ಬಂಗಾಳದಲ್ಲಿ ಮಹಿಳೆಯರ ಸುರಕ್ಷತೆಗಾಗಿ ಕೇರಳದ ಕಳರಿಪಯಟ್

ಕೋಲ್ಕತ್ತಾ: ಡಾ.ಸಿ.ವಿ. ಆನಂದ ಬೋಸ್ ಅವರು ಬಂಗಾಳದ ಗವರ್ನರ್ ಆಗಿ ಎರಡು ವರ್ಷಗಳ ಅವಧಿಯಲ್ಲಿ ಆಯೋಜಿಸಿದ್ದ 'ಅಪ್ನಾ ಭಾರತ್ ಜಗ್ತಾ ಬೆಂಗಾಲ್' ಕಾರ್ಯಕ್ರಮದ ಸಂದರ್ಭದಲ್ಲಿ ಕೇರಳದ ಸಾಂಪ್ರದಾಯಿಕ ಸಮರ ಕಲೆಯಾದ ಕಳರಿಪಯಟ್ ಅನ್ನು ರಾಜಭವನದಲ್ಲಿ ಆಯೋಜಿಸಲಾಗಿತ್ತು.

ಬಾಲಕಿಯರಿಗಾಗಿ 'ಅಭಯ ಪ್ಲಸ್ ಆತ್ಮರಕ್ಷಣಾ ತರಬೇತಿ ಕಾರ್ಯಕ್ರಮ'ದಲ್ಲಿ ಕರಾಟೆ ಜೊತೆಗೆ ಕಳರಿಪಯಟ್ ಸೇರಿಸಲಾಗಿದೆ.

ಉತ್ತರ 24 ಪರಗಣ ಜಿಲ್ಲೆಯ ಬರಸಮ್‍ನಲ್ಲಿ ಭಾನುವಾರ ನಡೆದ 'ಭಾಯಿ ಪೋಟಾ' ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದ ರಾಜ್ಯಪಾಲ ಆನಂದ ಬೋಸ್ ಅವರು ಇದನ್ನು ಘೋಷಿಸಿದರು. ಬಂಗಾಳದಲ್ಲಿ, 'ಭಾಯ್ ಪೋಟಾ' ಎಂಬುದು ಕಾಳಿ ಪೂಜೆಯ ಎರಡನೇ ದಿನದಂದು ಸಹೋದರ ಸಹೋದರಿಯರ ನಡುವಿನ ಬಾಂಧವ್ಯವನ್ನು ಬಲಪಡಿಸುವ ಆಚರಣೆಯಾಗಿದೆ.

ಕಳರಿಪಯಟ್ ಮತ್ತು ಕರಾಟೆಯನ್ನು ಸಂಯೋಜಿಸುವ ತರಬೇತಿಯನ್ನು 'ಕಲಾ-ಟೆ' ಎಂದು ಹೆಸರಿಸಿ. ಎರಡೂ ತಂತ್ರಗಳಲ್ಲಿ ಅತ್ಯುತ್ತಮವಾದ ಮತ್ತು ಕಲಿಯಲು ಸುಲಭವಾದ ತರಬೇತಿ ಯೋಜನೆಯನ್ನು ರಚಿಸಲಾಗುತ್ತದೆ. ಇದಕ್ಕಾಗಿ ಕೇರಳದ ತರಬೇತುದಾರರನ್ನು ಬಳಸಿಕೊಳ್ಳಲಾಗುವುದು ಎಂದು ಆನಂದ ಬೋಸ್ ತಿಳಿಸಿದರು.

