ಇಂಟರ್ನೆಟ್ ವೇಗ 100 Mbps ಇದ್ರೂ ಸೆಕೆಂಡಿಗೆ 100 MB ಫೈಲ್ ಡೌನ್‌ಲೋಡ್ ಆಗಲ್ಲ ಏಕೆ?

0 samarasasudhi ಮಾರ್ಚ್ 23, 2025

ಬ್ರಾಡ್‌ಬ್ಯಾಂಡ್ ಅಥವಾ ಇಂಟರ್ನೆಟ್ ಕಂಪೆನಿಗಳು "100 Mbps ಡೌನ್‌ಲೋಡ್ ವೇಗ" ಎಂದು ಜಾಹೀರಾತು ನೀಡುತ್ತಾರೆ. ಇದು ಸಾಧ್ಯವಾದರೆ ಒಂದು ಸೆಕೆಂಡಿಗೆ 100 MB ಫೈಲ್ ಡೌನ್‌ಲೋಡ್ ಆಗಬೇಕು.! ಆದರೆ, ಅದರ ಅರ್ಧದಷ್ಟು ವೇಗವಾಗಿಯೂ ಸಹ ಡೌನ್‌ಲೋಡ್ ಆಗುವುದಿಲ್ಲ ಎಂಬುದು ಬಹುತೇಕರ ಪ್ರಶ್ನೆ. ಇದಕ್ಕೆ ಕಾರಣ ಇಂಟರ್ನೆಟ್ ಕಂಪನಿಗಳು ನಮಗೆ ಮೋಸ ಮಾಡುತ್ತಿವೆ ಎಂಬ ಸಂಶಯ ಹಲವರಲ್ಲಿ ಮೂಡಿರಬಹುದು. ಈ ಪ್ರಶ್ನೆ ಮತ್ತು ಸಂಶಯ ಎರಡು ನಿಮ್ಮಲ್ಲಿಯೂ ಮೂಡಿದೆಯಾ?. ಬನ್ನಿ ಇಂದಿನ ಲೇಖನದಲ್ಲಿ ಇದಕ್ಕೆ ಸರಿಯಾದ ಉತ್ತರವನ್ನು ತಿಳಿಯೋಣ.

ಇಂಟರ್‌ನೆಟ್ ಕಂಪೆನಿಗಳು 'ಸೆಕೆಂಡಿಗೆ 100 Mbps ಡೌನ್‌ಲೋಡ್ ವೇಗ ಇದೆ' ಎಂದು ಜಾಹೀರಾತು ನೀಡಿದರೂ, ಒಂದು ಸೆಕೆಂಡಿನಲ್ಲಿ 100 ಎಂಬಿ ಫೈಲ್ ಅಥವಾ ವಿಡಿಯೊ ಡೌನ್‌ಲೋಡ್ ಮಾಡುವುದು ಸಾಧ್ಯವಾಗುವುದಿಲ್ಲ. ಏಕೆಂದರೆ, 100 Mbps ಎಂದರೆ ಒಂದು ಸೆಕೆಂಡಿಗೆ 100 MB ಫೈಲ್ ಡೌನ್‌ಲೋಡ್ ಆಗುತ್ತದೆ ಎಂದು ಅರ್ಥವಲ್ಲ. ಏಕೆಂದರೆ, ಇಲ್ಲಿ ಎರಡು ಬೇರೆ ಬೇರೆ ಘಟಕಗಳನ್ನು ಬಳಸಲಾಗುತ್ತದೆ: ಮೆಗಾಬಿಟ್‌ಗಳು (Mbps) ಮತ್ತು ಮೆಗಾಬೈಟ್‌ಗಳು (MBps). ಈ ಗೊಂದಲವೇ ಗ್ರಾಹಕರಿಗೆ ವೇಗದ ಕುರಿತು ತಪ್ಪು ತಿಳುವಳಿಕೆ ಉಂಟುಮಾಡುತ್ತದೆ.
ಹಾಗಾಗಿ, ಮೊದಲು ಮೆಗಾಬಿಟ್ (Mbps) ಮತ್ತು ಮೆಗಾಬೈಟ್ (MBps) ನಡುವಿನ ವ್ಯತ್ಯಾಸವನ್ನು ಅರ್ಥಮಾಡಿಕೊಳ್ಳುವುದು ಮುಖ್ಯ. ಮೆಗಾಬಿಟ್ (Mbps) ಎಂಬುದು internet ವೇಗವನ್ನು ಅಳೆಯುತ್ತದೆ, ಪ್ರತಿ ಸೆಕೆಂಡಿಗೆ ವರ್ಗಾವಣೆಯಾಗುವ ಬಿಟ್‌ಗಳ ಸಂಖ್ಯೆಯನ್ನು ಸೂಚಿಸುತ್ತದೆ. "ಬಿಟ್" ಡೇಟಾದ ಮೂಲ ಘಟಕ. ಹಾಗೆಯೇ, ಮೆಗಾಬೈಟ್ (MBps) ಫೈಲ್‌ಗಳ ಗಾತ್ರವನ್ನು ಅಳೆಯುತ್ತದೆ, 1 ಮೆಗಾಬೈಟ್ (MB) = 8 ಮೆಗಾಬಿಟ್‌ಗಳು (Mb). ಈ ವ್ಯತ್ಯಾಸವು ಡೌನ್‌ಲೋಡ್ ವೇಗದ ಲೆಕ್ಕಾಚಾರದಲ್ಲಿ ನಿರ್ಣಾಯಕ ಪಾತ್ರ ವಹಿಸುತ್ತದೆ. ಅಂದರೆ, 100 Mbps ಇಂಟರ್ನೆಟ್ ಸಂಪರ್ಕವನ್ನು ಹೊಂದಿದ್ದರೆ, ನಿಮ್ಮ ಡೌನ್‌ಲೋಡ್ ವೇಗವು 12.5 MBps ಆಗಿರುತ್ತದೆ (100 Mbps / 8 = 12.5 MBps). ಇದರರ್ಥ, 100 MB ಗಾತ್ರದ ಫೈಲ್ ಅನ್ನು ಡೌನ್‌ಲೋಡ್ ಮಾಡಲು ಸುಮಾರು 8 ಸೆಕೆಂಡುಗಳು ಬೇಕಾಗುತ್ತವೆ (100 MB / 12.5 MBps = 8 ಸೆಕೆಂಡುಗಳು). ಇಂಟರ್‌ನೆಟ್ ಕಂಪೆನಿಗಳು ಗ್ರಾಹಕರನ್ನು ಆಕರ್ಷಿಸಲು ಹೆಚ್ಚಾಗಿ Mbps ನಲ್ಲಿ ಇಂಟರ್ನೆಟ್ ವೇಗವನ್ನು ಜಾಹೀರಾತು ಮಾಡುತ್ತವೆ, ಏಕೆಂದರೆ, Mbps ನಲ್ಲಿನ ಸಂಖ್ಯೆಗಳು MBps ಗಿಂತ ದೊಡ್ಡದಾಗಿ ಕಾಣುತ್ತವೆ.

