ಕೆ ಪೋನ್: ಯೋಜನೆ ವಿಫಲ ಎಂದು ಸರ್ಕಾರದ ಪ್ರಗತಿ ವರದಿ

                    ತಿರುವನಂತಪುರಂ: ಎರಡನೇ ಪಿಣರಾಯಿ ಸರ್ಕಾರದ ಪ್ರಗತಿ ವರದಿಯಲ್ಲಿ ಕೆ ಪೋನ್ ವಿಫಲವಾಗಿದೆ ಎಂದು ಒಪ್ಪಿಕೊಂಡಿದೆ.  ರಾಜ್ಯದ 20 ಲಕ್ಷ ಜನ ಸಾಮಾನ್ಯರಿಗೆ ಉಚಿತ ಇಂಟರ್ ನೆಟ್ ಸಂಪರ್ಕ ಕಲ್ಪಿಸುವ ಘೋಷಣೆ ಈ ಮೂಲಕ ತೆರೆಮರೆಗೆ ಸರಿಯಲಿದೆ. ಅರ್ಧದಷ್ಟು ಸಂಪರ್ಕವನ್ನೂ ನೀಡದಿರುವುದು ಪ್ರಗತಿ ವರದಿಯಲ್ಲಿ ಸ್ಪಷ್ಟವಾಗಿದೆ.

                     ಮೊದಲ ಪಿಣರಾಯಿ ಸರ್ಕಾರದ ಅವಧಿಯಲ್ಲಿ ಉದ್ಘಾಟನೆಗೊಂಡ ಈ ಯೋಜನೆಯು 2021 ರಲ್ಲಿ ಪೂರ್ಣಗೊಳ್ಳಬೇಕಿತ್ತು. ಸರ್ಕಾರ ಇದುವರೆಗೆ 5856 ಉಚಿತ ಸಂಪರ್ಕಗಳನ್ನು ನೀಡಿದೆ. 30,000 ಸರ್ಕಾರಿ ಕಚೇರಿಗಳಲ್ಲಿ ಕೆ ಪೋನ್ ಮೂಲಕ ಇಂಟರ್‍ನೆಟ್ ಸೇವೆ ಸಿಗಲಿದೆ ಎಂದು ಸರ್ಕಾರದ ಪ್ರಗತಿ ವರದಿಯಲ್ಲಿ ತಿಳಿಸಲಾಗಿದ್ದು, ಸದ್ಯ 21,311 ಸ್ಥಳಗಳಲ್ಲಿ ಮಾತ್ರ ಇಂಟರ್‍ನೆಟ್ ಸೌಲಭ್ಯವಿದೆ.

                       ಫೈಬರ್ ಸಂಪರ್ಕದ ಭಾಗವಾಗಿ ಇದುವರೆಗೆ 4300 ಕಿ.ಮೀ ಗುತ್ತಿಗೆ ನೀಡಲಾಗಿದ್ದು, ಅದನ್ನು 10,000 ಕಿ.ಮೀ.ಗೆ ವಿಸ್ತರಿಸುವ ಮೂಲಕ ಆದಾಯ ಗಳಿಸುವ ಗುರಿ ಹೊಂದಲಾಗಿದೆ ಎಂದು ಕೆ-ಪೋನ್ ಅಧಿಕಾರಿಗಳು ಕಳೆದ ತಿಂಗಳು ಹೇಳಿದ್ದರು. ಪ್ರಗತಿ ವರದಿಯಲ್ಲಿ ಕೆ ಪೋನ್ ಬಿಕ್ಕಟ್ಟಿನಲ್ಲಿದೆ ಎಂದು ಸರ್ಕಾರ ಬಹಿರಂಗವಾಗಿ ಹೇಳದೆ ಹೇಳುತ್ತಿದೆ.