ಶಿಕ್ಷಕಿ ಮುಖ ನೋಡ್ತಿದ್ದಂತೆ ಮೊಬೈಲ್ ಬಿಸಾಡಿದ ಮಕ್ಕಳು! ಟೀಚರ್​ನ ವಿನೂತನ ಪ್ರಯತ್ನಕ್ಕೆ ಸಿಕ್ತು ಫುಲ್​ ಮಾರ್ಕ್ಸ್​

 ಇತ್ತೀಚಿನ ದಿನಗಳಲ್ಲಿ ಸ್ಮಾರ್ಟ್​ಫೋನ್​ ಹಾವಳಿ ಬಲು ಜೋರಾಗಿದೆ. ದಿನದಿಂದ ದಿನಕ್ಕೆ ಮೊಬೈಲ್ ಬಳಕೆದಾರರ ಸಂಖ್ಯೆ ಕೂಡ ಹೆಚ್ಚುತ್ತಿದೆ. ಅದರಲ್ಲೂ ಪುಟ್ಟ ಪುಟ್ಟ ಮಕ್ಕಳು ಈ ಸ್ಮಾರ್ಟ್​ಫೋನ್​ಗೆ ಹೆಚ್ಚು ಆಕರ್ಷಿತರಾಗುತ್ತಿದ್ದಾರೆ. ಮನೆಗೆ ಬಂದರೆ ಸಾಕು ತಂದೆ-ತಾಯಿ ಬಳಸುವ ಫೋನ್​ ಅನ್ನು ಕಸಿದು ಒಂದು ಮೂಲೆಯಲ್ಲಿ ಕುಳಿತುಬಿಟ್ಟರೆ ಮುಗಿಯಿತು!

ತಿಂಡಿ, ಊಟ, ನಿದ್ರೆ ಇದ್ಯಾವುದು ಬೇಕಾಗಿಲ್ಲ. ಶಾಲೆಯಲ್ಲಿ ಕೊಟ್ಟ ಹೋಂವರ್ಕ್​ ಬೇಡ, ಪೋಷಕರ ಅಪ್ಪುಗೆ, ಪ್ರೀತಿಯ ಮಾತುಗಳಂತು ಬೇಡವೇ ಬೇಡ. ಸದಾ ಸ್ಮಾರ್ಟ್​ಫೋನದ್ದೇ ಧ್ಯಾನ ಎನ್ನುವಂತಾಗಿದೆ ಮಕ್ಕಳ ದಿನಚರಿ. ಈ ವಿಷಯದಲ್ಲಿ ಪೋಷಕರು ಕೂಡ ಸೋಲಿಗೆ ಶರಣಾಗಿದ್ದು, ತಮ್ಮ ಮಕ್ಕಳನ್ನು ಮೊಬೈಲ್​ ಚಟದಿಂದ ಬೇರ್ಪಡಿಸಲು ಸಾಧ್ಯವಾಗಿಲ್ಲ. ಇದರಿಂದ ಸದ್ಯ ಪೋಷಕರು ಕೂಡ ಕಂಗಾಲಾಗಿದ್ದಾರೆ. ಆದ್ರೆ, ಇಲೊಬ್ಬರು ಶಾಲಾ ಶಿಕ್ಷಕಿ, ತಮ್ಮ ವಿದ್ಯಾರ್ಥಿಗಳಿಗೆ ಇನ್ಯಾವತ್ತು ಮೊಬೈಲ್ ಮುಟ್ಟದಂತೆ ನೀಡಿದ ಎಚ್ಚರಿಕೆಯ ವಿಡಿಯೋ ಸದ್ಯ ಸೋಷಿಯಲ್ ಮೀಡಿಯಾದಲ್ಲಿ ಸಿಕ್ಕಾಪಟ್ಟೆ ವೈರಲ್ ಆಗಿದೆ.

ಕಡಿಮೆ ದರದ ಇಂಟರ್​ನೆಟ್​, ದಿನದ 24 ಗಂಟೆಯೂ 5ಜಿ ಜತೆ ಕೈಗೆಟುಕುವ ದರದಲ್ಲಿ ಮಾರುಕಟ್ಟೆಯಲ್ಲಿ ಸಿಗುತ್ತಿರುವ ಆಕರ್ಷಕ ಸ್ಮಾರ್ಟ್​ಫೋನ್​. ಇಷ್ಟೆಲ್ಲಾ ಸುಲಭವಾಗಿ ಲಭ್ಯವಿರುವಾಗ ಮೊಬೈಲ್ ಬಳಕೆಯಲ್ಲಿ ಇಳಿಕೆ ಕಾಣಬೇಕು ಎಂದರೆ ಹೇಗೆ ಸಾಧ್ಯ? ಪ್ರತಿ ಮನೆಯಲ್ಲಿ ಕನಿಷ್ಠ ಎಂದರೆ ಮೂರರಿಂದ ನಾಲ್ಕು ಫೋನ್​ಗಳು ಇದೆ. ಹೀಗಿದ್ದಮೇಲೆ ಬಳಕೆದಾರರ ಸಂಖ್ಯೆ ಕೂಡ ಅಧಿಕವಾಗಿದೆ. ಜನರ ಜೀವನಶೈಲಿಯನ್ನೇ ಬದಲಾಯಿಸಿರುವ ಸ್ಮಾರ್ಟ್​ಫೋನ್​ಗಳು​ ಭಾವನೆಗಳನ್ನು ಬಂಧಿಸಿ, ಜನರನ್ನು ತಲೆತಗ್ಗಿಸಿಯೇ ಇರುವಂತೆ ಮಾಡಿಬಿಟ್ಟಿದೆ. ಸದ್ಯ ಇದೇ ಹಾದಿಯಲ್ಲಿ ಮಕ್ಕಳು ಕೂಡ ಮುಂದುವರಿದಿದ್ದು, ಮೊಬೈಲ್ ಇಲ್ಲದಿದ್ದರೆ ಊಟ, ಪಾಠ ಏನು ಬೇಡ ಎನ್ನುವಷ್ಟರ ಮಟ್ಟಿಗೆ ಸ್ಮಾರ್ಟ್​ಫೋನ್​ ಜಾಲಕ್ಕೆ ಸಿಲುಕಿದ್ದಾರೆ.

