ಉಪನ್ಯಾಸದ ನಡುವೆ ಸರ್​ ಮಲಗಬಹುದಾ ಎಂದು ಕೇಳಿದ ವಿದ್ಯಾರ್ಥಿನಿಯರು! ಲೆಕ್ಚರರ್ ಕೊಟ್ಟ ಉತ್ತರ ವೈರಲ್​ ​

        ನವದೆಹಲಿ: ಸಾಮಾಜಿಕ ಜಾಲತಾಣದಲ್ಲಿ ಪ್ರತಿನಿತ್ಯ ಸಾವಿರಾರು ವಿಡಿಯೋಗಳು ಅಪ್​ಲೋಡ್​ ಆಗುತ್ತಿರುತ್ತವೆ. ಆದರೆ, ಕೆಲವೊಂದು ವಿಡಿಯೋಗಳು ತನ್ನ ವಿಶೇಷತೆಯಿಂದಲೇ ಸಿಕ್ಕಾಪಟ್ಟೆ ವೈರಲ್​ ಆಗಿಬಿಡುತ್ತವೆ. ಇದೀಗ ಅಂಥದ್ದೇ ವಿಡಿಯೋವೊಂದು ಎಲ್ಲರ ಗಮನ ಸೆಳೆದಿದೆ.

         ಸಾಮಾನ್ಯವಾಗಿ ಕ್ಲಾಸ್​ರೂಮ್​ನಲ್ಲಿ ನಿದ್ರೆಗೆ ಜಾರಿದರೆ ಶಿಕ್ಷಕರು ಅಥವಾ ಪ್ರಾಧ್ಯಪಕರ ಕೋಪಕ್ಕೆ ಗುರಿಯಾಗಬೇಕಾಗುತ್ತದೆ.

          ಪಾಠ ಮಾಡುವಾಗ ನಿದ್ರೆ ಮಾಡಿದರೆ, ಆ ವಿದ್ಯಾರ್ಥಿಗೆ ತರಗತಿಯಲ್ಲೇ ಸಣ್ಣದೊಂದು ಶಿಕ್ಷೆ ನೀಡುತ್ತಾರೆ. ಆದರೆ, ವೈರಲ್​ ಆಗಿರುವ ವಿಡಿಯೋದಲ್ಲಿರುವ ಲೆಕ್ಚರರ್​ ಇದಕ್ಕೆ ತದ್ವಿರುದ್ಧವಾಗಿ ನಡೆದುಕೊಂಡು ಎಲ್ಲರ ಗಮನವನ್ನು ತಮ್ಮತ್ತ ಸೆಳೆದಿದ್ದಾರೆ.

            ಉಪನ್ಯಾಸದ ಅವಧಿಯ ನಡುವೆ ಪ್ರಾಧ್ಯಪಕ ವಿದ್ಯಾರ್ಥಿಗಳಿಗೆ ಮಲಗಲು ಅವಕಾಶ ನೀಡಿದ್ದಾರೆ. ಇದಕ್ಕೆ ಸಂಬಂಧಿಸಿದ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್​ ಆಗಿದೆ. ಈ ವಿಡಿಯೋವನ್ನು ಮೊದಲು maardaalapsych ಹೆಸರಿನ ಇನ್​ಸ್ಟಾಗ್ರಾಂ ಖಾತೆಯಲ್ಲಿ ಹಂಚಿಕೊಳ್ಳಲಾಗಿದೆ.

             ಕೆಲವು ವಿದ್ಯಾರ್ಥಿಗಳು ವ್ಯಾಕರಣಕ್ಕೆ ಸಂಬಂಧಿಸಿದ ಪ್ರಶ್ನೆಯನ್ನು ಚರ್ಚಿಸುವುದರೊಂದಿಗೆ ವಿಡಿಯೋ ಪ್ರಾರಂಭವಾಗುತ್ತದೆ. ಚರ್ಚೆಯನ್ನು ಪ್ರಾಧ್ಯಾಪಕರು ಗಮನಿಸಿದಾಗ, ಓರ್ವ ವಿದ್ಯಾರ್ಥಿ 'ನೀವು ನಿದ್ರೆ ಮಾಡಿ' ಅಥವಾ 'ನೀವು ಮಲಗಬಹುದು' ಇವರೆಡಲ್ಲಿ ಯಾವುದು ಸರಿಯಾದ ವಾಕ್ಯ ಎಂದು ಕೇಳುತ್ತಾರೆ.

          ಈ ಪ್ರಶ್ನೆಗೆ ನಗುತ್ತಲೇ ಉತ್ತರ ನೀಡುವ ಪ್ರಾಧ್ಯಪಕ ನೀವು ಮಲಗಬಹುದು ಎನ್ನುತ್ತಾರೆ. ಪ್ರಾಧ್ಯಪಕರು ಈ ಮಾತನ್ನು ಹೇಳುತ್ತಿದ್ದಂತೆ ಎಲ್ಲ ವಿದ್ಯಾರ್ಥಿಗಳು ಅನುಮತಿ ಸಿಕ್ಕಿತು ಎಂಬಂತೆ ತಮ್ಮ ಡೆಸ್ಕ್​ಗೆ ಒರಗಿ ನಿದ್ರೆ ಮಾಡಿದಂತೆ ನಟಿಸುತ್ತಾರೆ. ಇದನ್ನು ನೋಡಿ ಪ್ರಾಧ್ಯಪಕರು ನಗುತ್ತಾರೆ.

              ಸದ್ಯ ಈ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ಸಿಕ್ಕಾಪಟ್ಟೆ ಸದ್ದು ಮಾಡುತ್ತಿದೆ. ವಿಡಿಯೋಗೆ ಸ್ನೇಹಮಯ ಪ್ರಾಧ್ಯಪಕ ಎಂದು ಅಡಿಬರಹ ನೀಡಲಾಗಿದೆ. ವಿಡಿಯೋ ನೋಡಿದವರು ನಮಗೆ ಇಂಥಾ ಪ್ರಾಧ್ಯಪಕರು ಇರಬೇಕಿತ್ತು. ಎಷ್ಟೊಂದು ಸ್ನೇಹಮಯಿಯಾಗಿದ್ದಾರೆ ಎಂದು ಮೆಚ್ಚುಗೆ ಮಹಾಪೂರವನ್ನೇ ಹರಿಸಿದ್ದಾರೆ.