ಬೆಳಿಗ್ಗೆ ಖಾಲಿ ಹೊಟ್ಟೇಲಿ ಹಲ್ಲುಜ್ಜಿ ನೀರು ಕುಡಿಯಬೇಕೆ ? ಹಲ್ಲುಜ್ಜದೇ ನೀರು ಕುಡಿಯಬೇಕೆ ? ಯಾವುದು ಉತ್ತಮ ?

 ಆರೋಗ್ಯ ಉತ್ತಮವಾಗಿರಬೇಕಾದರೆ ಕೆಲವು ಅಭ್ಯಾಸಗಳನ್ನು ರೂಢಿಸಿಕೊಳ್ಳುವುದು ಅಷ್ಟೇ ಮುಖ್ಯ. ಅದರಲ್ಲಿ ಬೆಳಿಗ್ಗೆ ಎದ್ದ ತಕ್ಷಣ ನೀರು ( Morning Water Drinking Tips) ಕುಡಿಯುವುದು. ಇದು ಒಳ್ಳೆಯ ಅಭ್ಯಾಸವೇ, ಆದರೆ, ಹಲ್ಲುಜ್ಜಿ ನೀರು ಕುಡಿಯಬೇಕೆ ಅಥವಾ ಹಲ್ಲುಜ್ಜದೇ ನೀರು ಕುಡಿಯಬೇಕೆ ಎಂಬ ಧ್ವಂದ್ವದಲ್ಲಿದ್ದೀರಾ, ಹಾಗಾದರೆ ಇಲ್ಲಿದೆ ನೋ ಉತ್ತರ.

ಬೆಳಿಗ್ಗೆ ಹಾಸಿಗೆಯಿಂದ ಎದ್ದಾಕ್ಷಣ ಹಲ್ಲುಜ್ಜಿ ನೀರು ಕುಡಿಯುವುದು ಉತ್ತಮ ಎನ್ನುತ್ತಿದ್ದಾರೆ ವೈದ್ಯರು. ಏಕೆಂದರೆ, ರಾತ್ರಿ ಬಾಯಿಯಲ್ಲಿ ಸಂಗ್ರಹವಾಗಿರುವ ಬ್ಯಾಕ್ಟೀರಿಯಾಗಳನ್ನು ಹಲ್ಲುಜ್ಜಿ, ಬಾಯಿ ತೊಳೆಯುವುದರಿಂದ ಹೊರಹೋಗುತ್ತವೆ. ಇದರಿಂದ ಕೆಟ್ಟ ಬ್ಯಾಕ್ಟೀರಿಯಾಗಳು ಹೊಟ್ಟೆ ಒಳಗೆ ಹೋಗುವುದನ್ನು ತಡೆಯಬಹುದು.

ಕೆಲವರು ಹಲ್ಲುಜ್ಜದೇ ನೀರು ಕುಡಿಯುವ ಅಭ್ಯಾಸವನ್ನು ಮಾಡಿಕೊಂಡಿರುತ್ತಾರೆ. ಇದು ಉಪವಾಸದಲ್ಲಿದ್ದಾಗ ಅಥವಾ ಹಲ್ಲುಜ್ಜಲು ಸಮಯವಿಲ್ಲದಾಗ ನೀರು ಕುಡಿಯಬಹುದು. ಆದರೆ, ಇದನ್ನೇ ರೂಢಿ ಮಾಡಿಕೊಳ್ಳುವುದು ಸರಿಯಲ್ಲ ಎಂದು ವೈದ್ಯರು ತಿಳಿಸುತ್ತಾರೆ. ಆದ್ದರಿಂದ ಹಲ್ಲುಜ್ಜಿದ ನಂತರ ನೀರು ಕುಡಿಯುವುದು ಬಾಯಿಯ ಆರೋಗ್ಯದ ದೃಷ್ಟಿಯಿಂದ ಉತ್ತಮವಾಗಿರುತ್ತದೆ.
ಪ್ರತಿದಿನ ಎದ್ದಾಕ್ಷಣ ಮೊದಲ ಕೆಲಸವೇ ಬಾಯಿ ಮತ್ತು ಹಲ್ಲು ಕ್ಲೀನ್ ಮಾಡುವುದರಿಂದ ಪ್ರಾರಂಭವಾಗುತ್ತದೆ. ಆದ್ದರಿಂದ ಪ್ರತಿಯೊಬ್ಬರು ಈ ಕೆಲಸಕ್ಕೆ ಆದ್ಯತೆ ನೀಡುವುದು ಅಷ್ಟೇ ಉತ್ತಮವಾಗಿರುತ್ತದೆ.

