ಚಾಗೋಸ್‌ ಬಿಕ್ಕಟ್ಟು | ಮಾರಿಷಿಯಸ್‌ಗೆ ಬೆಂಬಲ ಅಚಲ: ಭಾರತ

            ಪೋರ್ಟ್‌ ಲೂಯಿಸ್: ಚಾಗೋಸ್‌ ದ್ವೀಪಸಮೂಹಕ್ಕೆ ಸಂಬಂಧಿಸಿದ ಸಮಸ್ಯೆ ವಿಚಾರವಾಗಿ ಮಾರಿಷಿಯಸ್‌ಗೆ ತಾನು ನೀಡಿರುವ ಬೆಂಬಲ ಅಚಲವಾದುದು ಎಂದು ಭಾರತ ಮಂಗಳವಾರ ಹೇಳಿದೆ.

            ದ್ವಿಪಕ್ಷೀಯ ಸಂಬಂಧ ವೃದ್ಧಿಗಾಗಿ ಮಾರಿಷಿಯಸ್‌ಗೆ ಎರಡು ದಿನಗಳ ಪ್ರವಾಸ ಕೈಗೊಂಡಿರುವ ವಿದೇಶಾಂಗ ಸಚಿವ ಎಸ್‌.ಜೈಶಂಕರ್‌, ಭಾರತದ ಈ ನಿಲುವನ್ನು ದ್ವೀಪ ರಾಷ್ಟ್ರಕ್ಕೆ ತಿಳಿಸಿದರು.

             ಪ್ರಧಾನಿ ಪ್ರವಿಂದಕುಮರ್‌ ಜುಗ್ನಾಥ್ ಅವರೊಂದಿಗೆ ದ್ವಿಪಕ್ಷೀಯ ಸಭೆಯಲ್ಲಿ ಈ ಕುರಿತು ಮಾತನಾಡಿದ ಜೈಶಂಕರ್‌, 'ಮಾರಿಷಿಯಸ್‌ನೊಂದಿಗೆ ಸಂಬಂಧವನ್ನು ಮತ್ತಷ್ಟು ಗಟ್ಟಿಗೊಳಿಸಲು ಭಾರತ ಎದುರು ನೋಡುತ್ತದೆ. ಚಾಗೋಸ್‌ ದ್ವೀಪಸಮೂಹ ಬಿಕ್ಕಟ್ಟಿಗೆ ಸಂಬಂಧಿಸಿದಂತೆ ಮಾರಿಷಿಯಸ್‌ಗೆ ನೀಡಿರುವ ಬೆಂಬಲವನ್ನು ಭಾರತ ಮುಂದುವರಿಸಲಿದೆ' ಎಂದರು.

                 ಭಾರತದ ಈ ನಿಲುವಿಗೆ ಪ್ರತಿಕ್ರಿಯಿಸಿರುವ ವಿದೇಶಾಂಗ ಸಚಿವ ಮನೀಷ್‌ ಗಾಬಿನ್, 'ಮಾರಿಷಿಯಸ್‌ಗೆ ಭಾರತ ನೀಡಿರುವ ಬೆಂಬಲವನ್ನು ಮುಂದುವರಿಸುವುದಾಗಿ ಮತ್ತೊಮ್ಮೆ ದೃಢಪಡಿಸಿರುವ ಜೈಶಂಕರ್ ಅವರಿಗೆ ನಮ್ಮ ಕೃತಜ್ಞತೆ ಸಲ್ಲಿಸುತ್ತೇವೆ' ಎಂದು 'ಎಕ್ಸ್‌'ನಲ್ಲಿ ಪೋಸ್ಟ್‌ ಮಾಡಿದ್ದಾರೆ.