ವನ್ಯಜೀವಿ ದಾಳಿ; ಕೇರಳದಲ್ಲಿ ೫ ವರ್ಷಗಳಲ್ಲಿ ೪೮೬ ಮಂದಿ ಸಾವು: ವರದಿ

               ನವದೆಹಲಿ: ಕೇರಳದಲ್ಲಿ ಕಳೆದ ಐದು ವರ್ಷಗಳಲ್ಲಿ ಕಾಡುಪ್ರಾಣಿಗಳ ದಾಳಿಗೆ ೪೮೬ ಮಂದಿ ಬಲಿಯಾಗಿದ್ದಾರೆ ಎಂದು ಕೇಂದ್ರ ವರದಿ ಹೇಳಿದೆ.

                   ಕೇಂದ್ರ ಅರಣ್ಯ ಮತ್ತು ಪರಿಸರ ಸಚಿವ ಭೂಪೇಂದ್ರ ಯಾದವ್ ರಾಜ್ಯಸಭೆಯಲ್ಲಿ ಈ ವಿಷಯ ತಿಳಿಸಿದರು. ೨೦೧೯-೨೦೨೪ರ ಅವಧಿಯಲ್ಲಿ ಆನೆಗಳ ದಾಳಿಯಲ್ಲಿ ೧೨೪ ಜನರು, ಹುಲಿ ದಾಳಿಯಲ್ಲಿ ಆರು ಮತ್ತು ಇತರ ಕಾಡು ಪ್ರಾಣಿಗಳ ದಾಳಿಯಲ್ಲಿ ೩೫೬ ಜನರು ಸಾವನ್ನಪ್ಪಿದ್ದಾರೆ.

                ವನ್ಯಜೀವಿಗಳ ಆವಾಸಸ್ಥಾನ ಅಭಿವೃದ್ಧಿ ಮತ್ತು ಆನೆಗಳು ಮತ್ತು ಹುಲಿಗಳಿಗೆ ವಿಶೇಷ ಯೋಜನೆಗಳ ಮೂಲಕ ವನ್ಯಜೀವಿಗಳು ಮತ್ತು ಅವುಗಳ ಆವಾಸಸ್ಥಾನಗಳ ಸಂರಕ್ಷಣೆಗಾಗಿ ಕೇಂದ್ರವು ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳಿಗೆ ಹಣಕಾಸಿನ ನೆರವು ನೀಡುತ್ತದೆ. ಈ ಯೋಜನೆಗಳಲ್ಲಿ ಮುಳ್ಳುತಂತಿ ಬೇಲಿ, ಸೋಲಾರ್ ವಿದ್ಯುತ್ ಬೇಲಿ, ಕಳ್ಳಿಗಿಡಗಳ  ಜೈವಿಕ ಬೇಲಿ ಮತ್ತು ಕಾಡು ಪ್ರಾಣಿಗಳು ಜಮೀನಿಗೆ ನುಗ್ಗದಂತೆ ಗಡಿ ಗೋಡೆಗಳಂತಹ ಭೌತಿಕ ತಡೆಗೋಡೆಗಳ ನಿರ್ಮಾಣವನ್ನು ಒಳಗೊಂಡಿದೆ ಎಂದು ಸಚಿವರು ತಿಳಿಸಿದರು. ಸಂಸದ ಅಡ್ವ. ಹ್ಯಾರಿಸ್ ಬೀರನ್ ಅವರ ಪ್ರಶ್ನೆಗೆ ಸಚಿವರು ಉತ್ತರಿಸಿ ಈ ಮಾಹಿತಿ ನೀಡಿದರು.