಗಿಸುವ ಏಮ್ಸ್ ತರುವುದು ಅಶ್ವಿನಿ ಎಂ.ಎಲ್.ಬೊಟ್ಟುಮಾಡಿರುವ ಭರವಸೆಯಾಗಿದೆ. ನರೇಂದ್ರ ಮೋದಿ ಸರ್ಕಾರದ ಅಭಿವೃದ್ಧಿ ಸಾಧನೆಗಳು ಮತ್ತು ಕಲ್ಯಾಣ ಯೋಜನೆಗಳು ಎನ್‍ಡಿಎ ಪರವಾಗಿ ತಿರುಗುತ್ತವೆ ಎಂದು ನಾಯಕರು ಮತ್ತು ಕಾರ್ಯಕರ್ತರು ದೃಢವಾದ ವಿಶ್ವಾಸ ಹೊಂದಿದ್ದಾರೆ. ಕ್ಷೇತ್ರದಲ್ಲಿ ಮಹಿಳಾ ಅಭ್ಯರ್ಥಿಯೊಬ್ಬರು ಸ್ಪರ್ಧಿಸುತ್ತಿರುವುದು ಇತಿಹಾಸದಲ್ಲೇ ಮೊದಲಿಗರಾಗಿದ್ದು, ಮಹಿಳೆಯನ್ನು ಗೆಲ್ಲಿಸಬೇಕು ಎಂಬುದು ಪಕ್ಷದ ಮನವಿಯಾಗಿದೆ.
ಕಳೆದ ಚುನಾವಣೆಯಲ್ಲಿ ರಾಜಮೋಹನ್ ಉಣ್ಣಿತ್ತಾನ್ 474,961 (43%) ಮತಗಳನ್ನು ಗಳಿಸಿದರೆ, ಸಿಪಿಎಂನ ಕೆ.ಪಿ. ಸತೀಶ್ಚಂದ್ರನ್ 434,523 (40%) ಮತಗಳನ್ನು ಗಳಿಸಿದರು ಮತ್ತು ಬಿಜೆಪಿಯ ರವೀಶ ತಂತ್ರಿ ಕುಂಟಾರ್ 176,049 (16%) ಮತಗಳನ್ನು ಪಡೆದಿದ್ದರು.
ಜಿಲ್ಲೆಯ ಐದು ವಿಧಾನಸಭಾ ಕ್ಷೇತ್ರಗಳಿಂದ 10,51,111 ಮತದಾರರು. ಅನಿವಾಸಿಗಳು ಸೇರಿದಂತೆ 5,13,579 ಪುರುಷರು ಮತ್ತು 5,37525 ಮಹಿಳೆಯರು ಮತದಾರಪಟ್ಟಿಯಲ್ಲಿದ್ದಾರೆ. ತೃತೀಯಲಿಂಗಿ ವರ್ಗದಿಂದ ಏಳು ಜನರು ಇದ್ದಾರೆ.
