ಕೇರಳದಲ್ಲಿ ಹಣಕಾಸು ಆಯೋಗವಿಲ್ಲ: ಕೇಂದ್ರದ ಅನುದಾನ ಸ್ಥಗಿತ: ಕೇಂದ್ರ ವರದಿ

               ನವದೆಹಲಿ: ಕೇರಳದಲ್ಲಿ ರಾಜ್ಯ ಸರ್ಕಾರದ ಹೊಸ ಹಣಕಾಸು ಆಯೋಗ ರಚನೆಯಾಗದ ಕಾರಣ, ಪಂಚಾಯಿತಿಗಳಿಗೆ ಕೋಟ್ಯಂತರ ರೂಪಾಯಿ ಕೇಂದ್ರದ ಅನುದಾನ ನೀಡಲು ಸಾಧ್ಯವಿಲ್ಲ ಎಂದು ಕೇಂದ್ರ ಸರ್ಕಾರ ಹೇಳಿದೆ.

                 ರಾಜ್ಯ ಹಣಕಾಸು ಆಯೋಗ ರಚಿಸಿ ಮಾಹಿತಿ ನೀಡುವಂತೆ ಹಲವು ಬಾರಿ ಮನವಿ ಮಾಡಿದರೂ ಕೇರಳ ಸರ್ಕಾರ ಮಾಹಿತಿ ಸಲ್ಲಿಸಿಲ್ಲ ಎಂದು ಕೇಂದ್ರ ಪಂಚಾಯಿತಿ ರಾಜ್ ಸಚಿವಾಲಯ ಆರೋಪಿಸಿದೆ. ಇದರಿಂದಾಗಿ 15ನೇ ಕೇಂದ್ರ ಹಣಕಾಸು ಆಯೋಗದ ಶಿಫಾರಸಿನಂತೆ ಕೇರಳದ ಪಂಚಾಯಿತಿಗಳಿಗೆ ಹಂಚಿಕೆಯಾಗಿರುವ 5,337 ಕೋಟಿ ರೂ.ಅನುದಾನದ ಮುಂದಿನ ಕಂತನ್ನು ನೀಡಲು ಸಾಧ್ಯವಿಲ್ಲ ಎಂದು ಕೇಂದ್ರ ಸರ್ಕಾರ ಹೇಳಿದೆ. ರಾಜ್ಯ ಸರ್ಕಾರದ ದುರಾಡಳಿತಕ್ಕೆ ಇನ್ನೊಂದು ಉದಾಹರಣೆ ಎಂದರೆ ಪಂಚಾಯಿತಿಗಳು ಅನುದಾನ ಪಡೆಯುವಲ್ಲಿ ವಿಫಲವಾಗಿರುವುದು.

               2015-16 ರಿಂದ 2019-20 ರವರೆಗೆ 14 ನೇ ಹಣಕಾಸು ಆಯೋಗದ ಅನುದಾನವಾಗಿ 3,774.20 ಕೋಟಿ ರೂಪಾಯಿಗಳು ಮತ್ತು 2020-21 ರಿಂದ 2026-27 ರವರೆಗೆ 15 ನೇ ಹಣಕಾಸು ಆಯೋಗದ ಅನುದಾನವಾಗಿ ಕೇರಳದ ಗ್ರಾಮ ಪಂಚಾಯತ್‍ಗಳಿಗೆ 5,337 ಕೋಟಿ ರೂಪಾಯಿಗಳು. ಇದು ಜೂನ್ 28ರವರೆಗೆ ನೀಡಿರುವ ಮೊತ್ತ. ಆದರೆ, 2024ರ ಮಾರ್ಚ್ ನಂತರ ಕೇಂದ್ರ ಅನುದಾನ ಹಂಚಿಕೆಗೆ ಕಡ್ಡಾಯ ಷರತ್ತಾಗಿರುವ ರಾಜ್ಯ ಹಣಕಾಸು ಆಯೋಗಕ್ಕೆ ಸಂಬಂಧಿಸಿದ ವಿವರಗಳನ್ನು ರಾಜ್ಯ ಸರ್ಕಾರ ಪಂಚಾಯಿತಿ ರಾಜ್ ಸಚಿವಾಲಯಕ್ಕೆ ನೀಡಿಲ್ಲ ಎಂದು ಕೇಂದ್ರ ಪ್ರತ್ಯೇಕ ಪತ್ರಿಕಾ ಪ್ರಕಟಣೆ ಮೂಲಕ ಮಾಹಿತಿ ನೀಡಿದೆ. 

