ಯಾವ ವಿಟಮಿನ್ ಕೊರತೆಯಿಂದ ಕೂದಲು ಉದುರುತ್ತೆ?

 ಕೂದಲು ಉದರುವಿಕೆ, ಇದು ಕೇವಲ ಸೌಂದರ್ಯ ವಿಷಯವಾಗಿರದೇ ಮನಸ್ಥಿತಿಯ ಮೇಲೂ ಪರಿಣಾಮ ಬೀರುತ್ತಿದೆ. ಏನ್ರೀ ಈಗ್ಲೇ ಕೂದಲು ಎಲ್ಲಾ ಹೋಗಿ ಬಿಟ್ಟಿದೆ ಅನ್ನೋ ಮಾತಿಂದ ಆಗೋ ನೋವು ಅಷ್ಟಿಷ್ಟಲ್ಲ. ‌ಸದ್ಯಕ್ಕಂತೂ ಕೂದಲು ಉದುರುವಿಕೆ ಸಮಸ್ಯೆ ಹೆಣ್ಣು, ಗಂಡು ಇಬ್ಬರಲ್ಲೂ ಹೆಚ್ಚಾಗಿದೆ.

80% ಕ್ಕಿಂತ ಹೆಚ್ಚು ಪುರುಷರು ಮತ್ತು ಸುಮಾರು 50% ಮಹಿಳೆಯರು ತಮ್ಮ ಜೀವನದಲ್ಲಿ ಕೆಲವು ಹಂತದಲ್ಲಿ ಗಮನಾರ್ಹ ಕೂದಲು ಉದುರುವಿಕೆಯನ್ನು ಅನುಭವಿಸುತ್ತಿದ್ದಾರೆ ಎನ್ನುತ್ತಿವೆ ವರದಿಗಳು.

ಕೂದಲು ಉದುರುವಿಕೆಯಂತಹ ಈ ಸಾಮಾನ್ಯ ಸಮಸ್ಯೆಗೆ ಕೆಲವರು ಸಪ್ಲಿಮೆಂಟರಿ, ವಿಟಮಿನ್‌ ಮಾತ್ರೆ, ಮೆಡಿಸಿನ್ ಇಂತಹ ಕ್ರಮಗಳಿಗೆ ಮುಂದಾಗಿದ್ದಾರೆ. ಕೆಲವರು ವಿಟಮಿನ್‌ ಕೊರತೆಯೇ ಕೂದಲ ಉದುರುವಿಕೆಗೆ ಕಾರಣ ಎಂದು ವಿಟಮಿನ್‌ಗಳಿಗೆ ಮೊರೆ ಹೋಗಿದ್ದಾರೆ.

ಕೂದಲು ಬೆಳವಣಿಗೆಗೆ ವಿಟಮಿನ್ ಪರಿಹಾರವೇ? ಯಾವ ವಿಟಮಿನ್ ಕೊರತೆ ಕೂದಲು ಉದುರುವಿಕೆಗೆ ಕಾರಣವಾಗುತ್ತದೆ?

ಕೂದಲು ಉದುರುವಿಕೆಗೆ ವಿಟಮಿನ್‌ ಕೊರತೆ ಒಂದೇ ಕಾರಣವಲ್ಲ. ಇದು ಹಲವಾರು ಕಾರಣಗಳಿಂದಾಗಿ ಸಂಭವಿಸಬಹುದು ಅನ್ನೋದು ತಜ್ಞರ ಅಭಿಪ್ರಾಯ. ಪುರುಷರ ವಿಷಯಕ್ಕೆ ಬಂದಾಗ, ಆಂಡ್ರೊಜೆನೆಟಿಕ್ ಅಲೋಪೆಸಿಯಾ ಸುಮಾರು 95% ರಷ್ಟು ಕೂದಲು ಉದುರುವಿಕೆ ಪ್ರಕರಣಗಳಿಗೆ ಕಾರಣವಾಗಿದೆ, ಈ ಸಂಭವನೀಯತೆಯು ಮಹಿಳೆಯರಿಗೆ ಸುಮಾರು 40% ರಷ್ಟು ಹೇರ್‌ಫಾಲ್‌ಗೆ ಕಾರಣವಾಗಿದೆ.

ವಿಟಮಿನ್‌ ಕೊರತೆಯಲ್ಲದೇ ಜೆನೆಟಿಕ್ಸ್, ಹಾರ್ಮೋನ್ ಅಸಮತೋಲನ, ಒತ್ತಡ, ಔಷಧಿಗಳು ಅಥವಾ ವೈದ್ಯಕೀಯ ಪರಿಸ್ಥಿತಿಗಳು ಕೂದಲು ಉದುರುವಿಕೆಗೆ ಇತರ ಸಾಮಾನ್ಯ ಕಾರಣಗಳಾಗಿವೆ. ಕಡಿಮೆ ಮಟ್ಟದ ಬಯೋಟಿನ್ ಅಥವಾ ವಿಟಮಿನ್ ಡಿ ಕೊರತೆಯ ಕಾರಣದಿಂದಾಗಿ ನಿಮ್ಮ ಕೂದಲು ಉದುರಬಹುದು.

