ಬಾಂಗ್ಲಾದೇಶ: ಸೈಯದ್‌ ರೆಫಾತ್‌ ಅಹ್ಮದ್‌ ನೂತನ ಸಿಜೆ

 ಢಾಕಾ: ಹೈಕೋರ್ಟ್‌ನ ಹಿರಿಯ ನ್ಯಾಯಮೂರ್ತಿ ಸೈಯದ್‌ ರೆಫಾತ್‌ ಅಹ್ಮದ್‌ ಅವರು ಬಾಂಗ್ಲಾದೇಶ ಸುಪ್ರೀಂ ಕೋರ್ಟ್‌ನ ನೂತನ ಮುಖ್ಯನ್ಯಾಯಮೂರ್ತಿಯಾಗಿ ಅಧಿಕಾರ ಸ್ವೀಕರಿಸಿದ್ದಾರೆ.

ಅಧ್ಯಕ್ಷ ಮೊಹಮ್ಮದ್‌ ಶಹಾಬುದ್ದೀನ್‌ ಅವರು ಸಿಜೆ ಸೈಯದ್‌ ರೆಫಾತ್‌ ಅಹ್ಮದ್‌ ಅವರಿಗೆ ಪ್ರತಿಜ್ಞಾವಿಧಿ ಬೋಧಿಸಿದ್ದಾರೆ ಎಂದು ಅಧ್ಯಕ್ಷರ ಪತ್ರಿಕಾ ಕಾರ್ಯದರ್ಶಿ ಶಿಪ್ಲು ಜಮಾನ್‌ ತಿಳಿಸಿದ್ದಾರೆ.

ಅಹ್ಮದ್‌ ಅವರು ಬಾಂಗ್ಲಾದೇಶದ 25ನೇ ಮುಖ್ಯ ನ್ಯಾಯಮೂರ್ತಿಯಾಗಿದ್ದಾರೆ. ಢಾಕಾ ವಿಶ್ವವಿದ್ಯಾಲಯದಲ್ಲಿ ಅಧ್ಯಯನದ ನಂತರ ಅವರು ಆಕ್ಸ್‌ಫರ್ಡ್‌ ವಿ.ವಿ ಹಾಗೂ ಅಮೆರಿಕದ ಟಫ್ಟ್ಸ್‌ ವಿ.ವಿಯಲ್ಲಿ ಉನ್ನತ ವ್ಯಾಸಂಗ ಪೂರೈಸಿದ್ದಾರೆ.

ವಿದ್ಯಾರ್ಥಿಗಳ ಪ್ರತಿಭಟನೆ ಹಾಗೂ ಎಚ್ಚರಿಕೆಗೆ ಮಣಿದು, ಒದೇದುಲ್ಲಾ ಹಸನ್‌ ಅವರು ಮುಖ್ಯನ್ಯಾಯಮೂರ್ತಿ ಹುದ್ದೆಗೆ ಶನಿವಾರ ರಾಜೀನಾಮೆ ನೀಡಿದ್ದರು. ಅವರು ಮಾಜಿ ಪ್ರಧಾನಿ ಶೇಖ್‌ ಹಸೀನಾ ನಿಷ್ಠರಾಗಿದ್ದು, ಕೂಡಲೇ ರಾಜೀನಾಮೆ ನೀಡಬೇಕು ಎಂದು ಪ್ರತಿಭಟನೆ ನಿರತ ವಿದ್ಯಾರ್ಥಿಗಳು ಆಗ್ರಹಿಸಿದ್ದರು.