ಶಬರಿಮಲೆಯಲ್ಲಿ ವಿಶೇಷ ಹವಾಮಾನ ಎಚ್ಚರಿಕೆ; ಭಾರೀ ಮಳೆಯಾಗುವ ಸಾಧ್ಯತೆ

ತಿರುವನಂತಪುರಂ: ಶಬರಿಮಲೆ ಯಾತ್ರಾರ್ಥಿಗಳಿಗೆ ತಿರುವನಂತಪುರಂ ಹವಾಮಾನ ಕೇಂದ್ರ ವಿಶೇಷ ಹವಾಮಾನ ಮುನ್ಸೂಚನೆ ನೀಡಿದೆ. ಬದಲಾಗುತ್ತಿರುವ ಹವಾಮಾನದ ಹಿನ್ನೆಲೆಯಲ್ಲಿ ವಿಶೇಷ ಎಚ್ಚರಿಕೆಗಳನ್ನು ನೀಡಲಾಗಿದೆ.

ಮುನ್ಸೂಚನೆಯಂತೆ ಶಬರಿಮಲೆ ಯಾತ್ರಾ ಕೇಂದ್ರವನ್ನು ಸನ್ನಿಧಾನಂ, ಪಂಬಾ ಮತ್ತು ನಿಲಕ್ಕಲ್ ಎಂಬ ಮೂರು ನಿಲ್ದಾಣಗಳಾಗಿ ವಿಂಗಡಿಸುತ್ತದೆ. ಬುಧವಾರ, ಗುರುವಾರ ಈ ಮೂರೂ ಕಡೆ ಗುಡುಗು, ಮಿಂಚು ಸಹಿತ ಭಾರಿ ಮಳೆಯಾಗುವ ಸಾಧ್ಯತೆ ಇದೆ ಎಂಬುದು ಪ್ರಾಥಮಿಕ ಮುನ್ಸೂಚನೆ. ಮೂರು ಗಂಟೆಗಳ ಅಂತರದಲ್ಲಿ ನೈಜ ಸಮಯದಲ್ಲಿ ಮಳೆಯ ಎಚ್ಚರಿಕೆಯನ್ನು ನೀಡಲಾಗುವುದು ಎಂದು ಹವಾಮಾನ ಇಲಾಖೆ ತಿಳಿಸಿದೆ.

ಯಾತ್ರೆಯ ಸಮಯದಲ್ಲಿ ಪ್ರಯಾಣಿಕರ ದಟ್ಟಣೆಯನ್ನು ಸರಿಹೊಂದಿಸಲು ರೈಲ್ವೆ ವಿಶೇಷ ಸೇವೆಗಳನ್ನು ನಡೆಸುತ್ತದೆ. ಹುಬ್ಬಳ್ಳಿಯಿಂದ ಕೊಟ್ಟಾಯಂಗೆ ವಿಶೇಷ ರೈಲು ಸಂಚಾರ ನಡೆಸಲಾಗುವುದು. ಈ ತಿಂಗಳ 19 ರಿಂದ ಜನವರಿ 14 ರವರೆಗೆ ಒಂಬತ್ತು ವಿಶೇಷ ಸೇವೆಗಳು ಇರುತ್ತವೆ. ಎಸ್‍ಎಸ್‍ಎಸ್ ಹುಬ್ಬಳ್ಳಿ- ಕೊಟ್ಟಾಯಂ- ಎಸ್‍ಎಸ್‍ಎಸ್ ಹುಬ್ಬಳ್ಳಿ ಸಾಪ್ತಾಹಿಕ ವಿಶೇಷ ರೈಲು ಓಡುತ್ತಿದೆ.

ಇದೇ ವೇಳೆ ಶಬರಿಮಲೆ ಯಾತ್ರೆಯ ನಿಮಿತ್ತ ಜಿಲ್ಲೆಯ ಹೋಟೆಲ್ ಗಳಲ್ಲಿ ಸಸ್ಯಾಹಾರಿ ಆಹಾರ ಪದಾರ್ಥಗಳು, ಮಷಿನ್ ಟೀ/ಕಾಫಿ, ಬೇಕರಿ ಸಾಮಾಗ್ರಿ, ಜ್ಯೂಸ್ ಗಳ ಬೆಲೆ ನಿಗದಿ ಮಾಡಲಾಗಿದೆ. ಪತ್ತನಂತಿಟ್ಟ ಜಿಲ್ಲಾಧಿಕಾರಿಗಳು ಬೆಲೆ ನಿಗದಿ ಮಾಡಿದ್ದಾರೆ.