Google Ananta: ಬೆಂಗಳೂರಿನಲ್ಲಿ ಗೂಗಲ್ ಕಂಪನಿಯ ಅತಿದೊಡ್ಡ ಭಾರತದ ಕಚೇರಿ ಅನಂತ ಉದ್ಘಾಟನೆ: ಹೇಗಿದೆ ನೋಡಿ

ತಂತ್ರಜ್ಞಾನ ದೈತ್ಯ ಗೂಗಲ್ ಬೆಂಗಳೂರಿನಲ್ಲಿ ತನ್ನ ಹೊಸ ಕ್ಯಾಂಪಸ್ ಅನ್ನು ಉದ್ಘಾಟಿಸಿದೆ. ಇದು ಜಾಗತಿಕವಾಗಿ ತನ್ನ ಅತಿದೊಡ್ಡ ಕಚೇರಿಗಳಲ್ಲಿ ಒಂದಾಗಿದೆ ಎಂದು ಹೇಳಲಾಗಿದೆ. ಮಹಾದೇವಪುರದಲ್ಲಿರುವ ಗೂಗಲ್ ಅನಂತ ಕ್ಯಾಂಪಸ್ 1.6 ಮಿಲಿಯನ್ ಚದರ ಅಡಿ ವಿಸ್ತೀರ್ಣದಲ್ಲಿದ್ದು, ಭಾರತದ ಅತಿದೊಡ್ಡ ಗೂಗಲ್ ಕಚೇರಿ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ.

"ಇಂದು, ಜಾಗತಿಕವಾಗಿ ಗೂಗಲ್‌ನ ಅತಿದೊಡ್ಡ ಕಚೇರಿಗಳಲ್ಲಿ ಒಂದಾದ ಅನಂತ ಕಚೇರಿಯ ಉದ್ಘಾಟನೆಯೊಂದಿಗೆ ಭಾರತಕ್ಕೆ ನಮ್ಮ ನಿರಂತರ ಬದ್ಧತೆಯಲ್ಲಿ ಮತ್ತೊಂದು ಪ್ರಮುಖ ಮೈಲಿಗಲ್ಲನ್ನು ಹಂಚಿಕೊಳ್ಳಲು ನಾವು ಉತ್ಸುಕರಾಗಿದ್ದೇವೆ" ಎಂದು ಗೂಗಲ್ ಬ್ಲಾಗ್ ಪೋಸ್ಟ್‌ನಲ್ಲಿ ಘೋಷಿಸಿದೆ.

ಎರಡು ದಶಕಗಳಿಂದ, AI-ಚಾಲಿತ ಪ್ರವಾಹ ಮುನ್ಸೂಚನೆ, ಕ್ಷಯರೋಗವನ್ನು ಮೊದಲೇ ಕಂಡುಹಿಡಿಯಲು ವಿಶೇಷ AI ಮಾದರಿಗಳು ಮತ್ತು ಲಕ್ಷಾಂತರ ಜನರು ಗೂಗಲ್ ಪೇ ನೊಂದಿಗೆ ಔಪಚಾರಿಕ ಆರ್ಥಿಕತೆಗೆ ಸೇರಲು ಸಹಾಯ ಮಾಡುವ ಮೂಲಕ ರೂಪಾಂತರವನ್ನು ಮತ್ತಷ್ಟು ಸುಗಮಗೊಳಿಸುವಲ್ಲಿ ಪಾತ್ರ ವಹಿಸಿದೆ ಎಂದು ಗೂಗಲ್ ಹೇಳಿದೆ.

ಹೊಸ ಕ್ಯಾಂಪಸ್‌ಗೆ ಅನಂತ ಎಂದು ಹೆಸರು:

