ಸಂಪೂರ್ಣ ಗುರುತಿನ ದಾಖಲೆಯಾಗಿ ಯುಡಿಐಡಿ ಕಾರ್ಡ್: ಕೋಝಿಕ್ಕೋಡ್ ದೇಶದಲ್ಲೇ ಪೂರ್ಣ ಹಂತದತ್ತ

ನವದೆಹಲಿ: 2.7 ಕೋಟಿಗೂ ಹೆಚ್ಚು ವಿಶೇಷ ಚೇತನರನ್ನು ಸುಲಭವಾಗಿ ಗುರುತಿಸಲು ವಿಶೇಷ ಬಣ್ಣಗಳಲ್ಲಿ ಯುಡಿಐಡಿ ಕಾರ್ಡ್‍ಗಳ ವಿತರಣೆಯನ್ನು ಜಾರಿಗೆ ತರುವ ಪ್ರಯತ್ನಗಳು ಕೇರಳದಲ್ಲಿ ಮೊದಲನೆಯದಾಗಿ ಕೋಝಿಕ್ಕೋಡ್‍ನಲ್ಲಿ ಅಂತಿಮ ಹಂತದಲ್ಲಿವೆ.

ಕೇಂದ್ರ ಸರ್ಕಾರ ಅಭಿವೃದ್ಧಿಪಡಿಸಿರುವ ಈ ಕಾರ್ಡ್, ವಿಶೇಷ ಚೇತನರಿಗೆ ಸಂಪೂರ್ಣ ಗುರುತಿನ ದಾಖಲೆಯಾಗಲಿದೆ. ಹೊಸ ವೈದ್ಯಕೀಯ ಮಂಡಳಿಗೆ ಅಗತ್ಯವಿರುವ ಯುಡಿಐಡಿ ಅರ್ಜಿಗಳನ್ನು ಪೂರ್ಣಗೊಳಿಸಲು ಕೋಝಿಕ್ಕೋಡ್ ಜಿಲ್ಲೆಯಾದ್ಯಂತ ಬ್ಲಾಕ್ ಆಧಾರದ ಮೇಲೆ ಬೃಹತ್ ಅಂಗವೈಕಲ್ಯ ಮೌಲ್ಯಮಾಪನ ಶಿಬಿರಗಳನ್ನು ಆಯೋಜಿಸಲಾಗುತ್ತಿದೆ.

ಜನವರಿಯಲ್ಲಿ ಆರು ರಾಜ್ಯಗಳಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರು ಪ್ರಾರಂಭಿಸಿದ ಈ ಯೋಜನೆಯನ್ನು ಮೊದಲ ಹಂತದಲ್ಲಿ ಕೇರಳದ ಜೊತೆಗೆ ಮಧ್ಯಪ್ರದೇಶ, ಗುಜರಾತ್, ರಾಜಸ್ಥಾನ, ತ್ರಿಪುರ ಮತ್ತು ಒಡಿಶಾದಲ್ಲಿ ಜಾರಿಗೆ ತರಲಾಗುತ್ತಿದೆ. ಅಂಗವೈಕಲ್ಯದ ಶೇಕಡಾವಾರು ಪ್ರಮಾಣವನ್ನು ಅವಲಂಬಿಸಿ ಅಂಗವಿಕಲರಿಗೆ ಮೂರು ರೀತಿಯ ಕಾರ್ಡ್‍ಗಳನ್ನು ನೀಡಲಾಗುವುದು. ಶೇ. 40 ಕ್ಕಿಂತ ಕಡಿಮೆ ಅಂಗವೈಕಲ್ಯ ಹೊಂದಿರುವವರಿಗೆ ಬಿಳಿ ಪಟ್ಟಿಯ ಕಾರ್ಡ್, ಶೇ. 40 ರಿಂದ 80 ರಷ್ಟು  ಅಂಗವೈಕಲ್ಯ ಹೊಂದಿರುವವರಿಗೆ ಹಳದಿ ಪಟ್ಟಿಯ ಕಾರ್ಡ್ ಮತ್ತು ಶೇ. 80 ಕ್ಕಿಂತ ಹೆಚ್ಚು ಅಂಗವೈಕಲ್ಯ ಹೊಂದಿರುವವರಿಗೆ ನೀಲಿ ಪಟ್ಟಿಯ ಕಾರ್ಡ್ ನೀಡಲಾಗುವುದು. ಈ ಕಾರ್ಡ್ 18 ಅಂಕೆಗಳ ವಿಶಿಷ್ಟ ಸಂಖ್ಯೆಯನ್ನು ಹೊಂದಿದ್ದು, ಇದು ರಾಜ್ಯ, ಜಿಲ್ಲೆ, ಅಂಗವೈಕಲ್ಯ, ಜನ್ಮ ವರ್ಷ ಇತ್ಯಾದಿಗಳನ್ನು ಪ್ರತಿನಿಧಿಸುತ್ತದೆ.