ಇವತ್ತು ಭಾನುವಾರ ಷೇರು ಮಾರುಕಟ್ಟೆಗೆ ರಜೆ ಆದರೂ, ನಾಳೆಯಿಂದ ಆರಂಭವಾಗುವ ಷೇರುಪೇಟೆಗೆ ಹಲವರು ತಯಾರಿ, ಅಧ್ಯಯನ ಆರಂಭಿಸಿರುತ್ತಾರೆ. ಈ ವಾರದಲ್ಲಿ ಯಾವ ಷೇರು ಹೆಚ್ಚು ಲಾಭ ತಂದುಕೊಡಬಹುದು, ಯಾವುದರ ಮೌಲ್ಯ ತೀರಾ ಕಡಿಮೆಯಾಗಬಹುದು ಎಂದು ತಿಳಿದುಕೊಳ್ಳಲು ನಾನಾ ಕಸರತ್ತು ನಡೆಸುತ್ತಾರೆ.
ಮುಂಬರುವ ವಾರದ ಷೇರು ಮಾರುಕಟ್ಟೆ ಮೇಲೆ ಈ ಅಂಶಗಳ ಪ್ರಭಾವ!
ಇದೇ ರೀತಿ, ಮುಂಬರುವ ವಾರದ ಮಾರುಕಟ್ಟೆ ಚಲನೆಗಳು ಆರ್‌ಬಿಐ ಬಡ್ಡಿ ದರ ನಿರ್ಧಾರ, ಸ್ಥೂಲ ಆರ್ಥಿಕ ಮಾಹಿತಿ ಮತ್ತು ಜಾಗತಿಕ ಪ್ರವೃತ್ತಿಗಳು ಸೇರಿದಂತೆ ಹಲವಾರು ಪ್ರಮುಖ ಅಂಶಗಳಿಂದ ಪ್ರಭಾವಿತವಾಗಿರುತ್ತದೆ ಎಂದು ವಿಶ್ಲೇಷಕರು ಹೇಳಿದ್ದಾರೆ.
ವಿದೇಶಿ ಹೂಡಿಕೆದಾರರ ವ್ಯಾಪಾರ ಚಟುವಟಿಕೆಗಳು ಮತ್ತು ಹಲವು ಕಂಪನಿಗಳ ಮೊದಲ ತ್ರೈಮಾಸಿಕ ಆದಾಯ ಗಳಿಕೆ (Q1) ಪ್ರಕಟಣೆ ಬಾಕಿ ಇದ್ದು, ಈ ಫಲಿತಾಂಶಗಳು ಸಹ ಈಕ್ವಿಟಿ ಷೇರು ಮಾರುಕಟ್ಟೆಯ ಪ್ರವೃತ್ತಿ ಮೇಲೆ ಪರಿಣಾಮ ಬೀರುತ್ತದೆ ಎಂದು ಹೇಳಲಾಗಿದೆ.
ವಿಶ್ಲೇಷಕರು ಹೇಳೋದೇನು?
ಈ ವಾರ, ನಾವು ದೀರ್ಘಾವಧಿಯ ಸ್ಥಿರತೆಯ ನಂತರ ದೌರ್ಬಲ್ಯದ ಮೊದಲ ಪ್ರಮುಖ ಚಿಹ್ನೆಗಳನ್ನು ನೋಡುತ್ತಿರುವುದರಿಂದ ಎಲ್ಲಾ ಗಮನವು ಜಾಗತಿಕ ಮಾರುಕಟ್ಟೆಗಳ ಮೇಲೆ ಕೇಂದ್ರೀಕೃತವಾಗಿರುತ್ತದೆ. ಇದು ಷೇರು ಮಾರುಕಟ್ಟೆಯ ಶಕ್ತಿಯನ್ನು ಪರೀಕ್ಷಿಸುತ್ತದೆ. ಇದು ಭಾರತೀಯ ಮಾರುಕಟ್ಟೆಯ ಬಲವನ್ನು ಪರೀಕ್ಷಿಸುತ್ತದೆ ಎಂದು ತಿಳಿದುಬಂದಿದೆ. ಜಾಗತಿಕ ವಿದ್ಯಮಾನ ಹಾಗೂ ಮೌಲ್ಯಮಾಪನ ಕಾಳಜಿಗಳ ಹೊರತಾಗಿಯೂ ಬಲವಾದ ದೇಶೀಯ ದ್ರವ್ಯತೆ ಮತ್ತು ಉತ್ತಮ ಸ್ಥೂಲ ಆರ್ಥಿಕ ದೃಷ್ಟಿಕೋನದಿಂದಾಗಿ BSE ಹಾಗೂ NSE ಚೇತರಿಸಿಕೊಳ್ಳುತ್ತದೆ.
