ನಾಗಾ ಸಾಧುಗಳ ಅಖಾಡದಲ್ಲೇ ಇರುವೆ ಎಂದು ಮತ್ತೆ ಸುದ್ದಿಯಾದ ಮಮತಾ ಕುಲಕರ್ಣಿ

ಪ್ರಯಾಗ್ ರಾಜ್:  ಬಾಲಿವುಡ್‌ನ ಮಾಜಿ ನಟಿ, ರೂಪದರ್ಶಿ ಮಮತಾ ಕುಲಕರ್ಣಿ ಅವರು ನಾಗಾ ಸಾಧುಗಳ ಕಿನ್ನಾರಾ ಅಖಾಡದ ಮಹಾಂಡಲೇಶ್ವರ ಹುದ್ದೆಯನ್ನು ತೊರೆದಿದ್ದೇನೆ ಎಂದು ಹೇಳಿದ್ದರು.

ಆದರೆ ಅವರ ನಿರ್ಧಾರವನ್ನು ನಾವು ಅಂಗೀಕರಿಸಿಲ್ಲ ಎಂದು ಕಿನ್ನಾರಾ ಅಖಾಡದ ಮಹಾಂಡಲೇಶ್ವರ ಆಚಾರ್ಯ ಲಕ್ಷ್ಮಿ ನಾರಾಯಣ ತ್ರಿಪಾಠಿ ಇಂದು ಹೇಳಿದ್ದಾರೆ.

ಸಾಧ್ವಿ ಮಮತಾ ಕುಲಕರ್ಣಿ ಅವರು ಮಹಾಂಡಲೇಶ್ವರ ಹುದ್ದೆಯಲ್ಲಿ ಮುಂದುವರೆಯಲಿದ್ದಾರೆ ಎಂದು ಪಿಟಿಐಗೆ ತಿಳಿಸಿದ್ದಾರೆ.

ಈ ಕುರಿತು ಪ್ರತಿಕ್ರಿಯಿಸಿರುವ ಸಾಧ್ವಿ ಮಮತಾ ಕುಲಕರ್ಣಿ ಅವರು ನನ್ನ ನಿರ್ಧಾರವನ್ನು ಅವರು (ಆಚಾರ್ಯ ಲಕ್ಷ್ಮಿ ನಾರಾಯಣ ತ್ರಿಪಾಠಿ) ಒಪ್ಪಿಲ್ಲ. ನಾನು ಅಖಾಡದಲ್ಲಿ ಮುಂದುವರೆಯುತ್ತೇನೆ. ಇದಕ್ಕಾಗಿ ನಾನು ತ್ರಿಪಾಠಿ ಅವರಿಗೆ ಆಭಾರಿಯಾಗಿದ್ದೇನೆ ಎಂದು ಹೇಳಿದ್ದಾರೆ.

ಮಮತಾ ಅವರು ಕುಂಭಮೇಳದಲ್ಲಿ ಜನವರಿ 24 ರಂದು ಸನ್ಯಾಸ ಸ್ವೀಕರಿಸಿ ಗಮನ ಸೆಳೆದಿದ್ದರು.

ಆದರೆ ಅವರ ನೇಮಕ ವಿವಾದವಾಗಿದ್ದರಿಂದ ಫೆ.10 ರಂದು ವಿಡಿಯೊ ಮಾಡಿದ್ದ ಮಮತಾ ಅವರು ತಾವು ಮಹಾಂಡಲೇಶ್ವರ ಕಿನ್ನಾರಾ ಅಖಾಡವನ್ನು ತೊರೆಯುವುದಾಗಿ ಘೋಷಿಸಿದ್ದರು. ನಾನು ಮಹಾಂಡಲೇಶ್ವರ ಕಿನ್ನಾರಾ ಅಖಾಡದ ಹುದ್ದೆಯಿಂದ ನಿರ್ಗಮಿಸುವೆ. ಬಾಲ್ಯದಿಂದಲೂ ಸಾಧ್ವಿಯಾಗಿದ್ದೆ. ಇನ್ನು ಮುಂದೆಯೂ ಸಾಧ್ವಿಯಾಗಿರುವೆ ಎಂದು ಹೇಳಿದ್ದರು.

52 ವರ್ಷ ವಯಸ್ಸಿನ ಅವರು ಮಹಾಂಡಲೇಶ್ವರ ಕಿನ್ನಾರಾ ಅಖಾಡದಲ್ಲಿ 'ಯಾಮೈ ಮಮತಾ ನಂದಗಿರಿ' ಹೆಸರಿನಿಂದ ಗುರುತಿಸಿಕೊಂಡು ಅಧ್ಯಾತ್ಮ ಕಾರ್ಯಗಳಲ್ಲಿ ತೊಡಗಿಸಿಕೊಂಡಿದ್ದಾರೆ.

ಚಿತ್ರರಂಗದಿಂದ ನಿರ್ಗಮಿಸಿದ್ದ ಅವರು ಕೆಲ ತಿಂಗಳ ಹಿಂದಷ್ಟೇ, ಮತ್ತೆ ಸುಮಾರು 25 ವರ್ಷಗಳ ಬಳಿಕ ಮುಂಬೈಗೆ ಮರಳಿದ್ದರು.

'ಮಮತಾ ಕುಲಕರ್ಣಿ ನನ್ನ ಜೊತೆ 10 ವರ್ಷದಿಂದ ಸಂಪರ್ಕದಲ್ಲಿದ್ದಾರೆ. ಸನಾತನ ಧರ್ಮಕ್ಕೆ ಬದ್ಧವಾಗಿರುವುದಾಗಿ ಅವರು ತಿಳಿಸಿದ್ದಾರೆ' ಎಂದು ಮಹಾಂಡಲೇಶ್ವರ ಆಚಾರ್ಯ ಲಕ್ಷ್ಮಿ ನಾರಾಯಣ ತ್ರಿಪಾಠಿ ಹೇಳಿದ್ದರು.

ವಿಕಿ ಗೋಸ್ವಾಮಿ ಜೊತೆ ವಿವಾಹ ಆಗಿದ್ದ ಅವರು, ಕೆಲ ವರ್ಷ ಆಫ್ರಿಕಾದಲ್ಲಿ ವಾಸವಿದ್ದರು. ಮಾದಕ ವಸ್ತು ಪ್ರಕರಣ ಸಂಬಂಧ ಅಮೆರಿಕದ ತನಿಖಾ ಸಂಸ್ಥೆಯ ತನಿಖೆಗೂ ಒಳಪಟ್ಟಿದ್ದರು.