ಸಾಧಾರಣ ಬೆಚ್ಚನೆಯ ನೀರು ಅಥವಾ ತಣ್ಣನೆಯ ನೀರಿನಲ್ಲಿ ಯಾವುದು ಅತ್ಯುತ್ತಮ?

ಬೆಳಗ್ಗೆ ಎದ್ದ ಕೂಡಲೇ ಸಾಧಾರಣ ಬೆಚ್ಚ ಮಾಡಿರುವ ನೀರು ಅಥವಾ ತಣ್ಣನೆಯ ನೀರಿನಲ್ಲಿ ಯಾವುದು ಕುಡಿಯಬೇಕು ಎನ್ನುವ ದ್ವಂದ್ವದಲ್ಲಿದ್ದರಿಗೆ ಇಲ್ಲಿ ಸೂಕ್ತ ಪರಿಹಾರ. ಬೆಳಗ್ಗೆ ಎದ್ದಾಕ್ಷಣ ಬರಿ ಹೊಟ್ಟೆಯಲ್ಲಿ ಸಾಧಾರಣ ಬೆಚ್ಚನೆ ಮಾಡಿರುವ ನೀರನ್ನು ಕುಡಿಯುವುದು ಉತ್ತಮ. ಇದನ್ನು ಅನೇಕರು ಹಲವಾರು ವರ್ಷಗಳಿಂದ ಪಾಲಿಸುತ್ತಾ ಬಂದಿದ್ದಾರೆ. ಇದರಿಂದ ಯಾವುದೇ ಸಮಸ್ಯೆ ಇಲ್ಲ. ಆದರೆ, ಆರೋಗ್ಯದ ದೃಷ್ಟಿಯಿಂದ ಉತ್ತಮ.

ಬೆಳಗ್ಗೆ ಎದ್ದು ಹಲ್ಲುಜ್ಜಿದ ನಂತರ ಎರಡು ಲೋಟ ಸಾಧಾರಣ ಬೆಚ್ಚನೆಯ ನೀರನ್ನು ಕುಡಿಯುವುದರಿಂದ ಆಸಿಡಿಟಿ, ಹೊಟ್ಟೆ ಉಬ್ಬರ ಮತ್ತು ಮಲಬದ್ದತೆಯಂತಹ ಸಮಸ್ಯೆಗಳಿಗೆ ಪರಿಹಾರ ಒದಗಿಸುತ್ತದೆ. ಇದಕ್ಕಾಗಿ ನಾನಾ ವೈದ್ಯರನ್ನು ಭೇಟಿ ಮಾಡಿ ಔಷಧ ಪಡೆಯುವ ಬದಲು ಈ ಮನೆಮದ್ದನ್ನು ಪಾಲಿಸಿದರೆ, ಆರೋಗ್ಯದಲ್ಲಿ ಹೆಚ್ಚಿನ ಚೈತ್ಯನ್ಯ ಕಾಣಬಹುದು.

ಬೆಳಗ್ಗೆ ಎದ್ದಾಕ್ಷಣ ತಣ್ಣನೆಯ ನೀರು ಕುಡಿದರೆ, ಆಸಿಡಿಟಿ ಸಮಸ್ಯೆ ಮತ್ತಷ್ಟು ಹೆಚ್ಚಾಗುವ ಸಾಧ್ಯತೆಗಳಿವೆ ಎಂದು ವೈದ್ಯರು ಹೇಳುತ್ತಾರೆ. ಆದ್ದರಿಂದ ಸಾಧಾರಣ ಬೆಚ್ಚನೆಯ ನೀರು ಆರೋಗ್ಯಕ್ಕೆ ಅತ್ಯುತ್ತಮ ಫಲಿತಾಂಶ ನೀಡುತ್ತದೆ.