ಆಗಸ್ಟ್ 8 ರಂದು ಭಾರತೀಯ ರಿಸರ್ವ್ ಬ್ಯಾಂಕ್‌ನ ಮುಂಬರುವ ಹಣಕಾಸು ನೀತಿ ಘೋಷಣೆಯು ದೇಶೀಯ ಷೇರು ಮಾರುಕಟ್ಟೆ ಮೇಲೆ ಮಹತ್ವದ ಪರಿಣಾಮ ಬೀರುತ್ತದೆ ಎಂದು ತಿಳಿದುಬಂದಿದೆ. ಅಲ್ಲದೆ, ಹಲವು ಕಂಪನಿಗಳ Q1 ಗಳಿಕೆ ಹಾಗೂ ಸಾಂಸ್ಥಿಕ ಹರಿವುಗಳು ಮಾರುಕಟ್ಟೆ ಡೈನಾಮಿಕ್ಸ್‌ನ ಮೇಲೆ ನಿರ್ಣಾಯಕ ಪಾತ್ರವನ್ನು ವಹಿಸುತ್ತವೆ ಎಂದು ವಿಶ್ಲೇಷಕರು ಅಂದಾಜಿಸಿದ್ದಾರೆ.
ಈ ವಾರ, ಭಾರ್ತಿ ಏರ್‌ಟೆಲ್, BEML, ONGC, NHPC, ಭಾರತೀಯ ಜೀವ ವಿಮಾ ನಿಗಮ ಮತ್ತು MRF ಸೇರಿದಂತೆ ಹಲವಾರು ಪ್ರಮುಖ ಕಂಪನಿಗಳು ತಮ್ಮ ತ್ರೈಮಾಸಿಕ ಹಣಕಾಸು ಫಲಿತಾಂಶಗಳನ್ನು ಬಿಡುಗಡೆ ಮಾಡಲು ಸಿದ್ಧವಾಗಿವೆ.
ಮಾರಾಟದ ಒತ್ತಡಕ್ಕೆ ಕುಸಿದ ಷೇರುಪೇಟೆ
30 ಷೇರುಗಳನ್ನು ಒಳಗೊಂಡಿರುವ BSE Sensex ಶುಕ್ರವಾರ ಗಮನಾರ್ಹ ಕುಸಿತ ಅನುಭವಿಸಿದೆ. 885.60 ಪಾಯಿಂಟ್‌ಗಳು ಅಥವಾ 1.08 ಶೇಕಡಾ ಕುಸಿದು 80,981.95 ಕ್ಕೆ ಮುಕ್ತಾಯವಾಯಿತು. ಅದೇ ರೀತಿ, NSE Nifty ಸೂಚ್ಯಂಕವು 293.20 ಪಾಯಿಂಟ್‌ಗಳು ಅಥವಾ 1.17 ರಷ್ಟು ಕುಸಿದು, 24,717.70 ಕ್ಕೆ ಮುಕ್ತಾಯಗೊಂಡಿದೆ.
ಈ ಮಧ್ಯೆ, ಜಾಗತಿಕ ತೈಲ ಮಾನದಂಡ ಮತ್ತು ರೂಪಾಯಿ - ಡಾಲರ್ ವಿನಿಮಯ ದರವನ್ನು ಹೂಡಿಕೆದಾರರು ನಿಕಟವಾಗಿ ಗಮನಿಸುತ್ತಾರೆ. ಏಕೆಂದರೆ ಈ ಅಂಶಗಳು ಮಾರುಕಟ್ಟೆಯಲ್ಲಿ ಪ್ರವೃತ್ತಿಯನ್ನು ರೂಪಿಸುವಲ್ಲಿ ನಿರ್ಣಾಯಕ ಪಾತ್ರವನ್ನು ವಹಿಸುವ ಸಾಧ್ಯತೆಯಿದೆ.
DOCTYPE html>
.jpg)
