ಸಾವು ಸಂಭವಿಸಿದಾಗ ಜನರ ಕಣ್ಣಿಗೆ ಮಣ್ಣೆರಚಲು ಅರಣ್ಯ ಸಚಿವರು ಘೋಷಣೆ- ಅರಣ್ಯ ಇಲಾಖೆ ವಿರುದ್ಧ ವಿ.ಡಿ.ಸತೀಶನ್ ವಾಗ್ದಾಳಿ

ಇಡುಕ್ಕಿ: ಇಡುಕ್ಕಿ ಜಿಲ್ಲೆಯ ಮುಳ್ಳರಿಂಗಾಡ್ ಅಮೆಲ್ತೊಟ್ಟಿಯಲ್ಲಿ ನಿನ್ನೆ ನಡೆದ 23 ವರ್ಷದ ಅಮರ್ ಇಲಾಹಿ ಎಂಬಾತನ ಆನೆದಾಳಿ ಮರಣ ಸಂಬಂಧಿಸಿದಂತೆ ಪ್ರತಿಪಕ್ಷ ನಾಯಕ ವಿ.ಡಿ.ಸತೀಶನ್ ಅರಣ್ಯ ಇಲಾಖೆಯನ್ನು ತೀವ್ರವಾಗಿ ಟೀಕಿಸಿದ್ದಾರೆ.

ವನ್ಯಜೀವಿ ದಾಳಿ ನಡೆಯುತ್ತಿದ್ದರೂ ರಾಜ್ಯ ಸರ್ಕಾರ ಹಾಗೂ ಅರಣ್ಯ ಇಲಾಖೆ ಯಾವುದೇ ಕ್ರಮ ಕೈಗೊಳ್ಳದೆ ಪ್ರೇಕ್ಷಕರಂತೆ ನೋಡುತ್ತಿರುವುದು ಆಕ್ಷೇಪಾರ್ಹ ಎಂದರು.

ರಾಜ್ಯದಲ್ಲಿ ವನ್ಯಜೀವಿ ದಾಳಿಗೆ ಮತ್ತೊಬ್ಬರು ಬಲಿಯಾಗಿರುವುದು ಬೇಸರದ ಸಂಗತಿ. ವನ್ಯಜೀವಿಗಳ ಹಾವಳಿ ತಡೆಗೆ ಯಾವುದೇ ಕ್ರಮ ಕೈಗೊಳ್ಳಲು ಮುಂದಾಗದ ಅರಣ್ಯ ಇಲಾಖೆಯೇ ಈ ಯುವಕನ ಸಾವಿಗೆ ಕಾರಣವಾಗಿದೆ. ಮುಳ್ಳರಿಂಗಾಡ್ ಭಾಗದಲ್ಲಿ ಆನೆಗಳ ಹಾವಳಿ ಕುರಿತು ಸ್ಥಳೀಯರು ದೂರು ನೀಡಿದರೂ ಅರಣ್ಯ ಇಲಾಖೆ ಅರಣ್ಯ ಗಡಿಯಲ್ಲಿ ಟ್ರೆಂಚ್, ಬೇಲಿ ನಿರ್ಮಿಸಲು ಯಾವುದೇ ಕ್ರಮ ಕೈಗೊಂಡಿಲ್ಲ ಎಂದು ಸತೀಶನ್ ಆರೋಪಿಸಿದರು.

ಆನೆಗಳನ್ನು ಜನವಸತಿ ಪ್ರದೇಶದಿಂದ ಓಡಿಸಲು ಅರಣ್ಯ ಇಲಾಖೆ ಇನ್ನೂ ಕ್ರಮಕೈಗೊಂಡಿಲ್ಲ ಎಂದು ಸ್ಥಳೀಯರು ದೂರಿದ್ದಾರೆ. ಇದು ರಾಜ್ಯದ ಎಲ್ಲ ವನ್ಯಜೀವಿ ಸಂತ್ರಸ್ತ ಪ್ರದೇಶಗಳ ಪರಿಸ್ಥಿತಿ. ಕೆಲವು ದಿನಗಳ ಹಿಂದೆ ನೆರಿಯಮಂಗಲದಲ್ಲಿ ಕಾಡಾನೆ ವ್ಯಕ್ತಿಯೊಬ್ಬನನ್ನು ಒದ್ದು ಕೊಂದು ಹಾಕಿತ್ತು ಎಂದು ಸತೀಶನ್ ಹೇಳಿದ್ದಾರೆ.

