ಕಂಪೆನಿ ಹೆಸರು ಬದಲಿಸಿದ ಗೌತಮ್ ಅದಾನಿ, ಷೇರು ಕುಸಿತ! ಮರುನಾಮಕರಣದ ಉದ್ದೇಶವೇನು?

ಅದಾನಿ ಗ್ರೂಪ್‌ನ FMCG ಕಂಪನಿ ಅದಾನಿ ವಿಲ್ಮರ್ ಹೆಸರನ್ನು AWL ಅಗ್ರಿ ಬ್ಯುಸಿನೆಸ್ ಲಿಮಿಟೆಡ್ ಎಂದು ಬದಲಾಯಿಸಲಾಗಿದೆ. ಮಂಗಳವಾರ, ಫೆಬ್ರವರಿ 25 ರಂದು ಕಂಪನಿಯು ಈ ಮಾಹಿತಿಯನ್ನು ನೀಡಿದೆ. ಕಂಪನಿಯ ಮರುನಾಮಕರಣದ ಉದ್ದೇಶವು ಅದರ ಗುರುತನ್ನು ಪ್ರಮುಖ ವ್ಯಾಪಾರ ಚಟುವಟಿಕೆಗಳು ಮತ್ತು ಕೃಷಿ-ವ್ಯಾಪಾರ ಉದ್ಯಮದಲ್ಲಿ ಭವಿಷ್ಯದ ಸಾಧ್ಯತೆಗಳೊಂದಿಗೆ ಸಂಪರ್ಕಿಸುವುದು.

ಇದರಿಂದ ಕಂಪನಿಯು ಕೃಷಿ ಮತ್ತು ಆಹಾರ ವಲಯದ ಮೇಲೆ ಗಮನ ಹರಿಸಲಿದೆ. ವರದಿಗಳ ಪ್ರಕಾರ, AWL ಅಗ್ರಿ ಬ್ಯುಸಿನೆಸ್ ಲಿಮಿಟೆಡ್ ಹಣಕಾಸು ವರ್ಷ 26 ರಲ್ಲಿ ಹೊಸ ಉತ್ಪನ್ನಗಳನ್ನು ಪರಿಚಯಿಸಲು ಕಾರ್ಯನಿರ್ವಹಿಸುತ್ತದೆ. ಅಡುಗೆ ಮನೆಗೆ ಅಗತ್ಯವಾದ ವಸ್ತುಗಳನ್ನು ಕೈಗೆಟುಕುವ ದರದಲ್ಲಿ ಮತ್ತು ಉತ್ತಮ ಗುಣಮಟ್ಟದಲ್ಲಿ ನೀಡಲು ಗುರಿಯನ್ನು ಹೊಂದಿದೆ. ಅಕ್ಟೋಬರ್ 2024 ರಲ್ಲಿ, ಅದಾನಿ ಎಂಟರ್‌ಪ್ರೈಸಸ್, ಅದಾನಿ ವಿಲ್ಮರ್‌ನೊಂದಿಗೆ ಆಹಾರ ಮತ್ತು FMCG ವ್ಯವಹಾರವನ್ನು ಬೇರ್ಪಡಿಸುವ ಯೋಜನೆಯನ್ನು ರದ್ದುಗೊಳಿಸಿತು.

ಅದಾನಿ ವಿಲ್ಮರ್ ಕೆಲಸವೇನು ?:
ಅದಾನಿ ವಿಲ್ಮರ್ ಕಂಪೆನಿಯು 1999 ರಲ್ಲಿ ಪ್ರಾರಂಭವಾಯಿತು. ಇದು ದೇಶದ ಪ್ರಮುಖ ಕಚ್ಚಾ ಪಾಮ್ ಆಯಿಲ್ ಸಂಸ್ಕರಿಸುವ ಕಂಪನಿಯಾಗಿದೆ. ದೇಶದಲ್ಲಿ ಅಡುಗೆ ಎಣ್ಣೆಯನ್ನು ಆಮದು ಮಾಡಿಕೊಳ್ಳುವ ಅತಿದೊಡ್ಡ ಕಂಪನಿಯೂ ಅದಾನಿ ವಿಲ್ಮರ್ ಆಗಿದೆ. ಇದು 10 ರಾಜ್ಯಗಳಲ್ಲಿ 23 ಸ್ಥಾವರಗಳನ್ನು ಹೊಂದಿದೆ. ಕಂಪನಿಯು ಅಡುಗೆ ಎಣ್ಣೆ, ಆಹಾರ ಮತ್ತು FMCG ಮತ್ತು ಕೈಗಾರಿಕೆಗಳಲ್ಲಿ ಬಳಸುವ ಉತ್ಪನ್ನಗಳನ್ನು ತಯಾರಿಸುತ್ತದೆ ಮತ್ತು ಮಾರಾಟ ಮಾಡುತ್ತದೆ. ಇದರಲ್ಲಿ ಸಾಸಿವೆ, ಸೂರ್ಯಕಾಂತಿ ಮತ್ತು ಸೋಯಾಬಿನ್‌ನಂತಹ ಅನೇಕ ಅಡುಗೆ ಎಣ್ಣೆಗಳು ಸೇರಿವೆ. ಅದಾನಿ ವಿಲ್ಮರ್‌ನ ಮಾರುಕಟ್ಟೆ ಮೌಲ್ಯ 33.96 ಸಾವಿರ ಕೋಟಿ ರೂಪಾಯಿ.

