ಮೊನ್ನೆಯೊಂದೇ ದಿನ 203 ಮಾದಕ ವಸ್ತು ಪ್ರಕರಣ ದಾಖಲು: 208 ಜನರ ಬಂಧನ; ಎಂಡಿಎಂಎ ಮತ್ತು ಗಾಂಜಾ ವಶ

ತಿರುವನಂತಪುರಂ: ಆಪರೇxನ್ ಡಿ-ಹಂಟ್ ನ ಭಾಗವಾಗಿ, ಮೊನ್ನೆಯೊಂದೇ ದಿನ (18) ರಾಜ್ಯಾದ್ಯಂತ ನಡೆಸಿದ ವಿಶೇಷ ಕಾರ್ಯಾಚರಣೆಯಲ್ಲಿ ಮಾದಕವಸ್ತು ಕಳ್ಳಸಾಗಣೆಯಲ್ಲಿ ಭಾಗಿಯಾಗಿರುವ ಶಂಕಿತ 2,834 ಜನರನ್ನು ಪರೀಕ್ಷಿಸಲಾಗಿದೆ. 

ವಿವಿಧ ರೀತಿಯ ಅಕ್ರಮ ಮಾದಕ ದ್ರವ್ಯಗಳನ್ನು ಹೊಂದಿದ್ದಕ್ಕಾಗಿ 203 ಪ್ರಕರಣಗಳನ್ನು ದಾಖಲಿಸಲಾಗಿದೆ. 208 ಜನರನ್ನು ಬಂಧಿಸಲಾಗಿದೆ. ಈ ಎಲ್ಲಾ ಪ್ರಕರಣಗಳಲ್ಲಿ, ಪೋಲೀಸರು ಅವರಿಂದ ಎಂಡಿಎಂಎ (15.7 ಗ್ರಾಂ), ಗಾಂಜಾ (28.729 ಕಿಲೋಗ್ರಾಂಗಳು) ಮತ್ತು ಗಾಂಜಾ ಬೀಡಿ (148 ತುಂಡುಗಳು) ನಂತಹ ಮಾರಕ ಮಾದಕ ದ್ರವ್ಯಗಳನ್ನು ವಶಪಡಿಸಿಕೊಂಡಿದ್ದಾರೆ.

ಅಕ್ರಮ ಡ್ರಗ್ಸ್‍ಗಳ ಸಂಗ್ರಹಣೆ ಮತ್ತು ಮಾರಾಟದಲ್ಲಿ ತೊಡಗಿರುವವರನ್ನು ಗುರುತಿಸಿ ಅವರ ವಿರುದ್ಧ ಕಠಿಣ ಕಾನೂನು ಕ್ರಮ ಕೈಗೊಳ್ಳಲು ಮಾರ್ಚ್ 18 ರಂದು ರಾಜ್ಯಾದ್ಯಂತ ಆಪರೇಷನ್ ಡಿ-ಹಂಟ್ ಅನ್ನು ನಡೆಸಲಾಯಿತು. ರಾಜ್ಯ ಪೋಲೀಸ್ ಮುಖ್ಯಸ್ಥ ಡಾ. ಶೇಖ್ ದರ್ವೇಶ್ ಸಾಹಿಬ್ ಅವರ ಸೂಚನೆಯಂತೆ, ರಾಜ್ಯ ಮಾದಕ ದ್ರವ್ಯ ವಿರೋಧಿ ಕಾರ್ಯಪಡೆ ಮುಖ್ಯಸ್ಥ ಮತ್ತು ಎಡಿಜಿಪಿ (ಕಾನೂನು ಮತ್ತು ಸುವ್ಯವಸ್ಥೆ) ಮನೋಜ್ ಅಬ್ರಹಾಂ ಅವರ ನೇತೃತ್ವದಲ್ಲಿ, ವ್ಯಾಪ್ತಿ ಆಧಾರಿತ ಎನ್‍ಡಿಪಿಎಸ್ ಸಮನ್ವಯ ಸೆಲ್ ಮತ್ತು ಜಿಲ್ಲಾ ಪೋಲೀಸ್ ಮುಖ್ಯಸ್ಥರು ಆಪರೇಷನ್ ಡಿ-ಹಂಟ್ ಅನ್ನು ಜಾರಿಗೊಳಿಸುತ್ತಿದ್ದಾರೆ.

ಸಾರ್ವಜನಿಕರಿಂದ ಮಾದಕ ವಸ್ತುಗಳ ಬಗ್ಗೆ ಮಾಹಿತಿ ಪಡೆದು ಕ್ರಮ ಕೈಗೊಳ್ಳಲು 24 ಗಂಟೆಗಳ ಕಾಲ ಕಾರ್ಯನಿರ್ವಹಿಸುವ ಮಾದಕ ವಸ್ತುಗಳ ವಿರೋಧಿ ನಿಯಂತ್ರಣ ಕೊಠಡಿ (9497927797) ಇದೆ. ಈ ಸಂಖ್ಯೆಯನ್ನು ಸಂಪರ್ಕಿಸುವವರ ಮಾಹಿತಿಯನ್ನು ಗೌಪ್ಯವಾಗಿಡಲಾಗುತ್ತದೆ.

ಮಾದಕ ದ್ರವ್ಯ ವಿರೋಧಿ ಕ್ರಮಗಳನ್ನು ಬಲಪಡಿಸುವ ಭಾಗವಾಗಿ, ಮಾದಕ ದ್ರವ್ಯ ವಿರೋಧಿ ಗುಪ್ತಚರ ಸೆಲ್, ಎನ್‍ಡಿಪಿಎಸ್ ಸಮನ್ವಯ ಸೆಲ್ ಮತ್ತು ವ್ಯಾಪ್ತಿ ಆಧಾರಿತ ಮಾದಕ ದ್ರವ್ಯ ವಿರೋಧಿ ಗುಪ್ತಚರ ಸೆಲ್ ರಾಜ್ಯ ಮಟ್ಟದಲ್ಲಿ ಕಾನೂನು ಮತ್ತು ಸುವ್ಯವಸ್ಥೆಯ ಎಡಿಜಿಪಿ ಅವರ ನೇರ ಮೇಲ್ವಿಚಾರಣೆಯಲ್ಲಿ ಕಾರ್ಯನಿರ್ವಹಿಸುತ್ತಿದೆ. ಮಾದಕವಸ್ತು ಸಂಬಂಧಿತ ವಹಿವಾಟುಗಳಲ್ಲಿ ನಿಯಮಿತವಾಗಿ ತೊಡಗಿಸಿಕೊಳ್ಳುವವರ ಡೇಟಾ ಬ್ಯಾಂಕ್ ಅನ್ನು ರಚಿಸುವ ಮತ್ತು ನಿರಂತರ ಕಣ್ಗಾವಲು ನಡೆಸುವ ಮೂಲಕ ಆಪರೇಷನ್ ಡಿ-ಹಂಟ್ ಮುಂದಿನ ದಿನಗಳಲ್ಲಿ ಮುಂದುವರಿಯುತ್ತದೆ.