ತಾಂತ್ರಿಕ ದೋಷ: ಇಂಡಿಗೊ ವಿಮಾನದಲ್ಲಿ 4 ಗಂಟೆ ಸಿಲುಕಿದ ಪ್ರಯಾಣಿಕರು

           ಮುಂಬೈ: ಮುಂಬೈನಿಂದ ದೋಹಾಕ್ಕೆ ಹೊರಟಿದ್ದ ಇಂಡಿಗೊ ಕಂಪನಿಗೆ ಸೇರಿದ ವಿಮಾನದಲ್ಲಿ ತಾಂತ್ರಿಕ ದೋಷ ಕಾಣಿಸಿಕೊಂಡಿದ್ದರಿಂದ ಪ್ರಯಾಣಿಕರು ಸುಮಾರು ನಾಲ್ಕು ಗಂಟೆ ವಿಮಾನದಲ್ಲಿಯೇ ಸಂಕಷ್ಟ ಅನುಭವಿಸಿದ ಪ್ರಸಂಗ ನಡೆದಿದೆ.

            ಕೆಲವು ಪ್ರಯಾಣಿಕರು ಈ ಕುರಿತು ಸಾಮಾಜಿಕ ಜಾಲತಾಣದಲ್ಲಿ ಮಾಹಿತಿ ಹಂಚಿಕೊಂಡಿದ್ದಾರೆ.

ತಾಂತ್ರಿಕ ದೋಷ ಸರಿಪಡಿಸಿದ ಬಳಿಕ ಭಾನುವಾರ ಬೆಳಿಗ್ಗೆ ವಿಮಾನವು ದೋಹಾದತ್ತ ಪ್ರಯಾಣ ಬೆಳೆಸಿದೆ.

              ಪ್ರಯಾಣಿಕರು ವಿಮಾನ ಪ‍್ರವೇಶಿಸಿದ ವೇಳೆಯಲ್ಲಿಯೇ ತಾಂತ್ರಿಕ ದೋಷ ಕಾಣಿಸಿಕೊಂಡಿತು. ವಲಸೆ ಪ್ರಾಧಿಕಾರದ ಅಧಿಕಾರಿಗಳು ವಿಮಾನದಿಂದ ಕೆಳಗೆ ಇಳಿಯಲು ಅವಕಾಶ ನೀಡಲಿಲ್ಲ ಎಂದು ಪ್ರಯಾಣಿಕರೊಬ್ಬರು 'ಎಕ್ಸ್‌'ನಲ್ಲಿ ತಿಳಿಸಿದ್ದಾರೆ.

            ಈ ತೊಂದರೆ ಬಗ್ಗೆ ಇಂಡಿಗೊ ಕಂಪನಿಯು ಪ್ರಯಾಣಿಕರ ಕ್ಷಮೆಯಾಚಿಸಿದೆ. ವಿಮಾನದೊಳಗೆ ಸಂಕಷ್ಟಕ್ಕೆ ಸಿಲುಕಿದ್ದ ಪ್ರಯಾಣಿಕರಿಗೆ ಉಪಹಾರ ಸೇರಿ ಅಗತ್ಯ ಸೌಲಭ್ಯ ಕಲ್ಪಿಸಲಾಗಿತ್ತು ಎಂದು ಹೇಳಿದೆ.