ತೆಲಂಗಾಣ-ಕೇರಳ ಅಂತರರಾಜ್ಯ ಯುವ ವಿನಿಮಯ ಕಾರ್ಯಕ್ರಮ ಆರಂಭ

ತಿರುವನಂತಪುರಂ: ಕೇಂದ್ರ ಯುವ ವ್ಯವಹಾರ ಮತ್ತು ಕ್ರೀಡಾ ಸಚಿವಾಲಯ, ಮೇರಾ ಯುವ ಭಾರತ್ ಮತ್ತು ನೆಹರು ಯುವ ಕೇಂದ್ರ ಸಂಘಟನೆ ಜಂಟಿಯಾಗಿ ಆಯೋಜಿಸಿರುವ ಅಂತರರಾಜ್ಯ ಯುವ ವಿನಿಮಯ ಕಾರ್ಯಕ್ರಮವು ತಿರುವನಂತಪುರಂನಲ್ಲಿ ಆರಂಭವಾಗಿದೆ.

ಕೇಂದ್ರ ಮಾಹಿತಿ ಮತ್ತು ಪ್ರಸಾರ ಸಚಿವಾಲಯದ ಅಡಿಯಲ್ಲಿ ಬರುವ ತಿರುವನಂತಪುರಂ ಪತ್ರಿಕಾ ಮಾಹಿತಿ ಬ್ಯೂರೋದ ಹೆಚ್ಚುವರಿ ಮಹಾನಿರ್ದೇಶಕ ವಿ. ಪಳನಿಚಾಮಿ ಉದ್ಘಾಟಿಸಿದರು. ನೆಹರು ಯುವ ಕೇಂದ್ರ ಸಂಘಟನೆಯ ರಾಜ್ಯ ನಿರ್ದೇಶಕ ಅನಿಲ್ ಕುಮಾರ್ ಎಂ ಅಧ್ಯಕ್ಷತೆ ವಹಿಸಿದ್ದರು. ನೆಹರು ಯುವ ಕೇಂದ್ರದ ಜಿಲ್ಲಾ ಅಧಿಕಾರಿ ಸಂದೀಪ್ ಕೃಷ್ಣನ್ ಪಿ ನಿರ್ವಹಿಸಿದರು. 

ಈ ತಿಂಗಳ 21 ರಿಂದ 25 ರವರೆಗೆ ವೇಲಿ ಸರ್ಕಾರಿ ಯುವ ಹಾಸ್ಟೆಲ್‍ನಲ್ಲಿ ನಡೆಯುತ್ತಿರುವ ಈ ಕಾರ್ಯಕ್ರಮದಲ್ಲಿ ತೆಲಂಗಾಣದ ಹೈದರಾಬಾದ್, ಖಮ್ಮಂ, ಆದಿಲಾಬಾದ್, ಕರೀಂನಗರ ಮತ್ತು ಮಹಬೂಬ್‍ನಗರ ಜಿಲ್ಲೆಗಳಿಂದ 27 ಯುವಕ-ಯುವತಿಯರು ಭಾಗವಹಿಸುತ್ತಿದ್ದಾರೆ. ರಾಷ್ಟ್ರೀಯ ಏಕೀಕರಣದ ಕಲ್ಪನೆಯನ್ನು ಉತ್ತೇಜಿಸುವುದು, ಎರಡೂ ರಾಜ್ಯಗಳ ಶ್ರೀಮಂತ ಪರಂಪರೆ, ಸಂಸ್ಕøತಿ, ಪದ್ಧತಿಗಳು ಮತ್ತು ಸಂಪ್ರದಾಯಗಳನ್ನು ಅರ್ಥಮಾಡಿಕೊಳ್ಳುವುದು, ಭಾರತದ ವೈವಿಧ್ಯತೆಯನ್ನು ಅರ್ಥಮಾಡಿಕೊಳ್ಳುವುದು ಮತ್ತು ಎರಡು ರಾಜ್ಯಗಳ ಜನರು ಎದುರಿಸುತ್ತಿರುವ ಸಮಸ್ಯೆಗಳ ಬಗ್ಗೆ ತಿಳಿದುಕೊಳ್ಳುವ ಉದ್ದೇಶಗಳೊಂದಿಗೆ ಕೇಂದ್ರ ಯುವ ವ್ಯವಹಾರ ಮತ್ತು ಕ್ರೀಡಾ ಸಚಿವಾಲಯದ ಆಶ್ರಯದಲ್ಲಿ ನೆಹರು ಯುವ ಕೇಂದ್ರವು ಈ ಕಾರ್ಯಕ್ರಮವನ್ನು ಆಯೋಜಿಸುತ್ತಿದೆ.

ವಿವಿಧ ವಿಷಯಗಳ ಕುರಿತು ತರಗತಿಗಳ ಜೊತೆಗೆ, ಈ ಕಾರ್ಯಕ್ರಮವು ಗುಂಪು ಸದಸ್ಯರಿಗೆ ಕೇರಳ ವಿಧಾನಸಭೆ, ವಿಕ್ರಮ್ ಸಾರಾಭಾಯ್ ಬಾಹ್ಯಾಕಾಶ ಕೇಂದ್ರ, ಶ್ರೀ ಪದ್ಮನಾಭಸ್ವಾಮಿ ದೇವಸ್ಥಾನ, ಕೋವಳಂ ಬೀಚ್, ನೇಪಿಯರ್ ವಸ್ತುಸಂಗ್ರಹಾಲಯ, ಮೃಗಾಲಯ, ಪೊನ್ಮುಡಿ, ಲುಲು ಮಾಲ್, ನೆಯ್ಯರ್ ಅಣೆಕಟ್ಟು, ಕೊಟ್ಟೂರು ಆನೆ ಅಭಯಾರಣ್ಯ, ಗೀತಾಂಜಲಿ ಕಲೆ ಮತ್ತು ಕ್ರೀಡಾ ಕ್ಲಬ್ ಇತ್ಯಾದಿಗಳಿಗೆ ಭೇಟಿ ನೀಡುವ ಅವಕಾಶಗಳನ್ನು ಒದಗಿಸುತ್ತದೆ. ಪುರಾತತ್ವ ಮತ್ತು ಪ್ರಾಚ್ಯವಸ್ತುಗಳ ರಾಜ್ಯ ಸಚಿವ ರಾಮಚಂದ್ರನ್ ಕಡನ್ನಪಳ್ಳಿ, ಶಾಸಕ ಆಂಟೋನಿ ರಾಜು ಮತ್ತು ಇತರರು ವಿವಿಧ ದಿನಗಳಲ್ಲಿ ಕಾರ್ಯಕ್ರಮದಲ್ಲಿ ಭಾಗವಹಿಸಲಿದ್ದಾರೆ. ಈ ತಂಡ ಫೆಬ್ರವರಿ 25 ರಂದು ಹಿಂತಿರುಗಲಿದೆ.