ಟಿಕೆಟ್​ ಕೊಳ್ಳಲು 2 ರೂ. ಕಡಿಮೆ: ರಾತ್ರಿ ಅಂತ ನೋಡದೆ​ ವಿದ್ಯಾರ್ಥಿನಿಯನ್ನು ಬಸ್​ನಿಂದ ಕೆಳಗಿಳಿಸಿದ ಕಂಡಕ್ಟರ್​!

            ಕೊಲ್ಲಂ: ಬಸ್​ ಟಿಕೆಟ್ ಖರೀದಿ ಮಾಡಲು ಕೇವಲ 2 ರೂಪಾಯಿ ಕಡಿಮೆ ಇದ್ದಿದ್ದಕ್ಕೆ ರಾತ್ರಿ ಅಂತಾನೂ ನೋಡದೆ 8ನೇ ತರಗತಿ ವಿದ್ಯಾರ್ಥಿಯನ್ನು ಬಸ್​ನಿಂದ ಕೆಳಗೆ ಇಳಿಸಿದ ಅಮಾನವೀಯ ಘಟನೆ ಕೇರಳದಲ್ಲಿ ನಡೆದಿದೆ.

              ಕೊಲ್ಲಂ ಮೂಲದ ವಿದ್ಯಾರ್ಥಿನಿಯನ್ನು ಕೆಳಗೆ ಇಳಿಸಲಾಗಿದ್ದು, ಈ ಸಂಬಂಧ ಲೇಡಿ ಕಂಡಕ್ಟರ್​ ವಿರುದ್ಧ ದೂರು ದಾಖಲಾಗಿದೆ.

            ವಿದ್ಯಾರ್ಥಿನಿಯನ್ನು ಸುಲೋಚನಾ ಎಂದು ಗುರುತಿಸಲಾಗಿದೆ. ಈಕೆ ಚೆರಿಜಿಕಾಲದ ನಿವಾಸಿ. ವಿದ್ಯಾರ್ಥಿನಿ ಬಸ್​ ಏರುತ್ತಿದ್ದಂತೆ ಲೇಡಿ ಕಂಡಕ್ಟರ್​ ಬಳಿ ಬಂದು ಆಂಟಿ ನನ್ನತ್ರ ಎರಡು ರೂಪಾಯಿ ಕೊರತೆ ಇದೆ ದಯವಿಟ್ಟು ಟಿಕೆಟ್​ ಕೊಡಿ ಎಂದು ಮನವಿ ಮಾಡಿದ್ದಾಳೆ.

           ಆದರೆ, ಪೂರ್ತಿ ಹಣ ಕೊಟ್ಟರೆ ಮಾತ್ರ ಟಿಕೆಟ್​ ಕೊಡುತ್ತೇನೆ ಎಂದು ಕಂಡಕ್ಟರ್​ ಹೇಳಿದ್ದಾರೆ. ಇದೇ ಸಂದರ್ಭದಲ್ಲಿ 2 ರೂಪಾಯಿ ನಾನು ಪಾವತಿಸುತ್ತೇನೆ ಎಂದು ಅಲ್ಲಿಯೇ ಇದ್ದ ಸಹಪ್ರಯಾಣಿಕರೊಬ್ಬರು ಹೇಳಿದ್ದಾರೆ. ಆದರೆ, ಅದಕ್ಕೂ ಸಮಯ ಕೊಡದೇ ಹುಡುಗಿಯನ್ನು ತಕ್ಷಣ ಬಸ್​ನಿಂದ ಕಂಡಕ್ಟರ್ ಇಳಿಸುವ ಮೂಲಕ ಅಮಾನವೀಯತೆ ಮೆರದಿದ್ದಾರೆ.

              ಬಸ್​ನಿಂದ ಕೆಳಗೆ ಇಳಿದ ವಿದ್ಯಾರ್ಥಿನಿ ರಸ್ತೆಯಲ್ಲಿ ಅಳುತ್ತಾ ನಿಂತಿರುವುದನ್ನು ಕಂಡ ಮಹಿಳೆಯೊಬ್ಬರು ಆಕೆಯ ತಂದೆಯ ಸ್ನೇಹಿತರಿಗೆ ಕರೆ ಮಾಡಿ ಮಾಹಿತಿ ನೀಡಿದ್ದಾರೆ. ಮಾಹಿತಿ ತಿಳಿದ ತಕ್ಷಣ ಕುಟುಂಬಸ್ಥರು ಕೆಎಸ್‌ಆರ್‌ಟಿಸಿ ಅಧಿಕಾರಿಗಳಿಗೆ ದೂರು ನೀಡಲು ಮುಂದಾಗಿದ್ದಾರೆ.