'ಅನಂತ' ಎಂದು ಹೆಸರಿಸಲಾದ ಹೊಸ ಕ್ಯಾಂಪಸ್, ಸಂಸ್ಕೃತದಲ್ಲಿ 'ಅಪರಿಮಿತ' ಎಂದರ್ಥ, ತಂತ್ರಜ್ಞಾನದ ಮೂಲಕ ಜೀವನವನ್ನು ಸುಧಾರಿಸಲು ಕಂಪನಿಯು ನೋಡುವ ಅಪರಿಮಿತ ಸಾಮರ್ಥ್ಯವನ್ನು ಸೂಚಿಸುತ್ತದೆ. "ವಿಶ್ವದ ಅತ್ಯಂತ ವೇಗವಾಗಿ ಬೆಳೆಯುತ್ತಿರುವ ತಂತ್ರಜ್ಞಾನ ಕೇಂದ್ರಗಳಲ್ಲಿ ಒಂದಾದ ಬೆಂಗಳೂರಿನಲ್ಲಿ ನೆಲೆಗೊಂಡಿರುವ ಅನಂತ ನಮ್ಮ ಅತ್ಯಂತ ಮಹತ್ವಾಕಾಂಕ್ಷೆಯ ಗ್ರೌಂಡ್-ಅಪ್ ಅಭಿವೃದ್ಧಿಗಳಲ್ಲಿ ಒಂದಾಗಿದೆ. ಗೂಗಲ್ ಇಂಡಿಯಾ ಮತ್ತು ಸ್ಥಳೀಯ ಅಭಿವೃದ್ಧಿ ಮತ್ತು ವಿನ್ಯಾಸ ತಂಡದ ನಡುವಿನ ಸಹಯೋಗದೊಂದಿಗೆ, ಅನಂತ ಕ್ಯಾಂಪಸ್ ಕೆಲಸದ ಸ್ಥಳ ವಿನ್ಯಾಸದಲ್ಲಿ ಗೂಗಲ್‌ನ ಇತ್ತೀಚಿನ ಚಿಂತನೆಯನ್ನು ಸಾಕಾರಗೊಳಿಸುತ್ತದೆ" ಎಂದು ಕಂಪನಿ ಹೇಳಿದೆ.

ಅನಂತ ಕ್ಯಾಂಪಸ್ ಮತ್ತೊಂದು ವಿಶೇಷವೆಂದರೆ 100 ಪ್ರತಿಶತ ತ್ಯಾಜ್ಯ ನೀರಿನ ಮರುಬಳಕೆಯನ್ನು ಇಲ್ಲಿ ಮಾಡಲಾಗುತ್ತದೆ. ಇದರೊಂದಿಗೆ ಮಳೆನೀರು ಕೊಯ್ಲು ವ್ಯವಸ್ಥೆಯನ್ನು ಒಳಗೊಂಡಿದೆ. ಇದರಿಂದ ನೂರಾರು ಲೀಟರ್ ಮಳೆನೀರನ್ನು ಸ್ಥಳದಲ್ಲೇ ಸಂಗ್ರಹಿಸಬಹುದು. ಹಾಗೆಯೆ ಶಕ್ತಿಯ ಬಳಕೆಯನ್ನು ಕಡಿಮೆ ಮಾಡಲು ಭಾರತದ ಅತಿದೊಡ್ಡ ಸ್ಮಾರ್ಟ್ ಗ್ಲಾಸ್ ಅಳವಡಿಸಿಕೊಳ್ಳಲಾಗಿದೆ. ಅಂದರೆ ಭಾರತದ ಅತಿದೊಡ್ಡ ಎಲೆಕ್ಟ್ರೋ-ಕ್ರೋಮಿಕ್ ಗಾಜಿನ್ನು ಬಳಕೆ ಮಾಡಿಕೊಳ್ಳಲಾಗಿದೆ. ನೈಸರ್ಗಿಕ ಬೆಳಕನ್ನು ಹೆಚ್ಚಿಸುವ ಮತ್ತು ಉತ್ಪಾದಕ ಕೆಲಸದ ವಾತಾವರಣವನ್ನು ಬೆಳೆಸುವ ವಿಶಿಷ್ಟವಾದ ಶಿಲ್ಪಕಲೆ ಮುಂಭಾಗವನ್ನು ಒಳಗೊಂಡಂತೆ ಅತ್ಯಾಧುನಿಕ ವೈಶಿಷ್ಟ್ಯಗಳನ್ನು ಇದು ಒಳಗೊಂಡಿದೆ.

