ಪೋಲೀಸ್ ಇಲಾಖೆಯೊಳಗಿನ ಶೀತಲ ಸಮರ: ಬಲಿಪಶುವಾಗಿದ್ದ ಪಿ ವಿಜಯನ್ ಎಡಿಜಿಪಿಯಾಗಿ ಬಡ್ತಿ

             ತಿರುವನಂತಪುರಂ: ಐಜಿಪಿ ವಿಜಯನ್ ಎಡಿಜಿಪಿಯಾಗಿ ಬಡ್ತಿ ಪಡೆದಿದ್ದಾರೆ. ಇಲಾಖಾ ಪ್ರಕ್ರಿಯೆಗಳು ಪೂರ್ಣಗೊಳ್ಳುವುದರೊಂದಿಗೆ ಪೋಲೀಸ್ ಅಕಾಡೆಮಿಯ ನಿರ್ದೇಶಕರಿಗೂ ಉಸ್ತುವಾರಿ ನೀಡಲಾಯಿತು.

                  ಈ ಹಿಂದೆ ಎಲತ್ತೂರು ಬೆಂಕಿ ಹಚ್ಚಿದ ಪ್ರಕರಣದ ಆರೋಪಿಗಳ ಪ್ರಯಾಣದ ವಿವರವನ್ನು ಮಾಧ್ಯಮಗಳಿಗೆ ಸೋರಿಕೆ ಮಾಡಿದ ಆರೋಪದ ಮೇಲೆ ಅವರನ್ನು ಅಮಾನತುಗೊಳಿಸಲಾಗಿತ್ತು.

                 ಕಾನೂನು ಮತ್ತು ಸುವ್ಯವಸ್ಥೆಯ ಎಡಿಜಿಪಿ ಎಂ.ಆರ್.ಅಜಿತ್‍ಕುಮಾರ್ ಅವರ ವರದಿಯ ಪ್ರಕಾರ, ಭಯೋತ್ಪಾದನಾ ನಿಗ್ರಹ ದಳದ ಮುಖ್ಯಸ್ಥರಾಗಿದ್ದ ಪಿ.ವಿಜಯನ್ ಅವರನ್ನು ಕಳೆದ ವರ್ಷ ಮೇ ತಿಂಗಳಲ್ಲಿ ಅಮಾನತುಗೊಳಿಸಲಾಗಿತ್ತು. ವಿವರಣೆಯನ್ನೂ ಕೇಳದೆ ಕ್ರಮ ಕೈಗೊಳ್ಳಲಾಗಿತ್ತು.

                    ಆದರೆ ಅಮಾನತಿಗೆ ಆಧಾರವಾಗಿರುವ ಕಾರಣಗಳು ಸುಳ್ಳು ಎಂದು ವಿಜಯನ್ ಸರ್ಕಾರಕ್ಕೆ ಉತ್ತರಿಸಿದರು. ಮುಖ್ಯ ಕಾರ್ಯದರ್ಶಿ ಡಾ.ಕೆ.ವೇಣು ನೇತೃತ್ವದ ಸಮಿತಿ ಎರಡು ತಿಂಗಳ ನಂತರ ವಿಜಯನ್ ಅವರನ್ನು ಮರುಸೇರ್ಪಡೆಸಿ ಇಲಾಖಾ ವಿಚಾರಣೆ ಮುಂದುವರಿಸುವಂತೆ ಶಿಫಾರಸು ಮಾಡಿದ್ದರೂ ಸರ್ಕಾರ ಯಾವುದೇ ಸಕಾರಾತ್ಮಕ ಕ್ರಮ ಕೈಗೊಂಡಿರಲಿಲ್ಲ. ಮುಖ್ಯ ಕಾರ್ಯದರ್ಶಿ ಅಧ್ಯಕ್ಷತೆಯ ಸಮಿತಿಯು ಸೆಪ್ಟೆಂಬರ್‍ನಲ್ಲಿ ವಿಜಯನ್ ಅವರನ್ನು ಮತ್ತೆ ವಾಪಸ್ ಕರೆಸಿಕೊಳ್ಳಬೇಕು ಎಂದು ವರದಿ ನೀಡಿತ್ತು.

                  ನಂತರ ನವೆಂಬರ್‍ನಲ್ಲಿ ಮುಖ್ಯಮಂತ್ರಿಗಳು ಅಮಾನತು ಹಿಂಪಡೆದು ಆದೇಶ ಹೊರಡಿಸಿದ್ದರು, ಆದರೆ ಇಲಾಖಾ ವಿಚಾರಣೆ ನಡೆಯುತ್ತಿರುವುದರಿಂದ ಅವರಿಗೆ ಉಸ್ತುವಾರಿ ನೀಡಿರಲಿಲ್ಲ. ಇದಾದ ನಂತರವೇ ತಡೆಹಿಡಿದ ಬಡ್ತಿ ಸೇರಿದಂತೆ ಹೊಸ ಹುದ್ದೆ ನೀಡಲಾಗಿದೆ.

               ಉನ್ನತ ಪೋಲೀಸ್ ಅಧಿಕಾರಿಗಳ ನಡುವಿನ ಜಗಳದಿಂದ ವಿಜಯನ್ ಅಮಾನತು ಮಾಡಲಾಗಿದೆ ಎಂದು ಆರೋಪಿಸಲಾಗಿದೆ. ಪಿ.ವಿಜಯನ್ 1999ರ ಬ್ಯಾಚ್ ನ ಐಪಿಎಸ್ ಅಧಿಕಾರಿ.