ಗಾಜಾಪಟ್ಟಿಯ ಉತ್ತರ ಭಾಗದ ಸಂಪೂರ್ಣ ತೆರವಿಗೆ ಇಸ್ರೇಲ್‌ ಆದೇಶ

          ಡೇರ್‌ ಅಲ್‌ ಬಾಲಾ : ಗಾಜಾಪಟ್ಟಿಯ ಉತ್ತರ ಭಾಗವನ್ನು ಹಾಗೂ ಗಾಜಾ ನಗರವನ್ನು ಸಂಪೂರ್ಣವಾಗಿ ತೆರವು ಮಾಡುವಂತೆ ಇಸ್ರೇಲ್ ಸೇನೆಯು ಪ್ಯಾಲೆಸ್ಟೀನಿಯನ್ನರಿಗೆ ಹೊಸ ಆದೇಶ ಹೊರಡಿಸಿದೆ.

        ಈ ಭಾಗದ ಆಸ್ಪತ್ರೆಗಳಲ್ಲಿನ ರೋಗಿಗಳೂ ಸ್ಥಳಾಂತರಗೊಳ್ಳಬೇಕು ಎಂದೂ ಇಸ್ರೇಲ್‌ ತಿಳಿಸಿದೆ.

ಆದರೆ, ಯಾವ ದಿನಾಂಕದಲ್ಲಿ ಪ್ರಕ್ರಿಯೆ ನಡೆಯಬೇಕು ಎಂಬುದನ್ನು ಖಚಿತವಾಗಿ ತಿಳಿಸಿಲ್ಲ. 'ನಮ್ಮನ್ನು ಇಲ್ಲಿಂದ ಓಡಿಸಿ, ತಮ್ಮ ಸೇನಾ ನೆಲೆ ಸ್ಥಾಪಿಸಿ, ಯಹೂದಿಗಳನ್ನು ಇಲ್ಲಿ ನೆಲೆಯೂರಿಸಬೇಕು ಎಂದು ಇಸ್ರೇಲ್‌ ಬಯಸಿದೆ' ಎಂದು ಪ್ಯಾಲೆಸ್ಟೀನಿಯರು ಆತಂಕ ವ್ಯಕ್ತಪಡಿಸಿದ್ದಾರೆ.

          ಯುದ್ಧ ಆರಂಭವಾದ ಕೆಲ ದಿನಗಳ ಬಳಿಕ, ಇಸ್ರೇಲ್‌ ಸೇನೆಯು ಗಾಜಾಪಟ್ಟಿಯ ಉತ್ತರ ಭಾಗದಲ್ಲಿದ್ದ ಜನರನ್ನು ತೆರವು ಮಾಡಿಸಿತ್ತು. ಒಂದು ವರ್ಷ ಸತತ ದಾಳಿಯ ಬಳಿಕವೂ ಈ ಭಾಗದಲ್ಲಿ 4 ಲಕ್ಷ ಪ್ಯಾಲೆಸ್ಟೀನಿಯರು ಉಳಿದುಕೊಂಡಿದ್ದರು. ಗಾಜಾಪಟ್ಟಿಯ ಕೇಂದ್ರ ಭಾಗದ ಮೇಲೆ ಇಸ್ರೇಲ್‌ ವಾಯುದಾಳಿ ಮುಂದುವರಿಸಿದ್ದು, ಒಂದೇ ಕುಟುಂಬದ ಎಂಟು ಮಂದಿ ಮೃತಪಟ್ಟಿದ್ದಾರೆ.