4.52 ಕೋಟಿ ತೆರಿಗೆ ಬಾಕಿ; ಗುರುವಾಯೂರ್ ದೇವಸ್ವಂ ಮಂಡಳಿಗೆ ಜಿಎಸ್‍ಟಿ ಗುಪ್ತಚರ ನಿರ್ದೇಶನಾಲಯದ ನೋಟೀಸ್

ನವದೆಹಲಿ: ತೆರಿಗೆ ಬಾಕಿ ಇರುವ ಕುರಿತು ಗುರುವಾಯೂರು ದೇವಸ್ವಂ ಮಂಡಳಿಗೆ ಜಿಎಸ್‍ಟಿ ಗುಪ್ತಚರ ನಿರ್ದೇಶನಾಲಯ ನೋಟಿಸ್ ನೀಡಿದೆ.

ಜುಲೈ 2017 ರಿಂದ ಮಾರ್ಚ್ 2023 ರವರೆಗೆ ಬಾಕಿ ಇರುವ 4.52 ಕೋಟಿ ರೂ.ಗಳನ್ನು ಪಾವತಿಸುವಂತೆ ನೋಟಿಸ್‍ನಲ್ಲಿ ಸೂಚಿಸಲಾಗಿದೆ.

ದೇವಾಲಯಕ್ಕೆ ಬರುವ ವಿವಿಧ ಬಾಡಿಗೆ ಆದಾಯ, ದೇವಸ್ವಂ ಮಂಡಳಿ ವಿಧಿಸುವ ಹೆಲಿಕಾಪ್ಟರ್ ಲ್ಯಾಂಡಿಂಗ್ ಶುಲ್ಕ, ವಾಹನ ಬಾಡಿಗೆ, ನಿಯತಕಾಲಿಕೆಗಳು, ಪುಸ್ತಕಗಳು, ಡೈರಿಗಳು ಮತ್ತು ಪಂಚಾಂಗಗಳಲ್ಲಿ ಪ್ರಕಟವಾದ ಜಾಹೀರಾತುಗಳ ಶುಲ್ಕದಂತಹ ಆದಾಯದ ಮೇಲೆ ಜಿಎಸ್‍ಟಿ ಪಾವತಿಸುವುದಿಲ್ಲ ಎಂದು ಕೇಂದ್ರ ಜಿಎಸ್‍ಟಿವಿ ಇಲಾಖೆ ಗಮನಸೆಳೆದಿದೆ. ದೇವಸ್ವಂ ಮಂಡಳಿಯು ಸೇವೆಗಳು ಮತ್ತು ಉತ್ಪನ್ನಗಳ ಪೂರೈಕೆಯ ಮೇಲೆ ಜಿಎಸ್‍ಟಿಯನ್ನು ಸಂಗ್ರಹಿಸುತ್ತದೆ ಆದರೆ ಅದನ್ನು ಪಾವತಿಸುವುದಿಲ್ಲ ಎಂದು ಕಂಡುಬಂದಿದೆ.

ಗುರುವಾಯೂರು ದೇವಸ್ವಂ ಬೋರ್ಡ್, 1978 ರ ಗುರುವಾಯೂರ್ ದೇವಸ್ವಂ ಕಾಯಿದೆ ಅಡಿಯಲ್ಲಿ ಸ್ಥಾಪಿತವಾಗಿದೆ, 11 ದೇವಾಲಯಗಳನ್ನು ನಿರ್ವಹಿಸುತ್ತದೆ. ಗುರುವಾಯೂರ್ ದೇವಸ್ಥಾನವು 2,053 ಕೋಟಿ ರೂಪಾಯಿಗಳ ಸ್ಥಿರ ಹೂಡಿಕೆ, 271 ಎಕರೆ ಭೂಮಿ ಮತ್ತು 1,084.76 ಕೆಜಿ ಚಿನ್ನವನ್ನು ಹೊಂದಿದೆ. ಕೊಚ್ಚಿಯ ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾದಲ್ಲಿ ಠೇವಣಿ ಇಡಲಾದ 869 ಕೆಜಿ ಚಿನ್ನಕ್ಕಾಗಿ ದೇವಾಲಯವು ವಾರ್ಷಿಕವಾಗಿ 7 ಕೋಟಿ ರೂಪಾಯಿಗಳನ್ನು ಪಡೆಯುತ್ತದೆ.

2018-19ನೇ ಹಣಕಾಸು ವರ್ಷದಿಂದ ಮಂಡಳಿಯು ಯಾವುದೇ ಶಾಸನಬದ್ಧ ಲೆಕ್ಕಪರಿಶೋಧನೆ ನಡೆಸಿಲ್ಲ. ಅಲ್ಲದೆ ಯಾವುದೇ ಏಕೀಕೃತ ವಾರ್ಷಿಕ ರಶೀದಿಗಳು ಮತ್ತು ವೆಚ್ಚದ ಲೆಕ್ಕಪತ್ರಗಳನ್ನು ಸಿದ್ಧಪಡಿಸಿಲ್ಲ. ಇದನ್ನು ಗಮನದಲ್ಲಿಟ್ಟುಕೊಂಡು ಆದಾಯ ತೆರಿಗೆ ಇಲಾಖೆಯು ಮಾರ್ಚ್‍ನಲ್ಲಿ ದೇವಸ್ವಂ ಮಂಡಳಿ ಕಚೇರಿಯಲ್ಲಿ ತಪಾಸಣೆ ನಡೆಸಿತ್ತು.