ನೀವು ಆರೋಗ್ಯವಾಗಿದ್ದೀರಾ? ನಿಮ್ಮ ದೇಹವು ನೀಡುವ ಈ ಸಂಕೇತಗಳಿಂದ ಸುಲಭವಾಗಿ ತಿಳಿಯಬಹುದು

 ಪ್ರಪಂಚದಾದ್ಯಂತ ವೇಗವಾಗಿ ಹೆಚ್ಚುತ್ತಿರುವ ಹಾಗೂ ಹರಡುತ್ತಿರುವ ಹಲವಾರು ರೋಗಗಳ ನಡುವೆ ಆರೋಗ್ಯವಾಗಿರುವುದೇ ಒಂದು ಸೌಭಾಗ್ಯ ಎಂದರೆ ತಪ್ಪಾಗಲಾರದು. ಅಷ್ಟಕ್ಕೂ ನೀವು ಆರೋಗ್ಯವಾಗಿದ್ದೀರಾ ಅಥವಾ ಇಲ್ಲವೇ? ಇದಕ್ಕೇನಾದರೂ ಪರೀಕ್ಷೆ ಇದೆಯೇ? ರೋಗಗಳ ಸಂದರ್ಭದಲ್ಲಿ ಕೆಲವು ರೀತಿಯ ಪರೀಕ್ಷೆಗಳ ಮೂಲಕ ಸಮಸ್ಯೆಗಳನ್ನು ಕಂಡುಹಿಡಿಯುವುದು ಸಾಮಾನ್ಯ.

ಡೆಂಘೆ, ಮಲೇರಿಯಾ ಕಾಯಿಲೆ ಬಂದಾಗ ರಕ್ತ ಪರೀಕ್ಷೆ ಮೂಲಕ ರೋಗವನ್ನು ಪತ್ತೆಹಚ್ಚಬಹುದು. ಹೊಟ್ಟೆಯ ಸಮಸ್ಯೆಗಳನ್ನು ಅಲ್ಟ್ರಾಸೌಂಡ್ ಮೂಲಕ ನಿರ್ಣಯಿಸಲಾಗುತ್ತದೆ.

ಆದರೆ, ನಾವು ಆರೋಗ್ಯವಾಗಿದ್ದೇವೆಯೇ ಎಂದು ಯಾವುದೇ ಸಾಧನಗಳ ಸಹಾಯವಿಲ್ಲದೆ ತಿಳಿಯುವುದು ಹೇಗೆ? ಆರೋಗ್ಯ ತಜ್ಞರು ಹೇಳುವಂತೆ ನಾವು ಆರೋಗ್ಯದಿಂದಿರಲಿ ಅಥವಾ ಅನಾರೋಗ್ಯದಿಂದಿರಲಿ ಎರಡೂ ಸಂದರ್ಭಗಳಲ್ಲಿ ದೇಹವು ಕೆಲವು ಸಂಕೇತಗಳನ್ನು ನೀಡುತ್ತದೆ. ಅದರ ಮೂಲಕ ತಿಳಿಯಬಹುದು. ನೀವು ಆರೋಗ್ಯವಾಗಿದ್ದೀರಿ ಎನ್ನುವುದಕ್ಕೆ ಕೆಲವು ಲಕ್ಷಣಗಳಿವೆ. ಆ ಲಕ್ಷಣಗಳು ಯಾವುವು ಎಂಬುದನ್ನು ನಾವೀಗ ತಿಳಿಯೋಣ.

1. ಜೀರ್ಣಾಂಗ ವ್ಯವಸ್ಥೆ: ನಿಮ್ಮ ಜೀರ್ಣಕ್ರಿಯೆ ಚೆನ್ನಾಗಿದ್ದರೆ ನೀವು ಆರೋಗ್ಯವಂತರಾಗಿದ್ದೀರಿ ಎಂದರ್ಥ. ತಿಂದ ನಂತರ ವಾಯು ಸಮಸ್ಯೆ ಎದುರಾದರೆ ಜೀರ್ಣಾಂಗ ವ್ಯವಸ್ಥೆಯಲ್ಲಿ ಅಡಚಣೆ ಉಂಟಾಗಿದೆ ಎಂಬುದನ್ನು ಸೂಚಿಸುತ್ತದೆ. ನಮ್ಮ ದೇಹವು ಆಹಾರವನ್ನು ಚೆನ್ನಾಗಿ ಜೀರ್ಣಿಸಿಕೊಂಡರೆ, ನಮ್ಮ ಜೀರ್ಣಾಂಗ ವ್ಯವಸ್ಥೆಯು ಪೋಷಕಾಂಶಗಳನ್ನು ಪರಿಣಾಮಕಾರಿಯಾಗಿ ಹೀರಿಕೊಳ್ಳುತ್ತದೆ ಎಂದರ್ಥ.

