ಭಾರತ, ಮೋದಿ ಅಮೆರಿಕದ ಉತ್ತಮ ಸ್ನೇಹಿತ | ಬಾಂಗ್ಲಾ ಅರಾಜಕತೆ ಖಂಡಿಸಿದ ಟ್ರಂಪ್

 ವಾಷಿಂಗ್ಟನ್‌: ಬಾಂಗ್ಲಾದೇಶದಲ್ಲಿ ಹಿಂದೂಗಳ ಮೇಲಿನ ದಾಳಿಯನ್ನು ಖಂಡಿಸಿರುವ ಅಧ್ಯಕ್ಷೀಯ ಚುನಾವಣೆಯಲ್ಲಿ ಸ್ಪರ್ಧಿಸಿರುವ ರಿಪಬ್ಲಿಕನ್‌ ಪಕ್ಷದ ಅಭ್ಯರ್ಥಿ ಡೊನಾಲ್ಡ್‌ ಟ್ರಂಪ್, ಭಾರತದೊಂದಿಗಿನ ಸಂಬಂಧವನ್ನು ಬಲಪಡಿಸುವುದಾಗಿ ಪ್ರತಿಜ್ಞೆ ಮಾಡಿದರು. ಪ್ರಧಾನಿ ನರೇಂದ್ರ ಮೋದಿಯವರನ್ನು ತಮ್ಮ ಉತ್ತಮ ಸ್ನೇಹಿತ ಎಂದು ಬಣ್ಣಿಸಿದರು.

ಸಾಮಾಜಿಕ ಜಾಲತಾಣ ಎಕ್ಸ್‌ನಲ್ಲಿ ಟ್ರಂಪ್‌ ದೀಪಾವಳಿ ಶುಭಾಶಯ ಕೋರಿದ್ದಾರೆ. ಬಾಂಗ್ಲಾದಲ್ಲಿನ ಅಸ್ಥಿರತೆಯ ಕುರಿತು ಬರೆದುಕೊಂಡಿರುವ ಅವರು, 'ನನ್ನ ಅವಧಿಯಲ್ಲಿ ಎಂದಿಗೂ ಇದು ಸಂಭವಿಸುವುದಿಲ್ಲ. ಕಮಲಾ ಮತ್ತು ಬೈಡನ್‌ ಜಗತ್ತಿನಾದ್ಯಂತ ಮತ್ತು ಅಮೆರಿಕದಲ್ಲಿನ ಹಿಂದೂಗಳನ್ನು ನಿರ್ಲಕ್ಷಿಸಿದ್ದಾರೆ. ಇಸ್ರೇಲ್‌, ಉಕ್ರೇನ್‌ನಿಂದ ನಮ್ಮ ಗಡಿಗೆ ವಿಪತ್ತು ತಂದಿದ್ದಾರೆ. ಈಗ ಅಮೆರಿಕವನ್ನು ಮತ್ತೆ ಬಲಗೊಳಿಸಿ ಶಕ್ತಿ ತುಂಬಿ ಶಾಂತಿಯನ್ನು ಮರಳಿ ತರುತ್ತೇವೆ' ಎಂದು ಭರವಸೆ ನೀಡಿದರು.

ಬಾಂಗ್ಲಾದೇಶದ ಅರಾಜಕತೆಯ ಬಗ್ಗೆ ಇದೇ ಮೊದಲ ಬಾರಿಗೆ ಟ್ರಂಪ್‌ ಮಾತನಾಡಿದ್ದಾರೆ.

'ನಮ್ಮ ಆಡಳಿತದ ಅವಧಿಯಲ್ಲಿ ಎಡಪಂಥೀಯರ ಧರ್ಮ ವಿರೋಧಿ ಕಾರ್ಯಸೂಚಿಯ ವಿರುದ್ಧ ಹೋರಾಡಿ ಅಮೆರಿಕದಲ್ಲಿರುವ ಹಿಂದೂಗಳನ್ನು ರಕ್ಷಿಸುತ್ತೇವೆ, ನಿಮ್ಮ ಸ್ವಾತಂತ್ರ್ಯಕ್ಕಾಗಿ ನಾವು ಹೋರಾಡುತ್ತೇವೆ. ಭಾರತ ಮತ್ತು ಅಮೆರಿಕ ಉತ್ತಮ ಸ್ನೇಹಿತ. ಪ್ರಧಾನಿ ಮೋದಿಯವರೊಂದಿಗೆ ನಮ್ಮ ಉತ್ತಮ ಪಾಲುದಾರಿಕೆಯನ್ನು ಬಲಪಡಿಸುತ್ತೇವೆ' ಎಂದು ಟ್ರಂಪ್ ಹೇಳಿದ್ದಾರೆ.