ಪೋಲೀಸ್ ವರಿಷ್ಠ ಹುದ್ದೆಗೆ ತೀವ್ರಗೊಂಡ ಹೋರಾಟ- ಎಂಆರ್ ಅಜಿತ್‍ಕುಮಾರ್ ವಿರುದ್ಧ ಕ್ರಮಕ್ಕೆ ಆಗ್ರಹಿಸಿ ಎಡಿಜಿಪಿ ಪಿ ವಿಜಯನ್ ರಂಗಕ್ಕೆ

ತಿರುವನಂತಪುರಂ: ಎಡಿಜಿಪಿ ಎಂ.ಆರ್.ಅಜಿತ್ ಕುಮಾರ್ ವಿರುದ್ಧ ಕ್ರಮಕ್ಕೆ ಆಗ್ರಹಿಸಿ ಗುಪ್ತಚರ ವಿಭಾಗದ ಎಡಿಜಿಪಿ ಪಿ.ವಿಜಯನ್ ರಂಗಕ್ಕೆ ಬಂದಿದ್ದಾರೆ. ಇದರೊಂದಿಗೆ ಐಪಿಎಸ್ ಮಟ್ಟದಲ್ಲಿ ಹೊಸ ಕದನ ರೂಪುಗೊಂಡಿದೆ.

ಎಂ.ಆರ್.ಅಜಿತ್ ಕುಮಾರ್ ತಮ್ಮ ವಿರುದ್ಧ ಸುಳ್ಳು ಹೇಳಿಕೆ ನೀಡಿದ್ದಾರೆ ಎಂಬುದು ಪಿ.ವಿಜಯನ್ ದೂರು. ವಿಜಯನ್ ಅವರು ಡಿಜಿಪಿ ಎಸ್.ದರ್ವೇಶ್ ಸಾಹಿಬ್ ಅವರಿಗೆ ಸಲ್ಲಿಸಿರುವ ದೂರಿನಲ್ಲಿ ಅಜಿತ್ ಕುಮಾರ್ ಅವರು ಕರಿಪ್ಪೂರ್ ಚಿನ್ನಾಭರಣ ಕಳ್ಳಸಾಗಣೆದಾರರಿಗೆ ಸಂಬಂಧವಿದೆ ಎಂದು ತನಿಖಾ ತಂಡಕ್ಕೆ ನೀಡಿರುವ ಹೇಳಿಕೆ ಸುಳ್ಳಾಗಿದ್ದು, ಪ್ರಕರಣ ದಾಖಲಿಸಬೇಕು ಎಂದಿರುವರು.

ಈ ಹಿಂದೆ, ಮುಂಬೈನಿಂದ ತಿರುವನಂತಪುರಕ್ಕೆ ಕೋಝಿಕ್ಕೋಡ್ ರೈಲಿಗೆ ಬೆಂಕಿ ಹಚ್ಚಿದ ಪ್ರಕರಣದ ಆರೋಪಿಗಳ ಪ್ರಯಾಣದ ಮಾಹಿತಿಯನ್ನು ಮಾಧ್ಯಮವೊಂದಕ್ಕೆ ಸೋರಿಕೆ ಮಾಡಿದ್ದಾರೆ ಎಂಬ ವರದಿ ಆಧರಿಸಿ ಪಿ ವಿಜಯನ್ ಅಮಾನತು ಕ್ರಮ ಎದುರಿಸಿದ್ದರು. ಎಂಆರ್ ಅಜಿತ್‍ಕುಮಾರ್ ಅವರ ವರದಿಯನ್ನು ತಿರಸ್ಕರಿಸಿ ಪಿ ವಿಜಯನ್ ಅವರನ್ನು ಮತ್ತೆ ಸೇವೆಗೆ ಸೇರಿಸಲಾಗಿತ್ತು. 

ನಂತರ ಅವರನ್ನು ಗುಪ್ತಚರ ಎಡಿಜಿಪಿಯಾಗಿ ಬಡ್ತಿ ನೀಡಲಾಯಿತು. ಇದಾದ ಬಳಿಕ ಇದೀಗ ಎಂಆರ್ ಅಜಿತ್‍ಕುಮಾರ್ ವಿರುದ್ಧ ಕ್ರಮಕ್ಕೆ ಆಗ್ರಹಿಸಿ ಪಿ ವಿಜಯನ್ ಮುಂದಾಗಿದ್ದಾರೆ.

ಇದೇ ವೇಳೆ, ಸಾಮಾನ್ಯವಾಗಿ ಅಂತಹ ದೂರುಗಳ ಬಗ್ಗೆ ಡಿಜಿಪಿ ಅವರೇ ಕ್ರಮ ಕೈಗೊಳ್ಳಬಹುದು ಆದರೆ ಉನ್ನತ ಹುದ್ದೆಯಲ್ಲಿ ಕುಳಿತುಕೊಳ್ಳುವ ಇಬ್ಬರು ಹಿರಿಯ ಅಧಿಕಾರಿಗಳ ನಡುವಿನ ಸಮಸ್ಯೆಯಾಗಿರುವುದರಿಂದ ಅಗತ್ಯ ಕ್ರಮಗಳನ್ನು ತೆಗೆದುಕೊಳ್ಳುವಂತೆ ಸೂಚಿಸಿ ಗೃಹ ಇಲಾಖೆಗೆ ದೂರು ರವಾನಿಸಲಾಗಿದೆ.