ಮೊದಲು ಕೂದಲ ಉದುರುವಿಕೆಗೆ ಕಾರಣ ಕಂಡುಕೊಳ್ಳಿ

ವಿಟಮಿನ್‌ ತೆಗೆದುಕೊಳ್ಳೋ ಮುನ್ನ ಇಲ್ಲಿ ನೀವು ಗಮನಿಸಬೇಕಾದ ವಿಚಾರ ಏನೆಂದರೆ, ನಿಮ್ಮ ಕೂದಲು ಉದುರುವಿಕೆಗೆ ವಿಟಮಿನ್‌ ಕೊರತೆ ಕಾರಣವಲ್ಲದಿದ್ದರೆ, ನೀವು ಎಷ್ಟೇ ವಿಟಮಿನ್‌ ತೆಗೆದುಕೊಂಡರು ಅದು ವ್ಯರ್ಥ. ನೀವು ಹೆಚ್ಚಿನ ಪ್ರಮಾಣದಲ್ಲಿ ಹೇರ್‌ಫಾಲ್‌ ಸಮಸ್ಯೆ ಹೊಂದಿದ್ದರೆ, ಮೊದಲಿಗೆ ಆರೋಗ್ಯ ತಜ್ಞರನ್ನು ಸಂಪರ್ಕಿಸಬೇಕು. ವಿಟಮಿನ್‌ ಕೊರತೆ ಇದ್ದರೆ ರಕ್ತಪರೀಕ್ಷೆ ಮಾಡುವ ಮೂಲಕ ಅದನ್ನು ಕಂಡುಕೊಳ್ಳಬೇಕು.

ಈ ಪರೀಕ್ಷೆಯಲ್ಲಿ ವಿಟಮಿನ್‌ ಕೊರತೆ ಕಂಡುಬಂದರೆ, ಜೀವಸತ್ವಗಳನ್ನು ತೆಗೆದುಕೊಳ್ಳುವುದು ಸರಿಯಾದ ಕ್ರಮವಾಗಿರಬಹುದು, ಕೂದಲು ಬೆಳವಣಿಗೆಗೆ ಸಹ ಕಾರಣವಾಗಬಹುದು.

ಕೂದಲಿನ ಬೆಳವಣಿಗೆಗೆ ಯಾವ ಜೀವಸತ್ವಗಳು ಒಳ್ಳೆಯದು?

ಕಿಂಗ್ ಬಯೋಟಿನ್, ಕೊಬ್ಬು- ಕರಗಬಲ್ಲ ವಿಟಮಿನ್‌ಗಳಾದ ಎ, ಡಿ ಮತ್ತು ಇ ಜೊತೆಗೆ ವಿಟಮಿನ್ ಸಿ ಮುಖ್ಯವಾಗಿದ್ದು, ಕೂದಲು ಉದುರುವುದನ್ನು ತಡೆಯಲು ಸಹಾಯ ಮಾಡುತ್ತದೆ. ಆದರೆ ವೈದ್ಯರೊಂದಿಗೆ ಮಾತನಾಡದೆ ನೀವಾಗಿಯೇ ಜೀವಸತ್ವಗಳನ್ನು ತೆಗೆದುಕೊಳ್ಳಲು ಪ್ರಾರಂಭಿಸಬೇಡಿ, ಏಕೆಂದರೆ ನೀವು ಸುರಕ್ಷಿತ ಮಿತಿಯನ್ನು ಮೀರಿ ಆ ವಿಟಮಿನ್ ಮಟ್ಟವನ್ನು ಹೆಚ್ಚಿಸಿದರೆ ಇತರ ಆರೋಗ್ಯ ತೊಡಕುಗಳನ್ನು ಎದುರಿಸಬೇಕಾಗುತ್ತದೆ.

ಹಾರ್ವರ್ಡ್ ಹೆಲ್ತ್ ಪ್ರಕಾರ, ವಿಟಮಿನ್ ಎ ಮತ್ತು ಸೆಲಿನಿಯಮ್ ಅನ್ನು ಹೆಚ್ಚು ತೆಗೆದುಕೊಳ್ಳುವುದು ಕೂದಲು ನಷ್ಟಕ್ಕೆ ಮತ್ತಷ್ಟು ಕೊಡುಗೆ ನೀಡುತ್ತದೆ. ಮತ್ತು ಹೆಚ್ಚಿನ ಚರ್ಮ, ಕೂದಲು ಮತ್ತು ಉಗುರು ಪೂರಕಗಳಲ್ಲಿ ಕಂಡುಬರುವ ಹೆಚ್ಚು ಬಯೋಟಿನ್ ಕೆಲವು ಥೈರಾಯ್ಡ್ ಮತ್ತು ಹಾರ್ಮೋನ್ ಸಮಸ್ಯೆಗಳನ್ನು ಉಂಟು ಮಾಡುತ್ತದೆ.

ಪ್ರೋಟೀನ್ ಆಹಾರ ಸೇವನೆ ಅತ್ಯಗತ್ಯ

ವಿಟಮಿನ್ ಕೊರತೆಯು ನಿಮ್ಮ ಕೂದಲು ಉದುರುವಿಕೆಗೆ ಕಾರಣವಲ್ಲದಿದ್ದರೆ, ಕೂದಲು ಉದುರುವುದನ್ನು ತಡೆಯಲು ಮತ್ತು ಅದರ ಬೆಳವಣಿಗೆಯನ್ನು ಬೆಂಬಲಿಸಲು ನೀವು ಪ್ರೋಟೀನ್‌ ಭರಿತ ಆಹಾರಗಳನ್ನು ಹೆಚ್ಚೆಚ್ಚು ತೆಗೆದುಕೊಳ್ಳಬೇಕು. ಹಾಗೆಯೇ ಒತ್ತಡದ ಮಟ್ಟಗಳನ್ನು ನಿರ್ವಹಿಸಬೇಕು, ಅಗತ್ಯ ವ್ಯಾಯಾಮದ ಮೂಲಕ ಮಾನಸಿಕವಾಗಿ ಹೆಲ್ತಿಯಾಗಿರಬೇಕು ಅನ್ನೋದು ತಜ್ಞರ ಸಲಹೆ.