Adani Wilmar : ಹೆಸರು ಬದಲಾವಣೆಯಿಂದ ಎಷ್ಟು ಲಾಭ?:
ತಜ್ಞರ ಪ್ರಕಾರ, ಅದಾನಿ ವಿಲ್ಮರ್ ಹೆಸರನ್ನು ಬದಲಾಯಿಸುವುದರಿಂದ ಬಂಡವಾಳ ಹೂಡಿಕೆ ತಂತ್ರದಲ್ಲಿ ವೇಗ ಹೆಚ್ಚಾಗಬಹುದು. ಪ್ರಸ್ತುತ ಕಂಪನಿಯು ಸುಮಾರು 1,300 ಕೋಟಿ ರೂಪಾಯಿ ಮೌಲ್ಯದ ಆಹಾರ ಸಂಸ್ಕರಣಾ ಘಟಕಗಳನ್ನು ಹೊಂದಿದೆ, ಇದನ್ನು 2022 ರಲ್ಲಿ IPO ನಿಂದ ಸಂಗ್ರಹಿಸಿದ ಹಣದಿಂದ ಧನಸಹಾಯ ಮಾಡಲಾಗಿದೆ. ಕಂಪನಿಯು ಕಳೆದ ತಿಂಗಳು ಹರಿಯಾಣದ ಸೋನಿಪತ್‌ನಲ್ಲಿ ಆಹಾರ ಸಂಸ್ಕರಣಾ ಘಟಕದ ಕಾರ್ಯಾಚರಣೆಯನ್ನು ಪ್ರಾರಂಭಿಸಿತು, ಇದು ಅಡುಗೆ ಎಣ್ಣೆ ಮತ್ತು ಅನೇಕ ಆಹಾರ ಪದಾರ್ಥಗಳನ್ನು ಉತ್ಪಾದಿಸುತ್ತದೆ.

ಅದಾನಿ ವಿಲ್ಮರ್ ಎಷ್ಟು ಬಲಿಷ್ಠ ಕಂಪನಿ?:
2024-25ರ ಮೂರನೇ ತ್ರೈಮಾಸಿಕದಲ್ಲಿ ಅದಾನಿ ವಿಲ್ಮಲ್‌ನ ಲಾಭವು 104% ರಷ್ಟು ಏರಿಕೆಯಾಗಿ 411 ಕೋಟಿ ರೂಪಾಯಿ ತಲುಪಿದೆ, ಇದು ಒಂದು ವರ್ಷದ ಹಿಂದೆ ಇದೇ ತ್ರೈಮಾಸಿಕದಲ್ಲಿ 201 ಕೋಟಿ ರೂಪಾಯಿಗಳ ಲಾಭವನ್ನು ಗಳಿಸಿತ್ತು. ಅಕ್ಟೋಬರ್-ಡಿಸೆಂಬರ್ ತ್ರೈಮಾಸಿಕದಲ್ಲಿ ಕಂಪನಿಯ ಕಾರ್ಯಾಚರಣೆಯ ಆದಾಯ 15,859 ಕೋಟಿ ರೂಪಾಯಿಗಳಷ್ಟಿತ್ತು. ಇದರಲ್ಲಿ ವಾರ್ಷಿಕ ಆಧಾರದ ಮೇಲೆ 23.62% ರಷ್ಟು ಏರಿಕೆಯಾಗಿದೆ. ಹಿಂದಿನ ತ್ರೈಮಾಸಿಕದಲ್ಲಿ (ಜುಲೈ-ಸೆಪ್ಟೆಂಬರ್) ಕಂಪನಿಯ ಲಾಭ 311 ಕೋಟಿ ರೂಪಾಯಿಗಳಷ್ಟಿತ್ತು. ಜುಲೈ-ಸೆಪ್ಟೆಂಬರ್‌ನಲ್ಲಿ ಆದಾಯ 14,460 ಕೋಟಿ ರೂಪಾಯಿಗಳಷ್ಟಿತ್ತು.

ಅದಾನಿ ವಿಲ್ಮರ್ ಷೇರಿನ ಮೇಲೆ ಹೆಸರು ಬದಲಾವಣೆಯ ಪರಿಣಾಮ:
ಮಂಗಳವಾರ, ಫೆಬ್ರವರಿ 25 ರಂದು ಅದಾನಿ ವಿಲ್ಮರ್ ಷೇರು (Adani Wilmar Share) 2.76% ರಷ್ಟು ಕುಸಿದು 255.75 ರೂಪಾಯಿಗೆ ಕೊನೆಗೊಂಡಿತು. ಕಳೆದ ಒಂದು ತಿಂಗಳಿಂದ ಷೇರಿನಲ್ಲಿ ಕುಸಿತ ಕಂಡುಬರುತ್ತಿದೆ. 8 ತಿಂಗಳಲ್ಲಿ ಸುಮಾರು 32%, ಒಂದು ವರ್ಷದಲ್ಲಿ 35% ವರೆಗೆ ಷೇರು ಕುಸಿದಿದೆ. ಈ ವರ್ಷದಲ್ಲಿ ಇದುವರೆಗೆ 21% ವರೆಗೆ ಕುಸಿತವಾಗಿದೆ.