ಯಾವ ರೀತಿಯಲ್ಲಿ ನೀರು ಕುಡಿಯಬೇಕು ?

ಬೆಳಗ್ಗೆ ಎದ್ದಾಕ್ಷಣ ನೀರನ್ನು ಯಾವ ರೀತಿಯಲ್ಲಿ ಕುಡಿಯಬೇಕು ಎನ್ನುವುದನ್ನು ನಾವು ಪಾಲಿಸುವುದು ಅತ್ಯಗತ್ಯ. ಸಾಮಾನ್ಯವಾಗಿ ಬೆಚ್ಚಗೆ ಮಾಡಿರುವ ನೀರನ್ನು ಗಟ ಗಟನೇ ಕುಡಿಯಬಾರದು, ಅದರ ಬದಲು ನಾವು ಚಹಾ, ಕಾಫಿಯನ್ನು ಗುಟುಕು- ಗುಟುಕಾಗಿ ಹೀರಿದಂತೆ ನೀರನ್ನು ಕುಡಿಯುವ ಅಭ್ಯಾಸ ಮಾಡಿಕೊಂಡರೆ ಇನ್ನೂ ಆರೋಗ್ಯಕ್ಕೆ ಉತ್ತಮವಾಗಿರುತ್ತದೆ.

ತುಳಸೀ ಎಲೆ ನೀರು ಆರೋಗ್ಯಕ್ಕೆ ಅತ್ಯುತ್ತಮ

ಬೆಳಿಗ್ಗೆ ಎದ್ದು ಸಾಮಾನ್ಯ ಬೆಚ್ಚನೆಯ ನೀರಿನ ಬದಲು ತುಳಸಿ ಎಲೆ ನೀರನ್ನು ಕುಡಿಯುವುದರಿಂದ ಆರೋಗ್ಯಕ್ಕೆ ಉತ್ತಮ. ತುಳಸಿ ಎಲೆಯು ಔಷಧನೀಯ ಗುಣಗಳನ್ನು ಹೊಂದಿರುವುದರಿಂದ ಆರೋಗ್ಯಕ್ಕೆ ಹಿತವನ್ನು ನೀಡುತ್ತದೆ.

ದೇಹದಲ್ಲಿನ ಟಾಕ್ಸಿಕ್ ಅನ್ನು ನಿವಾರಿಸುತ್ತದೆ. ಅದರಿಂದ ದೇಹ ಶುದ್ದೀಕರಣವಾಗುತ್ತದೆ. ರೋಗನಿರೋಧಕ ಶಕ್ತಿ ವೃದ್ದಿಸುತ್ತದೆ ವೈರಸ್ ಮತ್ತು ಬ್ಯಾಕ್ಟೀರಿಯ ಸಮಸ್ಯೆಗಳ ವಿರುದ್ಧ ಹೋರಾಡಲು ಸಹಕಾರಿಯಾಗಿದೆ.
ಜೀರ್ಣಕ್ರಿಯೆಯನ್ನು ಸುಧಾರಣೆ ಮಾಡುತ್ತದೆ. ಅಜೀರ್ಣ, ಗ್ಯಾಸ್ಟಿಕ್ ಸಮಸ್ಯೆಯನ್ನು ತಡೆಯುತ್ತದೆ. ಚರ್ಮದ ಆರೋಗ್ಯವನ್ನು ವೃದ್ದಿಸುತ್ತದೆ. ಮೆದುಳಿನ ಆರೋಗ್ಯವನ್ನು ಹೆಚ್ಚಿಸುತ್ತದೆ. ಆತಂಕವನ್ನು ದೂರ ಮಾಡಿ ಮನಸ್ಸು ಶಾಂತವಾಗಿಡುತ್ತದೆ. ಆದ್ದರಿಂದ ಸಾಮಾನ್ಯ ಬೆಚ್ಚಗೆ ಮಾಡಿರುವ ನೀರನ್ನು ತುಳಸಿ ಎಲೆಯೊಂದಿಗೆ ಕುಡಿದರೆ ಆರೋಗ್ಯ ಹೆಚ್ಚು ಉತ್ತಮವಾಗಲಿದೆ.