ತ್ರೈಮಾಸಿಕ ಲಾಭ 76% ಹೆಚ್ಚಳ: 300% ಲಾಭಾಂಶ : ಅದಾನಿ ಕಂಪನಿ

              ಮುಂಬೈ: ಗೌತಮ್ ಅದಾನಿ ಗ್ರೂಪ್ ಕಂಪನಿಯಾದ ಅದಾನಿ ಪೋರ್ಟ್ಸ್ ಆಯಂಡ್​ ಸ್ಪೇಷಲ್​ ಎಕನಾಮಿಕ್​ ಝೋನ್​ ಲಿಮಿಟೆಡ್​ (APSEZ) ನಿವ್ವಳ ಲಾಭವು 2023-24ನೇ ಹಣಕಾಸು ವರ್ಷದ ಜನವರಿ-ಮಾರ್ಚ್ ತ್ರೈಮಾಸಿಕದಲ್ಲಿ ಶೇಕಡಾ 76.87 ಹೆಚ್ಚಾಗಿದೆ. ಈ ತ್ರೈಮಾಸಿಕದಲ್ಲಿ ಲಾಭ 2,014.77 ಕೋಟಿ ರೂ. ಆಗಿದೆ. ಕಳೆದ ಹಣಕಾಸು ವರ್ಷದ ಇದೇ ಅವಧಿಯಲ್ಲಿ ಕಂಪನಿಯು ರೂ. 1,139.07 ಕೋಟಿ ಲಾಭ ಗಳಿಸಿತ್ತು.

          2023-24ರ ಆರ್ಥಿಕ ವರ್ಷದ ನಾಲ್ಕನೇ ತ್ರೈಮಾಸಿಕದಲ್ಲಿ ಈ ಲಾಜಿಸ್ಟಿಕ್ಸ್ ಕಂಪನಿಯ ಒಟ್ಟು ಆದಾಯವು 7,199.94 ಕೋಟಿ ರೂ.ಗೆ ಏರಿಕೆಯಾಗಿದೆ ಎಂದು ಷೇರು ಮಾರುಕಟ್ಟೆಗೆ ಅದಾನಿ ಪೋರ್ಟ್ಸ್ ಮಾಹಿತಿ ನೀಡಿದೆ, ಇದು ಒಂದು ವರ್ಷದ ಹಿಂದೆ ಇದೇ ಅವಧಿಯಲ್ಲಿ 6,178.35 ಕೋಟಿ ರೂ. ಇತ್ತು. ತ್ರೈಮಾಸಿಕದಲ್ಲಿ ಒಟ್ಟು ವೆಚ್ಚಗಳು 4,450.52 ಕೋಟಿ ರೂ.ಗೆ ಏರಿಕೆಯಾಗಿದ್ದು, ವರ್ಷದ ಹಿಂದೆ ಇದೇ ತ್ರೈಮಾಸಿಕದಲ್ಲಿ ಈ ಮೊತ್ತವು 3,995 ಕೋಟಿ ರೂ. ಇತ್ತು.

          ಅದಾನಿ ಪೋರ್ಟ್ಸ್ ಮಂಡಳಿಯು 2023-24 ರ ಹಣಕಾಸು ವರ್ಷಕ್ಕೆ ರೂ 6 (300%) ಲಾಭಾಂಶವನ್ನು ಘೋಷಿಸಿದೆ. ಈ ಡಿವಿಡೆಂಡ್ ಪ್ರಸ್ತಾವನೆಯು ಮುಂಬರುವ ವಾರ್ಷಿಕ ಸರ್ವಸಾಧಾರಣ ಸಭೆ (AGM) ಯಲ್ಲಿ ಷೇರುದಾರರ ಅನುಮೋದನೆಗೆ ಒಳಪಟ್ಟಿರುತ್ತದೆ.

           ಅದಾನಿ ಪೋರ್ಟ್ಸ್‌ನ ಷೇರಿನ ಬೆಲೆ 1338.80 ರೂ. ಆಗಿದೆ. ಇದು ಹಿಂದಿನ ದಿನಕ್ಕಿಂತ 1.05% ಏರಿಕೆಯಾಗಿದೆ. ಏಪ್ರಿಲ್ 2024 ರಲ್ಲಿ ಈ ಷೇರಿನ ಬೆಲೆ 1,424.95 ರೂ. ಇತ್ತು. ಇದು ಈ ಷೇರಿನ 52 ವಾರಗಳ ಗರಿಷ್ಠ ಬೆಲೆಯಾಗಿದೆ.

              ಈ ಕಂಪನಿಯು ಏಪ್ರಿಲ್‌ನಲ್ಲಿ 3.62 ಕೋಟಿ ಮೆಟ್ರಿಕ್ ಟನ್ (MMT) ಸರಕು ಸಾಗಣೆಯನ್ನು ನಿರ್ವಹಿಸಿದೆ. ಕಳೆದ ವರ್ಷ ಇದೇ ಅವಧಿಗೆ ಹೋಲಿಸಿದರೆ ಇದು ಶೇಕಡಾ 12 ರಷ್ಟು ಹೆಚ್ಚಾಗಿದೆ.

ಹೆಚ್ಚಿನ ದೇಶೀಯ ಬಂದರುಗಳಲ್ಲಿ ಬೆಳವಣಿಗೆಯನ್ನು ದಾಖಲಿಸಲಾಗಿದೆ ಎಂದು ಕಂಪನಿ ಹೇಳಿದೆ, ಧಮ್ರಾ ಬಂದರು 43.8 ಲಕ್ಷ ಮೆಟ್ರಿಕ್ ಟನ್‌ಗಳ ಮಾಸಿಕ ಸರಕು ನಿರ್ವಹಣೆಯನ್ನು ನಿರ್ವಹಿಸುತ್ತಿದೆ. ಲಾಜಿಸ್ಟಿಕ್ಸ್ ವಿಭಾಗದಲ್ಲಿ ಬೆಳವಣಿಗೆ ಮುಂದುವರಿದಿದೆ ಎಂದು ಕೈಗಾರಿಕೋದ್ಯಮಿ ಗೌತಮ್ ಅದಾನಿ ಅವರ ಕಂಪನಿ ಹೇಳಿದೆ.

             ಅದಾನಿ ಗ್ರೂಪ್‌ನ ಭಾಗವಾದ APSEZ ಭಾರತದಲ್ಲಿನ ಅತಿದೊಡ್ಡ ಪೋರ್ಟ್ ಡೆವಲಪರ್ ಮತ್ತು ಆಪರೇಟರ್ ಆಗಿದೆ.