ಅಹಮದಾಬಾದ್‌ | ಜಿಎಸ್‌ಟಿ ಹಗರಣ: ಪತ್ರಕರ್ತನ ಬಂಧನ

         ಅಹಮದಾಬಾದ್‌: ಸರಕು ಮತ್ತು ಸೇವಾ ತೆರಿಗೆ (ಜಿಎಸ್‌ಟಿ) ಹಗರಣಕ್ಕೆ ಸಂಬಂಧಿಸಿದ ಆರೋಪದಲ್ಲಿ ಗುಜರಾತ್‌ನ ಪ್ರಮುಖ ದಿನಪತ್ರಿಕೆಯ ಹಿರಿಯ ಪತ್ರಕರ್ತ ಮಹೇಶ್ ಲಾಂಗಾ ಅವರನ್ನು ಅಹಮದಾಬಾದ್ ಅಪರಾಧ ದಳದ ಪೊಲೀಸರು ಮಂಗಳವಾರ ಬಂಧಿಸಿದ್ದಾರೆ.

          ವಿಚಾರಣೆ ನಡೆಸಿದ ನಂತರ ಮಹೇಶ್ ಅವರನ್ನು ಬಂಧಿಸಲಾಗಿದೆ ಎಂದು ಉಪ ಪೊಲೀಸ್‌ ಆಯುಕ್ತ ಅಜಿತ್‌ ರಾಜಿಯಾನ್‌ ತಿಳಿಸಿದ್ದಾರೆ.

           ಮಹೇಶ್‌ ಅವರ ಪತ್ನಿ ಮತ್ತು ತಂದೆ ಹೆಸರಿನಲ್ಲಿ ನಕಲಿ ಸಂಸ್ಥೆಗಳ ಮೂಲಕ ಶಂಕಾಸ್ಪದ ರೀತಿಯಲ್ಲಿ ಹಣಕಾಸು ವರ್ಗಾವಣೆಯಾಗಿದೆ ಎಂದು ತಿಳಿಸಿದರು.

          ಕೇಂದ್ರೀಯ ಜಿಎಸ್‌ಟಿ ಮಂಡಳಿ ದೂರಿನ ಅನ್ವಯ ಸೋಮವಾರ ಹಲವಾರು ವ್ಯಕ್ತಿಗಳು ಮತ್ತು ಸಂಸ್ಥೆಗಳ ವಿರುದ್ಧ ಎಫ್‌ಐಆರ್‌ ದಾಖಲಿಸಲಾಗಿತ್ತು. ಈ ಬೆನ್ನಲ್ಲೇ ಗುಜರಾತ್ ಆರ್ಥಿಕ ಅಪರಾಧ ದಳದೊಂದಿಗೆ 14 ಕಡೆಗಳಲ್ಲಿ ಶೋಧ ನಡೆಸಲಾಯಿತು. ಸುಮಾರು 200 ನಕಲಿ ಸಂಸ್ಥೆಗಳ ಮೂಲಕ ಹಗರಣ ನಡೆಸಿರುವುದು ತನಿಖೆ ವೇಳೆ ಗೊತ್ತಾಗಿದೆ. ಇದಕ್ಕಾಗಿ ನಕಲಿ ದಾಖಲೆಗಳು ಮತ್ತು ಗುರುತಿನ ಚೀಟಿ ಬಳಸಲಾಗುತ್ತಿತ್ತು ಎಂದು ತಿಳಿಸಿದರು.