ವಿಶಾಲ ಸ್ಥಳಾವಕಾಶವನ್ನು ಕಚೇರಿ ಹೊಂದಿದ್ದು, ಕ್ಯಾಂಪಸ್‌ನಲ್ಲಿ ವಾಕಿಂಗ್ ಮತ್ತು ಜಾಗಿಂಗ್‌ಗೆ ಪ್ರತ್ಯೇಕ ಜಾಗಗಳನ್ನು ಮಾಡಲಾಗಿದೆ. ಇದು ಬರೋಬ್ಬರಿ 16 ಲಕ್ಷ ಚದರ ಅಡಿ ಸ್ಥಳಾವಕಾಶವನ್ನು ಹೊಂದಿದ್ದು ಸುಮಾರು 11 ಅಂತಸ್ತುಗಳನ್ನು ಒಳಗೊಂಡಿದೆ. ಇಷ್ಟೇ ಅಲ್ಲದೇ ಚೈಲ್ಡ್ ಡೇ ಕೇರ್ ಕೇಂದ್ರ ಇಲ್ಲಿರಲಿದ್ದು, ದೈಹಿಕ ವ್ಯಾಯಾಮಕ್ಕಾಗಿ ಜಿಮ್ ವ್ಯವಸ್ಥೆ, ಆಟದ ಕೇಂದ್ರ, ಬ್ಯಾಡ್ಮಿಂಟನ್ ಕೋರ್ಟ್, ವಾಲಿಬಾಲ್, ಕ್ರಿಕೆಟ್ ಆಡಲು ಸೌಲಭ್ಯಗಳಿವೆ.

11 ಅಂತಸ್ತಿನ ಹೊಚ್ಚ ಹೊಸ ಅನಂತ ಕ್ಯಾಂಪಸ್ ಬೆಂಗಳೂರಿನಲ್ಲಿರುವ ನಾಲ್ಕನೇ ಗೂಗಲ್ ಕಚೇರಿಯಾಗಿದೆ. ಇದು ಗೂಗಲ್ ಸರ್ಚ್, ಮ್ಯಾಪ್ಸ್, AI, ಆಂಡ್ರಾಯ್ಡ್, ಗೂಗಲ್ ಪೇ, ಕ್ಲೌಡ್ ಮತ್ತು ಬಹು-ಇಲಾಖೆಯ ಸಹಯೋಗಕ್ಕಾಗಿ ಹೆಚ್ಚಿನ ಅಪ್ಲಿಕೇಶನ್‌ಗಳು ಸೇರಿದಂತೆ ವಿವಿಧ ವಿಭಾಗಗಳಲ್ಲಿ ಕೆಲಸ ಮಾಡುವ 5,000 ಕ್ಕೂ ಹೆಚ್ಚು ಉದ್ಯೋಗಿಗಳಿಗೆ ಅವಕಾಶ ಕಲ್ಪಿಸುತ್ತದೆ. ಬೆಂಗಳೂರಿನ ಜೊತೆಗೆ, ಗೂಗಲ್ ಭಾರತದಲ್ಲಿ ಗುರಗಾಂವ್, ಹೈದರಾಬಾದ್, ಮುಂಬೈ ಮತ್ತು ಪುಣೆ ಸೇರಿದಂತೆ ಹಲವಾರು ಕಚೇರಿ ಕ್ಯಾಂಪಸ್‌ಗಳನ್ನು ಹೊಂದಿದ್ದು, 11,000 ಕ್ಕೂ ಹೆಚ್ಚು ಉದ್ಯೋಗಿಗಳನ್ನು ಹೊಂದಿದೆ. ಕಳೆದ ಹಲವಾರು ವರ್ಷಗಳಿಂದ, ಗೂಗಲ್ ಭಾರತದಲ್ಲಿ ಹೆಚ್ಚಿನ ಹೂಡಿಕೆ ಮಾಡುತ್ತಿದೆ ಮತ್ತು AI, ಕೃಷಿ, ಸುಸ್ಥಿರತೆ ಮತ್ತು ಆರೋಗ್ಯ ಕ್ಷೇತ್ರದಲ್ಲಿ ಸ್ಥಳೀಯ ಸ್ಟಾರ್ಟ್‌ಅಪ್‌ಗಳು ಮತ್ತು ಸರ್ಕಾರಿ ಸಂಸ್ಥೆಗಳೊಂದಿಗೆ ಸಹಕರಿಸುತ್ತಿದೆ.