ಮೊಬೈಲ್ ಕಿತ್ತುಕೊಂಡರೆ ಮಕ್ಕಳ ಅಳಲು, ಊಟ ಮಾಡದಿದ್ದರೆ ಸ್ಮಾಟ್​ಫೋನ್​ ಕೊಟ್ಟು ಊಟ ಮಾಡಿಸುವುದು ಹೀಗೆ ಪೋಷಕರ ನಾನಾ ಸಮಸ್ಯೆಗಳನ್ನು ಬಹಳ ಸೂಕ್ಷ್ಮವಾಗಿ ಅರಿತ ಶಿಕ್ಷಕಿಯೊಬ್ಬರು ತಮ್ಮ ಶಾಲಾ ಮಕ್ಕಳು ಮೊಬೈಲ್​ ಮುಟ್ಟಲು ಭಯಪಡಬೇಕು ಆ ರೀತಿ ಎಚ್ಚರಿಸಲು ಒಂದು ವಿನೂತನ ಪ್ರಯತ್ನ ಮಾಡಿ ಇದೀಗ ಯಶಸ್ವಿಯಾಗಿದ್ದಾರೆ. ಪ್ರಾರ್ಥನೆಗೆಂದು ಶಾಲಾ ಆವರಣದಲ್ಲಿ ನಿಂತಿದ್ದ ಮಕ್ಕಳ ಎದುರು ತನ್ನ ಮುಖದ ಎಡಭಾಗವನ್ನು ಬಟ್ಟೆಯಲ್ಲಿ ಮುಚ್ಚಿಕೊಂಡು ಬಂದ ಶಿಕ್ಷಕಿ, ಅತೀ ಹೆಚ್ಚಾಗಿ ಮೊಬೈಲ್ ಬಳಕೆ ಮಾಡಿದ ಕಾರಣ ಕಣ್ಣಿನಿಂದ ರಕ್ತ, ಮುಖದಲ್ಲಿ ಭೀಕರ ಗಾಯ ಆಗಿದೆ ಎಂದು ವಿದ್ಯಾರ್ಥಿಗಳಿಗೆ ತೋರಿಸಿದ್ದಾರೆ.

ಬೆಳಗ್ಗೆ, ರಾತ್ರಿ ತುಂಬ ಮೊಬೈಲ್ ಬಳಕೆ ಮಾಡಿದ ಪರಿಣಾಮ ನನ್ನ ಮುಖ ಹೀಗಾಯಿತು. ನೀವು ಸ್ಮಾರ್ಟ್​ಫೋನ್ ಮುಟ್ಟಬೇಡಿ ಪ್ಲೀಸ್ ಎಂದು ಶಿಕ್ಷಕಿ ಮಕ್ಕಳ ಬಳಿ ಮನವಿ ಮಾಡಿದ್ದಾರೆ. ಇದನ್ನು ನೋಡ್ತಿದ್ದಂತೆ ವಿದ್ಯಾರ್ಥಿಗಳು ಭಯಭೀತರಾಗಿದ್ದು, ಸಹ ಶಿಕ್ಷಕಿಯರು ಮೊಬೈಲ್ ಹಿಡಿಯುವಂತೆ ಕೈಗೆ ಕೊಟ್ಟರು ಕೂಡ ಇಲ್ಲ ನನಗೆ ಬೇಡ ಎಂದು ದೂರ ತಳ್ಳಿದ್ದಾರೆ. ಇಲ್ಲ ಪರವಾಗಿಲ್ಲ, ಏನು ಆಗುವುದಿಲ್ಲ ತೆಗೆದುಕೊಳ್ಳಿ ಎಂದು ಮಕ್ಕಳಿಗೆ ಒತ್ತಾಯಿಸಿದರೆ, ಅವರು ಬೇಡ, ನಮ್ಮ ಶಿಕ್ಷಕಿಗೆ ಆದ ಪರಿಸ್ಥಿತಿ ನಮಗೂ ಬರುತ್ತದೆ, ಇದನ್ನು ನಾವು ಮುಟ್ಟುವುದಿಲ್ಲ ಎಂದು ಸ್ಮಾರ್ಟ್​ಫೋನ್​ ಬಿಸಾಡಿದ್ದಾರೆ. ಸದ್ಯ ಈ ವಿಡಿಯೋ ಜಾಲತಾಣಗಳಲ್ಲಿ ನೆಟ್ಟಿಗರ ಗಮನಸೆಳೆದಿದ್ದು, ಪೋಷಕರು ಶಿಕ್ಷಕಿಯ ಪ್ರಯತ್ನವನ್ನು ಮೆಚ್ಚಿ, ಕೊಂಡಾಡಿದ್ದಾರೆ.