ಈ ತರಬೇತಿಯು ಹೆಣ್ಣುಮಕ್ಕಳ ಸುರಕ್ಷತೆಯೊಂದಿಗೆ ಅವರ ದೈಹಿಕ ಮತ್ತು ಮಾನಸಿಕ ಆರೋಗ್ಯವನ್ನು ಸುಧಾರಿಸಲು ಸಹಾಯ ಮಾಡುತ್ತದೆ ಮತ್ತು ರಾಜಭವನದಲ್ಲಿ ಪ್ರಾರಂಭವಾಗುವ ಕಾರ್ಯಕ್ರಮವನ್ನು ಹಂತಹಂತವಾಗಿ ಹಳ್ಳಿಗಳಿಗೂ ವಿಸ್ತರಿಸಲಾಗುವುದು ಎಂದು ರಾಜ್ಯಪಾಲರು ತಿಳಿಸಿದರು.

ಬಂಗಾಳದಲ್ಲಿ ಮಹಿಳಾ ವೈದ್ಯೆಯ ಅತ್ಯಾಚಾರ ಮತ್ತು ಹತ್ಯೆ ಸೇರಿದಂತೆ ಮಹಿಳೆಯರ ಮೇಲಿನ ದೌರ್ಜನ್ಯ ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ರಾಜ್ಯಪಾಲರು ತೆಗೆದುಕೊಂಡಿರುವ ಈ ನಿರ್ಧಾರ ಬಹಳ ಮಹತ್ವದ್ದಾಗಿದೆ ಎಂದು ಬಂಗಾಳದ ಸಾಮಾಜಿಕ ಸಂಘಟನೆಗಳು ಮತ್ತು ಮಾಧ್ಯಮಗಳು ಗಮನಸೆಳೆದಿವೆ.

ರಾಜಭವನವು ಮಹಿಳಾ ಸಬಲೀಕರಣ, ಮಕ್ಕಳ ಸುರಕ್ಷತೆ, ಶಾಂತಿಪಾಲನೆ, ಯುವ ಭಾಗವಹಿಸುವಿಕೆ ಮತ್ತು ಸಾಂಸ್ಕøತಿಕ ಶಿಕ್ಷಣದ ಉಪಕ್ರಮಗಳ ಜೊತೆಗೆ ಮಾನವ ಕಳ್ಳಸಾಗಣೆ ಮತ್ತು ಮಾದಕ ವ್ಯಸನದ ವಿರುದ್ಧ ಅಭಿಯಾನಗಳನ್ನು ಅಭಿವೃದ್ಧಿಪಡಿಸಿದೆ.

ವಿವಿಧ ವಿಶ್ವವಿದ್ಯಾನಿಲಯಗಳು, ಸಾಮಾಜಿಕ-ಸಾಂಸ್ಕೃತಿಕ ಸಂಸ್ಥೆಗಳ ಮೇಲ್ವಿಚಾರಣೆಯಲ್ಲಿ ಕಾರ್ಯಕ್ರಮಗಳನ್ನು ಕಾರ್ಯಗತಗೊಳಿಸಲಾಗುತ್ತದೆ.

ರಾಜ್ಯಪಾಲರ ಹೊಸ ಜನಸಂಪರ್ಕ ಕಾರ್ಯಕ್ರಮದ ಅಂಗವಾಗಿ ಅವರು ಪಶ್ಚಿಮ ಬಂಗಾಳದ ಎಲ್ಲಾ ಜಿಲ್ಲೆಗಳ 250 ಸ್ಥಳಗಳಿಗೆ ಭೇಟಿ ನೀಡಲಿದ್ದಾರೆ. ಅವರು ವಿವಿಧ ಕಾಲೇಜು ಮತ್ತು ಶಾಲಾ ಕ್ಯಾಂಪಸ್‍ಗಳಿಗೆ ಭೇಟಿ ನೀಡಿ ವಿದ್ಯಾರ್ಥಿಗಳೊಂದಿಗೆ ಸಂವಾದ ನಡೆಸಲಿದ್ದಾರೆ. ಅಂದಹಾಗೆ ಅಲ್ಲಿಯ ರಾಜ್ಯಪಾಲ ಆನಂದ ಬೋಸ್ ಕೇರಳ ಮೂಲದವರು.