ಅಭಿಮತ: ಆಯ್ಕೆಯಾದರೆ ಎಡಪಂಥೀಯರು ಮತ್ತು ಬಲಪಂಥೀಯರು ಪರ್ಯಾಯವಾಗಿ ಆಡಳಿತ ನಡೆಸುತ್ತಿರುವ ಕಾಸರಗೋಡಿನ ಅಭಿವೃದ್ಧಿಯಲ್ಲಿ ಹಿಂದುಳಿದಿರುವಿಕೆಯನ್ನು ನಿವಾರಿಸಲು ಮುಂದಾಗಲಾಗುವುದು. ನಿರ್ದಿಷ್ಟವಾಗಿ, ಇದು ಆರೋಗ್ಯ ಮತ್ತು ಶಿಕ್ಷಣ ಕ್ಷೇತ್ರದ ಪ್ರಗತಿಯನ್ನು ಖಚಿತಪಡಿಸುತ್ತದೆ. 2014ರಲ್ಲಿ ಮೋದಿ ಸರ್ಕಾರ ಅಧಿಕಾರಕ್ಕೆ ಬಂದ ನಂತರ ದೇಶದಲ್ಲಿ ದೊಡ್ಡ ಬದಲಾವಣೆಗಳಾಗಿವೆ. ಆದರೆ ನಮ್ಮ ಪ್ರದೇಶದ ರಾಜಕೀಯ ವಾತಾವರಣದಿಂದ ನಾವು ಇದರಲ್ಲಿ ಬಹಳಷ್ಟು ಕಳೆದುಕೊಳ್ಳುತ್ತಿದ್ದೇವೆ. ಜನರು ಇದನ್ನು ಅರ್ಥಮಾಡಿಕೊಳ್ಳುತ್ತಾರೆ. ಕಾಸರಗೋಡಿನ ಜನರು ಸಹ ಇತರ ರಾಜ್ಯಗಳಂತೆಯೇ ಅಭಿವೃದ್ಧಿಯನ್ನು ಬಯಸುತ್ತಾರೆ. ಆದ್ದರಿಂದ ಈ ಬಾರಿ ಈ ದೇಶದ ಜನತೆ ಎನ್ ಡಿಎಯನ್ನು ಗೆಲ್ಲಿಸುತ್ತಾರೆ.
ಅಭಿಮತ:2)
‘ಕಳೆದ ಬಾರಿ ಸೋತಿದ್ದ ಕಾಸರಗೋಡು ಲೋಕಸಭಾ ಕ್ಷೇತ್ರವನ್ನು ಈ ಬಾರಿ ಹಿಂಪಡೆಯುತ್ತೇವೆ. ಯುಡಿಎಫ್ ಪ್ರತಿನಿಧಿ ಕಳೆದ ಐದು ವರ್ಷಗಳಿಂದ ಸಂಸದರಾಗಿ ಸಂಪೂರ್ಣ ವಿಫಲರಾಗಿದ್ದಾರೆ. ರಾಜ್ಯಾದ್ಯಂತ ಎಲ್‍ಡಿಎಫ್‍ಗೆ ಅನುಕೂಲಕರ ಪರಿಸ್ಥಿತಿ ಇರುವುದರಿಂದ ಕ್ಷೇತ್ರದಲ್ಲೂ ಗೆಲುವಿನ ಹಾದಿ ಸುಗಮವಾಗಲಿದೆ.
ಎಂ.ವಿ. ಬಾಲಕೃಷ್ಣನ್ ಮಾಸ್ತರ್(ಸಿಪಿಐಎಂ-ಎಲ್.ಡಿ.ಎಫ್)
ಅಭಿಮತ:3)
ಯುಡಿಎಫ್ ಉತ್ತಮ ಬಹುಮತದೊಂದಿಗೆ ಕ್ಷೇತ್ರವನ್ನು ಉಳಿಸಿಕೊಳ್ಳಲಿದೆ: ಐದು ವರ್ಷಗಳಿಂದ ಕ್ಷೇತ್ರದ ಅಭಿವೃದ್ಧಿಗೆ ನಡೆಸಿದ ಚಟುವಟಿಕೆಗಳನ್ನು ಮತಗಳಾಗಿ ಪರಿವರ್ತಿಸಲಾಗುವುದು. ಕೇಂದ್ರ ಹಾಗೂ ರಾಜ್ಯ ಸರ್ಕಾರಗಳ ವಿರುದ್ಧ ಜನಸಾಮಾನ್ಯರ ಭಾವನೆಯಿಂದ ಕ್ಷೇತ್ರದಲ್ಲೂ ಯುಡಿಎಫ್ ಗೆ ಅನುಕೂಲಕರ ಪರಿಸ್ಥಿತಿ ನಿರ್ಮಾಣವಾಗಲಿದೆ.
ರಾಜಮೋಹನ್ ಉಣ್ಣಿತ್ತಾನ್
(ಹಾಲಿ ಸಂಸದ,ಯುಡಿಎಫ್)
DOCTYPE html>
