ಜಪಾನ್‍ನಲ್ಲಿ ಹರಡುತ್ತಿದೆ `ಮಾಂಸ ತಿನ್ನುವ ಬ್ಯಾಕ್ಟೀರಿಯಾ'!

         ಟೋಕಿಯೊ : ಕೋವಿಡ್ ಸಂಬಂಧಿಸಿದ ನಿರ್ಬಂಧಗಳನ್ನು ಸಡಿಲಿಸಿದ ಬಳಿಕ ಜಪಾನ್‍ನಲ್ಲಿ ಎರಡು ದಿನಗಳೊಳಗೆ ಜನರನ್ನು ಕೊಲ್ಲಬಹುದಾದ ಅಪರೂಪದ ಮಾಂಸ ತಿನ್ನುವ ಬ್ಯಾಕ್ಟೀರಿಯಾ ವೇಗವಾಗಿ ಹರಡುತ್ತಿರುವುದಾಗಿ ವರದಿಯಾಗಿದೆ.

            ಈ ವರ್ಷದ ಜೂನ್ 2ರವರೆಗೆ ದೇಶದಲ್ಲಿ `ಸ್ಟ್ರೆಪ್ಟೊಕೊಕಲ್ ಟಾಕ್ಸಿಕ್ ಶಾಕ್ ಸಿಂಡ್ರೋಮ್(ಎಸ್‍ಟಿಎಸ್‍ಎಸ್)ನ ಪ್ರಕರಣ 977ಕ್ಕೆ ಹೆಚ್ಚಿದ್ದರೆ, ಕಳೆದ ಇಡೀ ವರ್ಷ 941 ಪ್ರಕರಣ ದಾಖಲಾಗಿತ್ತು ಎಂದು ಸಾಂಕ್ರಾಮಿಕ ರೋಗಗಳ ರಾಷ್ಟ್ರೀಯ ಸಂಸ್ಥೆ ಮಾಹಿತಿ ನೀಡಿದೆ.

           ಸಾಮಾನ್ಯವಾಗಿ ಮಕ್ಕಳಲ್ಲಿ ಗಂಟಲು ನೋವು ಮತ್ತು ಊತದ ಸಮಸ್ಯೆ ಕಂಡುಬರುತ್ತದೆ. ಆದರೆ ಕೆಲವು ರೀತಿಯ ಬ್ಯಾಕ್ಟೀರಿಯಾಗಳು ಕೈಕಾಲು ನೋವು, ಊತ, ಜ್ವರ, ಕಡಿಮೆ ರಕ್ತದೊತ್ತಡ, ಉಸಿರಾಟದ ತೊಂದರೆ, ಅಂಗಾಂಗ ವೈಫಲ್ಯ ಮತ್ತು ಸಾವಿಗೆ ಕಾರಣವಾಗುತ್ತದೆ.

            50 ವರ್ಷ ಮೀರಿದವರು ಈ ಕಾಯಿಲೆಗೆ ತುತ್ತಾಗುವ ಸಾಧ್ಯತೆ ಹೆಚ್ಚು ಎಂದು ವರದಿ ಹೇಳಿದೆ. ಈ ಸೋಂಕಿನ ಪ್ರಕರಣ ಹೆಚ್ಚುತ್ತಿರುವ ಬಗ್ಗೆ 2022ರ ಅಂತ್ಯದಲ್ಲಿ ಕನಿಷ್ಟ 5 ಯುರೋಪಿಯನ್ ದೇಶಗಳು ವಿಶ್ವ ಆರೋಗ್ಯ ಸಂಘಟನೆ(ಡಬ್ಲ್ಯೂಎಚ್‍ಒ) ಗೆ ಮಾಹಿತಿ ನೀಡಿವೆ. ಕೋವಿಡ್ ನಿರ್ಬಂಧ ಅಂತ್ಯಗೊಳಿಸಿರುವುದು ಈ ಪ್ರಕರಣ ಹೆಚ್ಚಲು ಮುಖ್ಯ ಕಾರಣ ಎಂದು ಡಬ್ಲ್ಯೂಎಚ್‍ಒ ಹೇಳಿದೆ.

ಗಡಿಯ ಬಳಿ ಗೋಡೆ ಕಟ್ಟುತ್ತಿರುವ ಉತ್ತರ ಕೊರಿಯಾ: ವರದಿ

                 : ಉತ್ತರ ಕೊರಿಯಾವು ಗಡಿಯ ಬಳಿ ಉಭಯ ದೇಶಗಳನ್ನು ಪ್ರತ್ಯೇಕಿಸುವ `ಸೇನಾರಹಿತ ವಲಯ'ದ ಒಳಗೆ ರಸ್ತೆಗಳು ಹಾಗೂ ಗೋಡೆಯನ್ನು ಕಟ್ಟುತ್ತಿದೆ ಎಂದು ದಕ್ಷಿಣ ಕೊರಿಯಾದ ಮಾಧ್ಯಮ ಶನಿವಾರ ವರದಿ ಮಾಡಿವೆ.

               ಮಿಲಿಟರಿ ಗಡಿರೇಖೆಯ(ಎಂಡಿಎಲ್) ಉತ್ತರದಲ್ಲಿ ಈ ನಿರ್ಮಾಣ ಚಟುವಟಿಕೆ ನಡೆಯುತ್ತಿದೆ. ಇಲ್ಲಿ ನೆಲವನ್ನು ಅಗೆದು ಗೋಡೆ ಕಟ್ಟಲಾಗುತ್ತಿದೆ ಮತ್ತು ರಸ್ತೆಗಳನ್ನು ನಿರ್ಮಿಸಲಾಗುತ್ತಿದೆ. ಉತ್ತರ ಕೊರಿಯಾದ ಮಿಲಿಟರಿಯ ಚಟುವಟಿಕೆಗಳನ್ನು ನಿಕಟವಾಗಿ ಗಮನಿಸಲಾಗುತ್ತಿದೆ ಎಂದು ದಕ್ಷಿಣ ಕೊರಿಯಾದ ರಕ್ಷಣಾ ಇಲಾಖೆಯನ್ನು ಉಲ್ಲೇಖಿಸಿದ ವರದಿ ಹೇಳಿದೆ.