ಗಲ್ಫ್‌ನಲ್ಲಿ 87 ಲಕ್ಷಕ್ಕೂ ಹೆಚ್ಚು ಭಾರತೀಯ ಕಾರ್ಮಿಕರು.. 4 ವರ್ಷದಲ್ಲಿ 29ಸಾವಿರ ಮಂದಿ ಮೃತ್ಯು!

             ನವದೆಹಲಿ: ಕುವೈತ್‌ನ ಕಟ್ಟಡವೊಂದರಲ್ಲಿ ಬುಧವಾರ ಬೆಂಕಿ ಕಾಣಿಸಿಕೊಂಡು ಸಾವನ್ನಪ್ಪಿದ 49 ವಿದೇಶಿ ಕಾರ್ಮಿಕರಲ್ಲಿ 40 ಭಾರತೀಯರು. ಕಳೆದ ನಾಲ್ಕು ವರ್ಷಗಳಲ್ಲಿ 29,000 ಕ್ಕೂ ಹೆಚ್ಚು ಜನರು ತಮ್ಮ ಪ್ರಾಣ ಕಳೆದುಕೊಂಡಿದ್ದು, ಅಧಿಕ ಸಂಬಳದ ಆಸೆಗಾಗಿ ಗಲ್ಫ್ ದೇಶಗಳಿಗೆ ತೆರಳುವ ಭಾರತೀಯರಿಗೆ ಮುಂದುವರಿದ ಈ ಆರೂ ದೇಶಗಳು ಸುರಕ್ಷಿತವೇ ಎಂಬ ಪ್ರಶ್ನೆ ಎದ್ದಿದೆ.

            ಗಲ್ಫ್ ದೇಶಗಳಲ್ಲಿ 87 ಲಕ್ಷಕ್ಕೂ ಹೆಚ್ಚು ಭಾರತೀಯರು ವಾಸಿಸುತ್ತಿದ್ದಾರೆ. ಯುನೈಟೆಡ್ ಅರಬ್ ಎಮಿರೇಟ್ಸ್‌ನಲ್ಲಿ ಹೆಚ್ಚಿನ ಸಂಖ್ಯೆ ಅಂದರೆ 35 ಲಕ್ಷ ಭಾರತೀಯರಿದ್ದಾರೆ. ಕಳೆದ ದಶಕದಲ್ಲಿ ಆರು ಗಲ್ಫ್ ರಾಷ್ಟ್ರಗಳಲ್ಲಿ 63,000 ಕ್ಕೂ ಹೆಚ್ಚು ಭಾರತೀಯ ವಲಸೆ ಕಾರ್ಮಿಕರು ಸಾವನ್ನಪ್ಪಿದ್ದಾರೆ.

              2022 ರ ಡಿಸೆಂಬರ್ 9ರಂದು ಲೋಕಸಭೆಯ ಪ್ರಶ್ನೋತ್ತರ ಅವಧಿಯಲ್ಲಿ ಸಲ್ಲಿಸಿದ ವಿವರಗಳ ಪ್ರಕಾರ, ಗಲ್ಫ್ ರಾಷ್ಟ್ರಗಳಲ್ಲಿ ಒಟ್ಟು ಭಾರತೀಯರ ಸಂಖ್ಯೆ 87,51,086. ಅದರಲ್ಲಿ, ಯುಎಇ ಮಾತ್ರ 35,54,274 ಭಾರತೀಯರನ್ನು ಹೊಂದಿದೆ. ಸೌದಿ ಅರೇಬಿಯಾದಲ್ಲಿ 24,65,464, ಕತಾರ್ 8,44,499 ಭಾರತೀಯರನ್ನು ಹೊಂದಿದ್ದರೆ ಕುವೈತ್ ಮತ್ತು ಓಮನ್ ಕ್ರಮವಾಗಿ 9,24,687 ಮತ್ತು 6,53,500 ಭಾರತೀಯರನ್ನು ಹೊಂದಿದೆ. ಬಹ್ರೇನ್ 3,08,662 ಭಾರತೀಯ ಜನಸಂಖ್ಯೆಯನ್ನು ಹೊಂದಿದೆ.

1970 ರ ದಶಕದ ತೈಲ ಉತ್ಕರ್ಷದ ನಂತರ ಗಲ್ಫ್ ರಾಷ್ಟ್ರಗಳಿಗೆ ಭಾರತೀಯ ಕಾರ್ಮಿಕರ ವಲಸೆ ಹೆಚ್ಚಾಯಿತು. ಅಲ್ಲಿನ ಆರ್ಥಿಕ ಬೆಳವಣಿಗೆಯೊಂದಿಗೆ ಭಾರತೀಯರ ಜನಸಂಖ್ಯೆಯೂ ಹೆಚ್ಚುತ್ತಲೇ ಇತ್ತು. ಗಲ್ಫ್ ರಾಷ್ಟ್ರಗಳು ಸಹ ದಕ್ಷಿಣ ಏಷ್ಯಾದ ಕೆಲಸಗಾರರನ್ನು ನೇಮಕ ಮಾಡಿಕೊಳ್ಳಲು ಆದ್ಯತೆ ನೀಡಿವೆ. ಏಕೆಂದರೆ ಕಡಿಮೆ ಸಂಭಾವನೆ, ಕಡಿಮೆ ಕೌಶಲ್ಯದ ಉದ್ಯೋಗಗಳನ್ನು ಸ್ವೀಕರಿಸಲು ಸಿದ್ಧರಾಗಿದ್ದಾರೆ.

