ವಿದ್ಯಾರ್ಥಿಗಳೇ ಗಮನಿಸಿ: ಇದು ಪರೀಕ್ಷಾ ಸಮಯ, ಈ ಅಭ್ಯಾಸ ಒಳಿತಲ್ಲ

ಪರೀಕ್ಷೆಯ ಸಮಯ ಬಂದಿದೆ. ಎಲ್ಲರೂ ತಯಾರಿಯ ಅಂತಿಮ ಹಂತದಲ್ಲಿದ್ದಾರೆ. ಪರೀಕ್ಷೆಯ ಸಮಯದಲ್ಲಿ ಓದಿನಷ್ಟೇ ಮುಖ್ಯ ಆಹಾರ ಪದ್ಧತಿಯೂ ಕೂಡ. ಪರೀಕ್ಷೆಯ ವೇಳೆ, ಎಂದಿಗೂ ಮಾಡಬಾರದ ಕೆಲವು ಕೆಲಸಗಳು ಇಲ್ಲಿವೆ...

ಕಾಫಿ ಸೇವನೆ: 

ನಿದ್ದೆ ಬರದಂತೆ ನಿರಂತರವಾಗಿ ಕಾಫಿ ಕುಡಿಯುವ ಜನರಿದ್ದಾರೆ. ಆದರೆ ಇದು ದೇಹದ ಮೇಲೆ ಪ್ರತಿಕೂಲ ಪರಿಣಾಮ ಬೀರಬಹುದು. ಇದು ದೇಹದಲ್ಲಿ ಕೆಫೀನ್ ಪ್ರಮಾಣವನ್ನು ಹೆಚ್ಚಿಸುತ್ತದೆ, ಹೃದಯ ಬಡಿತವನ್ನು ಬಹಳವಾಗಿ ಹೆಚ್ಚಿಸುತ್ತದೆ ಮತ್ತು ದೇಹದ ಆಮ್ಲ ಮಟ್ಟದಲ್ಲಿ ಬದಲಾವಣೆಗಳನ್ನು ಉಂಟುಮಾಡುತ್ತದೆ. ಇದು ಆತಂಕವನ್ನು ಹೆಚ್ಚಿಸಬಹುದು ಮತ್ತು ದೇಹದ ನಿರ್ಜಲೀಕರಣಕ್ಕೆ ಕಾರಣವಾಗಬಹುದು. ನೀರು ಕುಡಿಯದೆ ನಿರಂತರವಾಗಿ ಕಾಫಿ ಕುಡಿಯುವುದರಿಂದ ತಲೆಬುರುಡೆಯ ಹಿಂಭಾಗದಲ್ಲಿ ತೀವ್ರ ತಲೆನೋವು ಉಂಟಾಗುತ್ತದೆ. ಒಂದು ಅಥವಾ ಎರಡು ಗ್ಲಾಸ್ ಕಾಫಿ ಕುಡಿದ ನಂತರ ನೀರು ಕುಡಿಯುವುದರಿಂದ ಅರೆನಿದ್ರಾವಸ್ಥೆ ನಿವಾರಣೆಯಾಗುತ್ತದೆ ಮತ್ತು ಮೆದುಳಿಗೆ ಹೆಚ್ಚಿನ ತಾಜಾತನ ದೊರೆಯುತ್ತದೆ.

ಸೇವಿಸದಿರುವುದು, ಅತಿಯಾದ ಸೇವನೆ: 

ಪರೀಕ್ಷೆಯ ಸಮಯದಲ್ಲಿ ಅತಿಯಾಗಿ ಆಹಾರ ಸೇವನೆ ಕೂಡದು. ಅದೇ ರೀತಿ, ಊಟವಿಲ್ಲದೆ ಕೂಡಾ ಇರಕೂಡದು. ಅಧ್ಯಯನ ಮಾಡುವಾಗ ಚಿಪ್ಸ್ ನಂತಹ ಕರಿದ ಆಹಾರಗಳನ್ನು ಸಹ ತಪ್ಪಿಸಬೇಕು. ಸಾಂದರ್ಭಿಕವಾಗಿ ಹಣ್ಣುಗಳು ಮತ್ತು ಬೀಜಗಳ ಸೇವನೆ ಉತ್ತಮ. 

ಚಾಕೊಲೇಟ್:

ಓದುವಾಗ ಬಹುಶಃ  ಚಾಕೊಲೇಟ್ ಸೇವಿಸುವುದು ಕೆಲವರ ಅಭ್ಯಾಸ. ಇದು ದೇಹಕ್ಕೆ ಗ್ಲೂಕೋಸ್ ತಲುಪಿಸಲು ಸಹಾಯ ಮಾಡುತ್ತದೆ. ಆದರೆ ಅದನ್ನು ಅತಿಯಾಗಿ ಮಾಡದಂತೆ ಎಚ್ಚರವಹಿಸಿ. ದೇಹದಲ್ಲಿ ಹೆಚ್ಚು ಸಕ್ಕರೆ ಇರುವುದು ಒಳ್ಳೆಯದಲ್ಲ.

ತಂಪು ಪಾನೀಯಗಳ ಬಳಕೆ:

ತಂಪು ಪಾನೀಯಗಳು ಸಕ್ಕರೆ ಮತ್ತು ಕೆಫೀನ್ ಅನ್ನು ಹೊಂದಿರುವುದರಿಂದ ಅಡ್ಡಪರಿಣಾಮಗಳನ್ನು ಉಂಟುಮಾಡುತ್ತವೆ ಎಂದು ತಿಳಿದುಬಂದಿದೆ. ಇವು ಹೃದಯ ಬಡಿತ ಮತ್ತು ರಕ್ತದೊತ್ತಡವನ್ನು ಹೆಚ್ಚಿಸಬಹುದು ಮತ್ತು ಆಮ್ಲೀಯತೆಯ ಸಮಸ್ಯೆಗಳನ್ನು ಉಂಟುಮಾಡಬಹುದು. ಹೃದಯ ಸಮಸ್ಯೆಗಳಿರುವ ಜನರಲ್ಲಿ ಇದು ಹೃದಯ ಸ್ತಂಭನಕ್ಕೂ ಕಾರಣವಾಗಬಹುದು. ಅಂತಹ ಪಾನೀಯಗಳ ಬದಲಿಗೆ ಜ್ಯೂಸ್, ಎಳನೀರು ಅಥವಾ ನಿಂಬೆ ರಸವನ್ನು ಬಳಸುವುದು ಸೂಕ್ತ.