ಐದು ತಿಂಗಳುಗಳಿಂದ ಪಿಂಚಣಿ ಲಭಿಸದೆ ಸಂಕಷ್ಟದಲ್ಲಿ ನಿವೃತ್ತ ಅಂಗನವಾಡಿ ನೌಕರರು

            ತಿರುವನಂತಪುರಂ: ನಿವೃತ್ತ ಅಂಗನವಾಡಿ ಕಾರ್ಯಕರ್ತೆಯರು ಹಾಗೂ ಸಹಾಯಕಿಯರ ಮಾಸಿಕ ಪಿಂಚಣಿ ಸ್ಥಗಿತಗೊಂಡು ಐದು ತಿಂಗಳಾಗಿದೆ.

             ಅತ್ಯಲ್ಪ ಪಿಂಚಣಿಯಿಂದ ಜೀವನ ಮುಸ್ಸಂಜೆಯಲ್ಲಿ ಕಾಯಿಲೆ, ವೃದ್ಧಾಪ್ಯದಿಂದ ನರಳುವ ನೂರಾರು ಮಂದಿಗೆ ಔಷದೋಪಚಾರ, ದಿನನಿತ್ಯದ ಖರ್ಚಿಗೂ ದಾರಿ ಇಲ್ಲದಂತಾಗಿದೆ.

            1992 ರಲ್ಲಿ ರಚನೆಯಾದ ಕೇರಳ ಅಂಗನವಾಡಿ ಕಾರ್ಯಕರ್ತೆಯರು ಮತ್ತು ಸಹಾಯಕಿಯರ ಕಲ್ಯಾಣ ಮಂಡಳಿಯಲ್ಲಿ ಸಂಗ್ರಹವಾದ ನಿಧಿಯಿಂದ ಪಿಂಚಣಿ ವಿತರಿಸಲಾಗುತ್ತದೆ. ಕ್ಷೇಮ ನಿಧಿಯಲ್ಲಿ ಸರ್ಕಾರದ ಪಾಲಿನ ಬಾಕಿ ಇರುವ ಕಾರಣ ಪಿಂಚಣಿ ವಿತರಣೆ ಸ್ಥಗಿತಗೊಂಡಿದೆ ಎಂದು ಸೂಚಿಸಲಾಗಿದೆ. 10 ವರ್ಷ ಅಥವಾ ಅದಕ್ಕಿಂತ ಹೆಚ್ಚು ಕಾಲ ಅಂಗನವಾಡಿ ಕಾರ್ಯಕರ್ತೆ/ಸಹಾಯಕಿ ಹುದ್ದೆಯಲ್ಲಿ ಕೆಲಸ ಮಾಡಿದ ಮತ್ತು ಕಲ್ಯಾಣ ನಿಧಿಯ ಸದಸ್ಯರಾಗಿರುವ ಮತ್ತು ಕ್ಷೇಮಾಭಿವೃದ್ಧಿ ವಂತಿಗೆ ಪಾವತಿಯಲ್ಲಿ ಲೋಪ ಎಸಗದ ನೌಕರರಿಗೆ 62 ವರ್ಷ ತುಂಬಿದ ದಿನಾಂಕದಿಂದ ಪಿಂಚಣಿ ಲಭ್ಯವಾಗುತ್ತದೆ. 

            ಪಿಂಚಣಿ ಮೊತ್ತವು ಕಾರ್ಮಿಕರಿಗೆ 2500 ರೂ. ಮತ್ತು ಸಹಾಯಕರಿಗೆ 1500 ರೂ. ಅಂಗನವಾಡಿ ನೌಕರರಿಗೆ ಪಿಂಚಣಿ ಯೋಜನೆಯನ್ನು 2010ರ ಆಗಸ್ಟ್‍ನಲ್ಲಿ ದೀರ್ಘ ಕಾಲದ ಗದ್ದಲದ ನಂತರ ಆರಂಭಿಸಲಾಯಿತು. ಪಿಂಚಣಿ ವಿತರಣೆಯಲ್ಲಿ ಏಕರೂಪತೆ ಇಲ್ಲ ಎಂಬ ದೂರುಗಳಿದ್ದು,  ರಾಜ್ಯದಲ್ಲಿ ಜಿಲ್ಲಾವಾರು ಪಿಂಚಣಿ ವಿತರಣೆ ನಡೆಯುತ್ತಿದೆ.

          ಯಾವ ಜಿಲ್ಲೆಯಲ್ಲೂ ಪಿಂಚಣಿ ವಿತರಣೆ ಪೂರ್ಣಗೊಂಡಿಲ್ಲ. ಕ್ಷೇಮ ನಿಧಿ ಕಚೇರಿಯಲ್ಲಿ ವಿಚಾರಿಸಿದಾಗ ಲೈಫ್ ಸರ್ಟಿಫಿಕೇಟ್ ಸಿಕ್ಕಿಲ್ಲ ಎಂಬ ಕುಂಟು ನೆಪ ಹೇಳುತ್ತಿದ್ದಾರೆ ಎನ್ನುತ್ತಾರೆ ಪಿಂಚಣಿದಾರರು. ಐಸಿಡಿಎಸ್ ಕಚೇರಿ, ಬ್ಯಾಂಕ್ ಗಳಿಗೆ ಹೋಗಿ ಬರಲು ಸುಸ್ತಾಗಿದ್ದು, ಸಕಾಲಕ್ಕೆ ಜೀವಿತ ಪ್ರಮಾಣ ಪತ್ರ ನೀಡಿದರೂ ಜೀವನ ಸಾಗಿಸಲು ಪರದಾಡುವಂತಾಗಿದೆ ಎನ್ನುತ್ತಾರೆ ಪಿಂಚಣಿದಾರರು.