              ಪ್ರಸ್ತುತ 70 ಪ್ರತಿಶತ ಭಾರತೀಯರು ನಿರ್ಮಾಣ ಕ್ಷೇತ್ರದಲ್ಲಿ ಕಾರ್ಮಿಕರು ಅಥವಾ ತಂತ್ರಜ್ಞರಾಗಿ ಅಥವಾ ಗೃಹ ಸೇವಕರು ಮತ್ತು ಚಾಲಕರಾಗಿ ಕೆಲಸ ಮಾಡುತ್ತಿದ್ದಾರೆ. ಆದಾಗ್ಯೂ, ಕಳೆದ ಒಂದು ದಶಕದಲ್ಲಿ ನುರಿತ ಮತ್ತು ಹೆಚ್ಚು ನುರಿತ ಭಾರತೀಯರ ವಲಸೆ ಹೆಚ್ಚುತ್ತಿದೆ.

             ಭಾರತೀಯರು ಎದುರಿಸುತ್ತಿರುವ ಸಮಸ್ಯೆಗಳು: ಗಲ್ಫ್ ರಾಷ್ಟ್ರಗಳಲ್ಲಿ ಭಾರತೀಯ ಕಾರ್ಮಿಕರು ಎದುರಿಸುತ್ತಿರುವ ಪ್ರಮುಖ ಸಮಸ್ಯೆಗಳೆಂದರೆ ಸಂಬಳ ಮತ್ತು ಅಧಿಕಾವಧಿ ಭತ್ಯೆ, ಕಾನೂನುಬದ್ಧ ಕಾರ್ಮಿಕ ಹಕ್ಕುಗಳು ಮತ್ತು ಪ್ರಯೋಜನಗಳ ನಿರಾಕರಣೆ ಮತ್ತು ನಿವಾಸ ಪರವಾನಗಿಗಳನ್ನು ನವೀಕರಿಸದಿರುವುದು. ಅಲ್ಲದೆ, ವೀಕ್‌ಆಫ್‌ಗಳು, ದೀರ್ಘಾವಧಿಯ ಕೆಲಸದ ಸಮಯ ಮತ್ತು ಗೃಹಬಂಧನದ ಘಟನೆಗಳಲ್ಲಿ ಸಮಸ್ಯೆಗಳಿವೆ. ಭಾರತಕ್ಕೆ ಭೇಟಿ ನೀಡಲು ನಿರ್ಗಮನ ಅಥವಾ ಮರು-ಪ್ರವೇಶ ಪರವಾನಗಿಯನ್ನು ನೀಡಲು ನಿರಾಕರಿಸಿದ ನಂತರ ಅನೇಕ ಕಾರ್ಮಿಕರು ತೊಂದರೆಗೆ ಸಿಲುಕಿದರು.

               ಕೊಲ್ಲಿಯಲ್ಲಿ ಭಾರತೀಯರ ಸಾವಿನ ಸಂಖ್ಯೆ: 2014 ರಿಂದ 2023 ರ ನಡುವೆ ಅಪಘಾತಗಳಲ್ಲಿ ಭಾರತೀಯ ವಲಸೆ ಕಾರ್ಮಿಕರು 63,211 ಮಂದಿ ಸಾವನ್ನಪ್ಪಿದ್ದಾರೆ. 2020 ರಲ್ಲಿ 8804 ಕಾರ್ಮಿಕರು ಸಾವನ್ನಪ್ಪಿದ್ದರೆ, 2021 ರಲ್ಲಿ 7928 ಮತ್ತು 2023 ರಲ್ಲಿ 6692 ಅತಿ ಹೆಚ್ಚು ಸಾವು ದಾಖಲಾಗಿವೆ. 2022 ರಲ್ಲಿ, 6159 ಕಾರ್ಮಿಕರು ಸಾವನ್ನಪ್ಪಿದ್ದರೆ, 2018 ಮತ್ತು 2016 ರಲ್ಲಿ, ಸಾವಿನ ಸಂಖ್ಯೆ ಕ್ರಮವಾಗಿ 6014 ಮತ್ತು 6013 ಆಗಿತ್ತು. 2015ರಲ್ಲಿ 5786, 2017ರಲ್ಲಿ 5604, 2014ರಲ್ಲಿ 5388 ಹಾಗೂ 2019ರಲ್ಲಿ 4823 ಮಂದಿ ಸಾವನ್ನಪ್ಪಿದ್ದಾರೆ.

             ಲೋಕಸಭೆಯ ಪ್ರಶ್ನೋತ್ತರ ಅವಧಿಯಲ್ಲಿ ಲಭ್ಯವಿರುವ ಅಂಕಿಅಂಶಗಳ ಪ್ರಕಾರ, ಕಳೆದ ನಾಲ್ಕು ವರ್ಷಗಳಲ್ಲಿ, ಸೌದಿ ಅರೇಬಿಯಾದಲ್ಲಿ ಅತಿ ಹೆಚ್ಚು ಸಾವುನೋವುಗಳು ದಾಖಲಾಗಿವೆ, ಅಲ್ಲಿ 10922 ಮಂದಿ ಸಾವನ್ನಪ್ಪಿದ್ದಾರೆ. ಯುಎಇ, ಕುವೈತ್, ಓಮನ್, ಕತಾರ್‌ನಲ್ಲಿ ಕ್ರಮವಾಗಿ 9509, 3919, 2498 ಮತ್ತು 1523 ಮಂದಿ ಸಾವನ್ನಪ್ಪಿದ್ದಾರೆ.