2016ರಿಂದ 2024ರ ಜೂನ್ ವರೆಗೆ 968 ಮಂದಿ ಆನೆ ದಾಳಿಗೆ ಸಾವನ್ನಪ್ಪಿದ್ದಾರೆ ಎಂದು ವಿಧಾನಸಭೆಯಲ್ಲಿ ಸರ್ಕಾರ ಉತ್ತರ ನೀಡಿದೆ. ಈ ಅಂಕಿ ಅಂಶ ಹೊರಬಿದ್ದ ಬಳಿಕವೂ ರಾಜ್ಯದಲ್ಲಿ ಕಾಡುಪ್ರಾಣಿಗಳ ದಾಳಿಗೆ ಹಲವರು ಬಲಿಯಾಗಿದ್ದಾರೆ. ರಾಜ್ಯದಲ್ಲಿ ಕಾಡಾನೆ ದಾಳಿ ಮತ್ತು ನಂತರದ ಸಾವುಗಳು ನಿತ್ಯದ ಘಟನೆಯಾಗಿವೆ. ರಾಜ್ಯದಲ್ಲಿ ಇಷ್ಟೊಂದು ಗಂಭೀರ ಪರಿಸ್ಥಿತಿ ಇದ್ದರೂ ಸರ್ಕಾರ ಕ್ರಮ ಕೈಗೊಳ್ಳದಿರುವುದು ಅಚ್ಚರಿ ಮೂಡಿಸಿದೆ ಎಂದು ಸತೀಶನ್ ಹೇಳಿದರು.

ಮತ್ತು ಬಡವರ ಜೀವಕ್ಕೆ ಕುತ್ತು ಬಂದಾಗ ಮಾತ್ರ ಅರಣ್ಯ ಇಲಾಖೆ ಹಾಗೂ ಇಲಾಖೆ ಸಚಿವರು ಪರಿಹಾರದ ಪ್ರಸ್ತಾವನೆಯೊಂದಿಗೆ ಜನರ ಕಣ್ಣಿಗೆ ಮಣ್ಣೆರೆಚುತ್ತಾರೆ. ಆದರೆ ಅದ್ಯಾವುದೂ ಎಲ್ಲಿಯೂ ಜಾರಿಯಾಗಿಲ್ಲ ಎಂದು ವಿಪಕ್ಷ ನಾಯಕ ಆರೋಪಿಸಿದರು.

ಕಾಡುಪ್ರಾಣಿಗಳ ದಾಳಿಯಿಂದ ಜನರ ರಕ್ಷಣೆಗೆ ಯಾವುದೇ ಕ್ರಮ ಕೈಗೊಳ್ಳದ ಸರ್ಕಾರ ಇದೀಗ ಅರಣ್ಯ ಇಲಾಖೆ ಅಧಿಕಾರಿಗಳಿಗೆ ಮಿತಿಮೀರಿದ ಅಧಿಕಾರ ನೀಡುವ ಕಾನೂನಿಗೆ ಮುಂದಾಗಿದೆ. ಇದು ಜನತೆಗೆ ಸವಾಲಾಗಿದೆ. ಜನರ ಜೀವ, ಆಸ್ತಿ ರಕ್ಷಣೆ ಮಾಡಬೇಕಾದ ಸರ್ಕಾರ ಆ ಕರ್ತವ್ಯವನ್ನು ಪೂರೈಸಲು ಸಿದ್ಧವಾಗದಿದ್ದರೆ, ಜನರನ್ನು ಸಂಘಟಿಸಿ ಯುಡಿಎಫ್ ಆಂದೋಲನವನ್ನು ನಡೆಸಲಿದೆ ಎಂದು ಸತೀಶನ್ ಹೇಳಿದರು.