2. ಸಾಕಷ್ಟು ನಿದ್ದೆ: ದೇಹದ ಆರೋಗ್ಯವನ್ನು ನಿದ್ರೆಯ ಗುಣಮಟ್ಟದಿಂದ ನಿರ್ಣಯಿಸಬಹುದು. ಆರೋಗ್ಯವಂತ ಜನರು ಉತ್ತಮ ನಿದ್ರೆ ಪಡೆಯುತ್ತಾರೆ. ನಿದ್ರೆಯಲ್ಲಿ ಸಮಸ್ಯೆ ಎದುರಾದರೆ ಆರೋಗ್ಯ ಕೆಟ್ಟಿದೆ ಎಂದರ್ಥ. ಒಬ್ಬ ವ್ಯಕ್ತಿ ಕನಿಷ್ಠ 8 ಗಂಟೆ ನಿದ್ದೆ ಮಾಡಲೇಬೇಕು. ರಾತ್ರಿ ನಿದ್ರೆ ಬರದೆ ಒದ್ದಾಡಿದರೆ ಅದು ಅನಾರೋಗ್ಯದ ಸಂಕೇತ. ನಿಮ್ಮ ದೇಹವು ಉತ್ತಮ ಗುಣಮಟ್ಟದ ನಿದ್ರೆಯನ್ನು ಪಡೆದರೆ ದೈಹಿಕ ಮತ್ತು ಮಾನಸಿಕ ಆರೋಗ್ಯವೂ ಉತ್ತಮವಾಗಿರುತ್ತದೆ.

3. ಮೂತ್ರದ ಬಣ್ಣ: ನಿಮ್ಮ ಆರೋಗ್ಯ ಚೆನ್ನಾಗಿದೆಯೇ ಎಂದು ತಿಳಿಯಲು ಮಲ ಮತ್ತು ಮೂತ್ರದ ಬಗ್ಗೆ ಗಮನ ಹರಿಸುವುದು ಬಹಳ ಮುಖ್ಯ. ಮಸುಕಾದ ಹಳದಿ ಮೂತ್ರವು ಸಾಮಾನ್ಯವಾಗಿ ನೀವು ಆರೋಗ್ಯವಾಗಿದ್ದೀರಿ ಎಂಬುದನ್ನು ಸೂಚಿಸುತ್ತದೆ. ಇದನ್ನು ಮೂತ್ರಪಿಂಡದ ಚೇತರಿಕೆಯ ಸಂಕೇತವೆಂದು ಪರಿಗಣಿಸಲಾಗುತ್ತದೆ. ಮೂತ್ರದ ಬಣ್ಣದಲ್ಲಿ ಬದಲಾದರೆ ತುಂಬಾ ಎಚ್ಚರಿಕೆ ವಹಿಸಬೇಕು.

4. ತೂಕವನ್ನು ನಿಯಂತ್ರಿಸುವುದು: ಅನೇಕ ರೋಗಗಳನ್ನು ತಡೆಗಟ್ಟಲು ತೂಕವನ್ನು ನಿಯಂತ್ರಿಸುವುದು ಅವಶ್ಯಕ. ನಿಮ್ಮ ತೂಕವು ನಿಮ್ಮ ದೇಹದ ಎತ್ತರಕ್ಕೆ ಸರಿಯಾಗಿದ್ದರೆ ಅದು ಉತ್ತಮ ಆರೋಗ್ಯದ ಸಂಕೇತವಾಗಿದೆ. ನಿಮ್ಮ ತೂಕವು ಕಡಿಮೆ ಸಮಯದಲ್ಲಿ ವೇಗವಾಗಿ ಹೆಚ್ಚಾಗುತ್ತಿದ್ದರೆ ಅಥವಾ ಕಡಿಮೆಯಾಗುತ್ತಿದ್ದರೆ, ಜಾಗರೂಕರಾಗಿರಿ. ತೂಕದ ಅಸಮತೋಲನವು ವಿವಿಧ ದೀರ್ಘಕಾಲದ ಕಾಯಿಲೆಗಳಿಗೆ ಕಾರಣವಾಗಬಹುದು.

