ಪಾಕಿಸ್ತಾನದಲ್ಲಿ ಗಣಿ ಮೇಲೆ ಶಸ್ತ್ರಧಾರಿಗಳ ದಾಳಿ: ಕನಿಷ್ಠ 20 ಕಾರ್ಮಿಕರು ಸಾವು

 ಕ್ವೆಟ್ಟಾ : ಬಲೂಚಿಸ್ತಾನ ಪ್ರಾಂತ್ಯದ ಖಾಸಗಿ ಕಲ್ಲಿದ್ದಲು ಗಣಿ ಮೇಲೆ ಶಸ್ತ್ರಧಾರಿಗಳು ಶುಕ್ರವಾರ ನಡೆಸಿದ ದಾಳಿಯಲ್ಲಿ ಕನಿಷ್ಠ 20 ಕಾರ್ಮಿಕರು ಮೃತಪಟ್ಟು, ಏಳು ಮಂದಿ ಗಾಯಗೊಂಡಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.

'ಶಸ್ತ್ರಧಾರಿಗಳ ಗುಂಪು ಡುಕಿ ಪ್ರದೇಶದಲ್ಲಿರುವ ಜುನೈದ್‌ ಕಲ್ಲಿದ್ದಲು ಕಂಪನಿಯ ಗಣಿ ಮೇಲೆ ಮುಂಜಾನೆಯೇ ಭಾರೀ ಶಸ್ತ್ರಾಸ್ತ್ರಗಳೊಂದಿಗೆ ದಾಳಿ ಮಾಡಿದೆ.

ರಾಕೆಟ್‌, ಗ್ರೆನೇಡ್‌ಗಳನ್ನು ಹಾರಿಸಲಾಗಿದೆ' ಎಂದು ಡುಕಿ ಪೊಲೀಸ್‌ ಠಾಣಾಧಿಕಾರಿ ಹುಮಾಯೂನ್‌ ಖಾನ್‌ ತಿಳಿಸಿದ್ದಾರೆ.

'ಈವರೆಗೆ 20 ಶವಗಳನ್ನು ಜಿಲ್ಲಾಸ್ಪತ್ರೆಗೆ ತರಲಾಗಿದೆ. 6 ಮಂದಿಗೆ ಚಿಕಿತ್ಸೆ ನೀಡುತ್ತಿದ್ದೇವೆ' ಎಂದು ಡುಕಿ ಆಸ್ಪತ್ರೆಯ ವೈದ್ಯ ಜೋಹರ್‌ ಖಾನ್‌ ಶದಿಜೈ ಹೇಳಿದ್ದಾರೆ.