ಸರ್ಕಾರಿ ಆಸ್ಪತ್ರೆಯಲ್ಲಿ ಮಹಿಳೆಗೆ ಹಾವು ಕಡಿತ: ಪ್ರತಿಭಟನೆಯ ನಂತರ ವರದಿ ಕೇಳಿದ ಡಿಎಂಒ

                  ಪಾಲಕ್ಕಾಡ್: ಮಗಳೊಂದಿಗೆ ಸರ್ಕಾರಿ ಆಸ್ಪತ್ರೆಗೆ ಬಂದ ತಾಯಿಗೆ ಹಾವೊಂದು ಕಚ್ಚಿದ ಘಟನೆ ನಡೆದಿದೆ. ಚಿತ್ತೂರು ತಾಲೂಕು ಆಸ್ಪತ್ರೆಯಲ್ಲಿ ಘಟನೆ ನಡೆದಿದೆ.

                 ಪಾಲಕ್ಕಾಡ್ ನಿವಾಸಿ 27 ವರ್ಷದ ಗಾಯತ್ರಿ ಅವರಿಗೆ ಹಾವು ಕಚ್ಚಿದೆ. ಮಹಿಳೆಯನ್ನು ಪಾಲಕ್ಕಾಡ್ ಜಿಲ್ಲಾ ಆಸ್ಪತ್ರೆಗೆ ದಾಖಲಿಸಲಾಗಿದೆ.

                  ಮೊನ್ನೆ ರಾತ್ರಿ ಜ್ವರದ ಹಿನ್ನೆಲೆಯಲ್ಲಿ ಮಹಿಳೆಯ ಪುತ್ರಿಯನ್ನು ಚಿತ್ತೂರು ತಾಲೂಕು ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ನಿನ್ನೆ ಬೆಳಗ್ಗೆ ಆಸ್ಪತ್ರೆಯ ಮಹಿಳಾ ವಿಭಾಗದಲ್ಲಿ ಗಾಯತ್ರಿ ಅವರಿಗೆ ಹಾವು ಕಚ್ಚಿದೆ. ಆಸ್ಪತ್ರೆಯಲ್ಲಿ ಕ್ರಿಮಿಕೀಟ, ಚಾಪೆಗಳಲ್ಲಿರುವ ಸೂಕ್ಷ್ಮ ಜೀವಿಗಳಿಂದ ಅನೈರ್ಮಲ್ಯ ವಾತಾವರಣ ನಿರ್ಮಾಣವಾಗಿದೆ ಎಂಬುದು ಸ್ಥಳೀಯರ ಆರೋಪ. ಹಾವು ಕಚ್ಚಿದ ಬಗ್ಗೆ ಆಸ್ಪತ್ರೆ ಅಧಿಕಾರಿಗಳಿಗೆ ತಿಳಿಸಿದರೂ ಯಾರಿಂದಲೂ ಸಹಕಾರ ಸಿಕ್ಕಿಲ್ಲ ಎಂಬ ಟೀಕೆಯೂ ಇದೆ. ಮಹಿಳೆಗೆ ಸಣ್ಣ ವಿಷಪೂರಿತ ಹಾವು ಕಚ್ಚಿದೆ. ಘಟನೆ ಸುದ್ದಿಯಾದ ನಂತರ ಡಿಎಂಒ ಚಿತ್ತೂರು ತಾಲೂಕು ಆಸ್ಪತ್ರೆ ಅಧಿಕಾರಿಗಳಿಂದ ವರದಿ ಕೇಳಿದ್ದಾರೆ. ಇದೇ ವೇಳೆ ಆಸ್ಪತ್ರೆ ಅಧೀಕ್ಷಕರು ಹಾವು ಕಚ್ಚಿರುವುದು ವಾರ್ಡ್‍ನ ಹೊರಗಿನಿಂದ ಎಂದು ಉತ್ತರಿಸಿದರು.

              ಮಹಿಳೆಯ ಆರೋಗ್ಯ ಸ್ಥಿತಿ ತೃಪ್ತಿಕರವಾಗಿದೆ ಎಂದು ಪಾಲಕ್ಕಾಡ್ ಜಿಲ್ಲಾ ಆಸ್ಪತ್ರೆಯ ಅಧಿಕಾರಿಗಳು ತಿಳಿಸಿದ್ದಾರೆ. ಚಿತ್ತೂರು ತಾಲೂಕು ಆಸ್ಪತ್ರೆಯು ಈ ಪ್ರದೇಶದ ಪ್ರಮುಖ ಸರ್ಕಾರಿ ಆಸ್ಪತ್ರೆಯಾಗಿದೆ. ಇಲ್ಲಿಗೆ ಪ್ರತಿನಿತ್ಯ ಹಲವಾರು ರೋಗಿಗಳು ಬರುತ್ತಾರೆ. ಈ ಪ್ರದೇಶಗಳ ಆಸ್ಪತ್ರೆಗಳಲ್ಲಿ ಈ ಹಿಂದೆಯೂ ಹಾವುಗಳು ಕಂಡು ಬಂದಿರುವ ಬಗ್ಗೆ ವರದಿಯಾಗಿತ್ತು.