5. ಉತ್ತಮ ಮಾನಸಿಕ ಆರೋಗ್ಯ: ದೈಹಿಕ ಆರೋಗ್ಯದಂತೆಯೇ ಮಾನಸಿಕ ಆರೋಗ್ಯದ ಕಾಳಜಿಯೂ ಬಹಳ ಮುಖ್ಯ. ನೀವು ಕಡಿಮೆ ಒತ್ತಡದಲ್ಲಿದ್ದರೆ, ನಿಮ್ಮ ಮನಸ್ಸು ಶಾಂತವಾಗಿರುತ್ತದೆ. ಕಿರಿಕಿರಿ ಮತ್ತು ಭಯದಂತಹ ಯಾವುದೇ ಸಮಸ್ಯೆಗಳು ಇಲ್ಲದಿದ್ದರೆ ಇದು ಉತ್ತಮ ಮಾನಸಿಕ ಆರೋಗ್ಯದ ಸಂಕೇತವಾಗಿದೆ. ಇಲ್ಲಿ ಗಮನಿಸಬೇಕಾದ ಅಂಶವೆಂದರೆ ದೈಹಿಕ ಮತ್ತು ಮಾನಸಿಕ ಆರೋಗ್ಯವು ಒಂದಕ್ಕೊಂದು ಪೂರಕವಾಗಿದೆ. ಇವುಗಳಲ್ಲಿ ಯಾವುದಾದರೂ ಒಂದು ಅಡಚಣೆಯು ಇಡೀ ದೇಹದ ಮೇಲೆ ಪ್ರತಿಕೂಲ ಪರಿಣಾಮ ಬೀರುತ್ತದೆ.

6. ಗಾಯಗಳು ತ್ವರಿತವಾಗಿ ಗುಣವಾಗುವುದು: ದೇಹದ ಮೇಲಿನ ಗಾಯ ಎಷ್ಟು ಬೇಗನೆ ವಾಸಿಯಾಗುತ್ತದೆ ಎಂಬುದರ ಆಧಾರದ ಮೇಲೆ ಆರೋಗ್ಯವನ್ನು ನಿರ್ಣಯಿಸಬಹುದು. ಗಾಯಗಳು ಬೇಗನೆ ವಾಸಿಯಾಗುವುದು ನಮ್ಮ ರೋಗನಿರೋಧಕ ವ್ಯವಸ್ಥೆಯು ಆರೋಗ್ಯಕರವಾಗಿರುವುದರ ಸಂಕೇತವಾಗಿದೆ. ಮಧುಮೇಹದಂತಹ ಕಾಯಿಲೆಗಳಿದ್ದಾಗ ರೋಗನಿರೋಧಕ ಶಕ್ತಿ ದುರ್ಬಲಗೊಂಡು, ಗಾಯಗಳು ವಾಸಿಯಾಗಲು ಬಹಳ ಸಮಯ ತೆಗೆದುಕೊಳ್ಳುತ್ತದೆ.

7. ಪದೇಪದೆ ಜ್ವರ ಬರದಿರುವುದು: ಆರೋಗ್ಯಕರ ಪ್ರತಿರಕ್ಷಣಾ ವ್ಯವಸ್ಥೆಯನ್ನು ಆರೋಗ್ಯಕರ ದೇಹದ ಸಂಕೇತವೆಂದು ಪರಿಗಣಿಸಲಾಗುತ್ತದೆ. ರೋಗನಿರೋಧಕ ಶಕ್ತಿ ಹೊಂದಿರುವ ಜನರು ಅನಾರೋಗ್ಯಕ್ಕೆ ಒಳಗಾಗುವ ಸಾಧ್ಯತೆ ಕಡಿಮೆ. ಅಂತಹ ಜನರು ಶೀತ ಅಥವಾ ಇತರ ಯಾವುದೇ ಸಾಂಕ್ರಾಮಿಕ ರೋಗಗಳನ್ನು ತಡೆಯುವ ಶಕ್ತಿ ಹೊಂದಿರುತ್ತಾರೆ. ಅಲ್ಲದೆ, ಪದೇಪದೆ ಜ್ವರದ ಸಮಸ್ಯೆ ಕಾಣಿಸಿಕೊಳ್ಳುವುದಿಲ್ಲ.

ಹಕ್ಕು ನಿರಾಕರಣೆ: ಲೇಖನದಲ್ಲಿ ಉಲ್ಲೇಖಿಸಲಾದ ಸಲಹೆಗಳು ಸಾಮಾನ್ಯ ಮಾಹಿತಿಗಾಗಿ ಮಾತ್ರ. ನೀವು ಯಾವುದೇ ಪ್ರಶ್ನೆಗಳನ್ನು ಹೊಂದಿದ್ದರೆ ಯಾವಾಗಲೂ ನಿಮ್ಮ ವೈದ್ಯರನ್ನು ಸಂಪರ್ಕಿಸಿ.