ದೋಹಾ, ಕತಾರ್‌: ಕಳೆದ ವರ್ಷ ಅಕ್ಟೋಬರ್ 7ರಂದು ನಡೆಸಿದ ದಾಳಿಯು ಇಸ್ರೇಲ್ ಅನ್ನು ಶೂನ್ಯಕ್ಕಿಳಿಸಿದೆ ಎಂದು ಹಮಾಸ್‌ನ ಹಿರಿಯ ಅಧಿಕಾರಿಯೊಬ್ಬರು ಸೋಮವಾರ ತಿಳಿಸಿದ್ದಾರೆ.
ಇಸ್ರೇಲ್ ಮೇಲಿನ ದಾಳಿಗೆ ಒಂದು ವರ್ಷ ತುಂಬಿದ ದಿನದಂದೇ ಅವರಿಂದ ಈ ಹೇಳಿಕೆ ಹೊರಬಿದ್ದಿದೆ.
'ಅಲ್ ಅಕ್ಸಾ ಫ್ಲಡ್ (ಕಾರ್ಯಾಚರಣೆಯ ಹೆಸರು) ಇಸ್ರೇಲ್ ಅನ್ನು ಶೂನ್ಯಕ್ಕಿಳಿಸಿದ್ದು ಮಾತ್ರವಲ್ಲದೆ, ಅದರ ಅಸ್ತಿತ್ವಕ್ಕೂ ಬೆದರಿಕೆಯೊಡ್ಡಿದೆ' ಎಂದು ಹಮಾಸ್ ಬಂಡುಕೋರ ಸಂಘಟನೆಯ ಮಾಜಿ ಮುಖ್ಯಸ್ಥ ಖಾಲಿದ್ ಮೆಶಾಲ್, ಅಲ್ ಅರಬಿಯಾ ಟಿ.ವಿ. ಜೊತೆಗಿನ ಸಂದರ್ಶನದಲ್ಲಿ ಹೇಳಿದ್ದಾರೆ.
'ಅಲ್-ಅಕ್ಸಾ ಕಬಳಿಸಲು ಹಾಗೂ ಆಕ್ರಮಿಸಲು ಇಸ್ರೇಲ್ ಮಾಡುತ್ತಿರುವ ತೀವ್ರಗತಿಯ ಯೋಜನೆಗಳಿಗೆ ಆ ದಾಳಿ ಸಹಜ ಪ್ರತಿಕ್ರಿಯೆಯಾಗಿತ್ತು' ಎಂದು ಅವರು ಹೇಳಿದ್ದಾರೆ. ಅಲ್ಲದೆ ದೀರ್ಘಕಾಲಿನ ಶಾಂತಿ ಒಪ್ಪಂದದ ಹೊರತಾಗಿಯೂ ಇಸ್ರೇಲ್, ಈಜಿಪ್ಟ್ ಹಾಗೂ ಜೋರ್ಡಾನ್‌ಗೂ ಬೆದರಿಕೆಯೊಡ್ಡುತ್ತಿದೆ' ಎಂದಿದ್ದಾರೆ.
ಆ ವಲಯದಲ್ಲಿರುವ ಪ್ರತಿಯೊಬ್ಬರೂ ತನಗೆ ಅಧೀನರಾಗಿರಬೇಕೆಂದು ಇಸ್ರೇಲ್ ಬಯಸುತ್ತದೆ. ತನ್ನ ವಿರುದ್ಧ ಹೋರಾಟ ಮಾಡದ ದೇಶಗಳ ಬಗ್ಗೆಯೂ ಇಸ್ರೇಲ್ ಇದನ್ನೇ ಬಯಸುತ್ತದೆ. ಅರಬ್ ಹಾಗೂ ಇಸ್ಲಾಮಿಕ್ ದೇಶಗಳ ಭದ್ರತೆಗಳ ಮೇಲೆ ಎಲ್ಲಾ ಕಡೆಯೂ ಇಸ್ರೇಲ್ ದಾಳಿ ನಡೆಸುತ್ತದೆ' ಎಂದು ಅವರು ಹೇಳಿದ್ದಾರೆ.
ಇಸ್ರೇಲ್ ಅಧಿಕಾರಿಗಳ ಮಾಹಿತಿ ಪ್ರಕಾರ ಈ ಯುದ್ದ ಆರಂಭವಾದ ಬಳಿಕ 1,205 ಮಂದಿ ಸಾವಿಗೀಡಾಗಿದ್ದಾರೆ. ಇದರಲ್ಲಿ ಬಹುತೇಕರು ನಾಗರಿಕರು. ಈ ಮೊತ್ತದಲ್ಲಿ ಸಾವಿಗೀಡಾದ ಒತ್ತೆಯಾಳುಗಳ ಸಂಖ್ಯೆಯೂ ಸೇರಿದೆ.
ಗಾಜಾದಲ್ಲಿ ಇಸ್ರೇಲ್ ದಾಳಿಯಿಂದಾಗಿ ಇದುವರೆಗೂ 41,870 ಪ್ಯಾಲೆಸ್ಟೀನಿಯನ್ನರು ಸಾವಿಗೀಡಾಗಿದ್ದು, ಇದರಲ್ಲಿ ಬಹುತೇಕ ಮಂದಿ ಜನಸಮಾನ್ಯರೇ. ಗಾಜಾದಲ್ಲಿ ಹಮಾಸ್ ನಡೆಸುತ್ತಿರುವ ಆರೋಗ್ಯ ಇಲಾಖೆ ನೀಡಿದ ಸಂಖ್ಯೆ ಇದು.
DOCTYPE html>