5G ತಂತ್ರಜ್ಞಾನವು ಗಿಗಾಬಿಟ್ ವೇಗವನ್ನು (Gbps) ತಲುಪುವ ಸಾಮರ್ಥ್ಯವನ್ನು ಹೊಂದಿದೆ. 1 Gbps ಎಂದರೆ 1000 Mbps. ಆದಾಗ್ಯೂ, 1 GB ಫೈಲ್ ಅನ್ನು ಒಂದು ಸೆಕೆಂಡಿನಲ್ಲಿ ಡೌನ್‌ಲೋಡ್ ಮಾಡಲು 8 Gbps ವೇಗದ ಅಗತ್ಯವಿದೆ. ಪ್ರಸ್ತುತ, 5G ನೆಟ್‌ವರ್ಕ್‌ಗಳು ಸಾಮಾನ್ಯವಾಗಿ 300-325 Mbps ವೇಗವನ್ನು ನೀಡುತ್ತವೆ. ಆದ್ದರಿಂದ, ಇಂಟರ್‌ನೆಟ್ ಕಂಪೆನಿಗಳು 1 Gbps ವೇಗ ಇರುತ್ತದೆ ಎಂದು ಹೇಳಿದರೆ, 1 GB ಫೈಲ್ ಒಂದು ಸೆಕೆಂಡಿಗೆ ಡೌನ್‌ಲೋಡ್ ಆಗಬೇಕಾದರೆ, 8 Gbps ವೇಗದ ಇಂಟರ್‌ನೆಟ್ ಇರಬೇಕು.

ಒಟ್ಟಾರೆಯಾಗಿ, ಇಂಟರ್ನೆಟ್ ವೇಗವನ್ನು Mbps ನಲ್ಲಿ ಅಳೆಯಲಾಗುತ್ತದೆ, ಆದರೆ ಫೈಲ್‌ಗಳ ಗಾತ್ರವನ್ನು MB ನಲ್ಲಿ ಅಳೆಯಲಾಗುತ್ತದೆ. 1 MB = 8 Mb. 100 Mbps ಇಂಟರ್ನೆಟ್ ಸಂಪರ್ಕವು 12.5 MBps ಡೌನ್‌ಲೋಡ್ ವೇಗವನ್ನು ನೀಡುತ್ತದೆ. ಗಿಗಾಬಿಟ್ ವೇಗವು ಗಿಗಾ ಬಿಟ್ ಪ್ರತಿ ಸೆಕೆಂಡಿಗೆ, ಮತ್ತು ಗಿಗಾ ಬೈಟ್ ಗಿಂತ ಭಿನ್ನವಾಗಿರುತ್ತದೆ. ಈ ಮಾಹಿತಿಯು ಮೆಗಾಬಿಟ್‌ಗಳು ಮತ್ತು ಮೆಗಾಬೈಟ್‌ಗಳ ನಡುವಿನ ವ್ಯತ್ಯಾಸವನ್ನು ಅರ್ಥಮಾಡಿಕೊಳ್ಳಲು ಮತ್ತು ನಿಮ್ಮ ಇಂಟರ್ನೆಟ್ ವೇಗವನ್ನು ನಿಖರವಾಗಿ ಲೆಕ್ಕಾಚಾರ ಮಾಡಲು ಸಹಾಯ ಮಾಡುತ್ತದೆ.