                    ಕೇಂದ್ರ ಸರ್ಕಾರ 15ನೇ ಹಣಕಾಸು ಆಯೋಗದ ಶಿಫಾರಸಿನಂತೆ ಪಂಚಾಯಿತಿಗಳಿಗೆ ಅನುದಾನ ನೀಡದೆ ಕೇರಳವನ್ನು ನಿರ್ಲಕ್ಷಿಸುತ್ತಿರುವುದನ್ನು ಕೆಲವು ಮಲಯಾಳಂ ಮಾಧ್ಯಮಗಳು ವೆದಿ ಮಾಡಿದ್ದು, ಇದೀಗ ಕೇರಳವೇ ವಿಫಲವಾಗಿದೆ ಎಂದು ಕೇಂದ್ರದ ಬೊಟ್ಟು ಮಾಡಿದೆ. ಮಾಜಿ ಮುಖ್ಯ ಕಾರ್ಯದರ್ಶಿ ಎಸ್.ಎಂ. ವಿಜಯಾನಂದ್ ಅಧ್ಯಕ್ಷರಾಗಿ 2019 ರಲ್ಲಿ ರಚನೆಯಾದ 6 ನೇ ರಾಜ್ಯ ಹಣಕಾಸು ಆಯೋಗದ ಅವಧಿಯು ಆಗಸ್ಟ್ 2021 ರಲ್ಲಿ ಕೊನೆಗೊಂಡಿತು. ಎರಡನೇ ಪಿಣರಾಯಿ ಸರ್ಕಾರ ಮೂರು ವರ್ಷ ಕಳೆದರೂ ಹೊಸ ಹಣಕಾಸು ಆಯೋಗ ನೇಮಕಕ್ಕೆ ಮುಂದಾಗದಿರುವುದು ಬಿಕ್ಕಟ್ಟಿಗೆ ಕಾರಣವಾಗಿದೆ. ರಾಜ್ಯ ಹಣಕಾಸು ಸಚಿವ ಕೆ.ಎನ್. ಬಾಲಗೋಪಾಲನ್ ಗಂಭೀರ ಲೋಪವೆಸಗಿರುವುದು ಇದೀಗ ಬಹಿರಂಗಗೊಂಡಿದೆ. 

                15ನೇ ಹಣಕಾಸು ಆಯೋಗದ ಶಿಫಾರಸುಗಳ ಪ್ರಕಾರ, ಎಲ್ಲಾ ರಾಜ್ಯಗಳು ಹಣಕಾಸು ಆಯೋಗವನ್ನು ರಚಿಸಬೇಕು ಮತ್ತು ಆಯೋಗದ ಶಿಫಾರಸುಗಳ ಪ್ರಕಾರ ಕಾರ್ಯನಿರ್ವಹಿಸಬೇಕು. ರಾಜ್ಯ ಹಣಕಾಸು ಆಯೋಗದ ಪ್ರಕ್ರಿಯೆಗಳಿಗೆ ಸಂಬಂಧಿಸಿದಂತೆ ಮಾರ್ಚ್ 2024 ರಂದು ಅಥವಾ ಮೊದಲು ರಾಜ್ಯ ವಿಧಾನಸಭೆಗೆ ವಿವರಣಾತ್ಮಕ ಜ್ಞಾಪಕ ಪತ್ರವನ್ನು ಸಲ್ಲಿಸುವುದು ಸಹ ಕಡ್ಡಾಯವಾಗಿದೆ. ಮಾರ್ಚ್ 2024 ರ ನಂತರ, ರಾಜ್ಯ ಹಣಕಾಸು ಆಯೋಗಗಳಿಗೆ ಸಂಬಂಧಿಸಿದಂತೆ ಸಾಂವಿಧಾನಿಕ ನಿಬಂಧನೆಗಳನ್ನು ಅನುಸರಿಸದ ರಾಜ್ಯಗಳಿಗೆ ಕೇಂದ್ರ ಅನುದಾನವನ್ನು ಬಿಡುಗಡೆ ಮಾಡಲಾಗುವುದಿಲ್ಲ. ಇದನ್ನು ಉಲ್ಲೇಖಿಸಿ, ಈ ವರ್ಷ ಜೂನ್ 11 ಮತ್ತು ಜೂನ್ 24 ರಂದು ಕಳುಹಿಸಲಾದ ಪತ್ರಗಳ ಮೂಲಕ ಕೇಂದ್ರ ಪಂಚಾಯತ್ ರಾಜ್ ಸಚಿವಾಲಯವು ರಾಜ್ಯ ಹಣಕಾಸು ಆಯೋಗಕ್ಕೆ ಸಂಬಂಧಿಸಿದ ವಿವರಗಳನ್ನು ನೀಡುವಂತೆ ಕೇರಳಕ್ಕೆ ಮತ್ತೊಮ್ಮೆ ಮನವಿ ಮಾಡಿದೆ.

               ಕೇರಳ ಸರ್ಕಾರವು 2023-24ನೇ ಹಣಕಾಸು ವರ್ಷದ ಅನ್ಟೈಡ್ ಅನುದಾನದ ಎರಡನೇ ಕಂತಿನ ಅನುದಾನ ವರ್ಗಾವಣೆ ಪ್ರಮಾಣಪತ್ರವನ್ನು ಸಲ್ಲಿಸಿದೆ. ಇದನ್ನು ಕೇಂದ್ರ ಪಂಚಾಯತ್ ರಾಜ್ ಸಚಿವಾಲಯ ಪರಿಶೀಲಿಸುತ್ತಿದೆ. ಇದರೊಂದಿಗೆ ಪಂಚಾಯತ್ ರಾಜ್ ಸಚಿವಾಲಯವು 2024-25ನೇ ಹಣಕಾಸು ವರ್ಷಕ್ಕೆ ಮೊದಲ ಕಂತನ್ನು ನೀಡುವಂತೆ ಹಣಕಾಸು ಸಚಿವಾಲಯಕ್ಕೆ ಶಿಫಾರಸು ಮಾಡಿದೆ.